孖寶兄弟2歲9個月喇!

仲有3個月就3歲喇! Update一吓孖寶兄弟的情況

哥哥:
仍然會因為好少事就爆喊, 扭計, 例如叫佢講句"唔該"先至俾野佢, 佢就寧死不屈, 爆喊都唔肯講句"唔該", 前日媽媽叫細佬換片, 講咗N次, 佢竟然一句: 「收聲啦!」激到媽媽隨即彈起, 然後鬧爆佢! 咁冇禮貌 (爸爸反而仲幫住佢, 話媽媽好鬧到佢喊, 話媽媽只係係度發洩緊, 話佢唔識喎, 咁咪要教囉! 唔鬧爆佢, 佢點知事態嚴重呀?)

不過, 哥哥有時又好可愛, 無啦啦走黎攬住你, 係咁叫你: 媽媽! 媽媽! 搞到你成個人都軟晒!

細佬:
最鍾意郁手打哥哥, 打頭, 打背脊, 又作狀咬哥哥, 鬧咗佢好多次都繼續係咁, 媽媽罰佢冇得玩具玩10分鐘, 仲要同哥哥講對唔住, 攬返哥哥, 哥哥好大方, 冇嬲細佬, 仲叠住細佬個膊頭叫佢一齊玩, 真係要俾個"讚"哥哥!  不過, 細佬有時又好錫哥哥, 佢見到哥哥喊到歇斯底里, 會走埋媽媽身邊, 同媽媽講：媽媽, 去抱吓哥哥！（細佬抵讚！）

返學第二日, 由12點換校服開始喊, 喊到歇斯底里, 嫲嫲根本湊唔到佢返學, 惟有唔返, 唉! 已經成日同佢講故事, 同佢講返學好好玩, 可能始終係細B, 同埋冇讀過N班, 係差D!

不過, 細佬有時都好明白事理, 爸爸同佢講朝早瞓醒唔可以衝入黎爸爸媽媽間房, 佢真係冇衝入黎, 寧願自己係走廊爆喊, 所以媽媽都即時出去抱起佢!