話說上星期六, 陽光普照, 風和日麗, 最好係出去郊遊, 半年前爸爸已經提意去搭360, 但係一直都未能成事, 當日即興去東涌, 1:30去到入口, 360職員話由此處排隊大概要1個鐘, 本來想打退堂鼓, 但既然一場黎到, 試吓排, 萬一孖寶兄弟扭計就即時走人啦! 好在爸爸醒目, 排隊前買咗2個開心樂園餐, 孖寶可以一邊排隊(其實係爸爸媽媽排, 佢地走黎走去, 搞搞震), 一邊食薯條, 粟米, 兩兄弟都算乖, 雖然天氣好熱, 滿頭大汗, 但冇扭計。
孖寶兄弟出巡, 亦引來眾人的目光, 有外籍遊客大叫: Twins, so cute! 有360女職員話: 孖生架? 好可愛啊! 孖寶兄弟仲即時醒多佢2個飛吻, hoho...
2:20pm終於買到飛(唔駛1個鐘), 可以搭纜車!
仲以為細佬會驚驚, 點知佢冇野, 兩個第一次見到D吊車都好興奮, 架纜車越上越高, 但佢地都冇話驚, 又睇海, 又睇飛機, 好開心, 哥哥仲係車箱入面走黎走去, 跪係凳上面睇窗外的風景。
上到山頂, 唔係好曬, 係好很曬! 又冇野睇, 同孖寶兄弟坐低食埋個包, 兜咗一個圈, 就決定落山走人。最吸引孖寶兄弟應該係souvenir shop入面D玩具, 佢地玩到唔捨得走, 之後就話好攰, 哥哥要爸爸抱, 細佬就要媽媽抱
媽媽: 媽媽冇晒電喇!
細佬: 細佬都冇晒電...
媽媽: 媽媽冇晒電, 好攰, 抱唔到細佬喇!
細佬: 媽媽要叉電...
媽媽: ....... (O咀)
突然有個外籍人士逗然然的面豬仔, 我以為佢話爸爸跌咗野, 原來係佢見到然然咁得意, 後尾見到我抱住細佬, 成班女仔尖叫: Oh! Twins! 然後仲輪流同我地影相, 我地突然變咗明星咁, hoho...
去到東涌, 媽媽饑渴交迫, 然然就突然瞓著咗, 3:30pm就打道回府, 逸逸攰到係車入面瞓著咗, 反而然然醒咗好精神, 冇瞓到!
雖然今日冇乜行程節目, 但好充實, 同埋好攰, 下個月去旅行應該都係咁, 不過, 應該都開心o既!
沒有留言:
張貼留言