Playgroup Again!

話說搬咗屋之後, 樓下的Playgroup好貴($300 x 2一堂), 本來諗住報唔到社區中心的Playgroup, 點知又報到 ($120 x 2一堂, OK啦!)

上星期六開始第一堂, 哥哥都唔知發生咩事, 雖然環境同以前鄭老師果度唔同, 但佢都照行入去課室, 自己搵野玩, 老師點名, 冇問題! 但細佬一見到個門口唔同咗, 已經唔肯行入去, 繼而爆喊扭抱, 為免影響其他小朋友上堂, 媽媽惟有抱細佬出去外面行吓, 其間細佬不斷大叫: 出去! 唔返學!  媽媽氹咗細佬10分鐘, 佢先至肯同媽媽一齊返入課室, 不過一直要媽媽抱住, 直到... 茶點時間... 有餅餅食喇!

哥哥好鍾意有音樂同跳舞的playgroup, 雖然佢跟唔到老師跳舞, 但佢會自創舞步, 樂在其中, 今次的playgroup係活動形式, 同其他小朋友比較多互動, 當然佢未必鍾意, 但親子跳舞時, 爸爸抱起佢飛時, 都會笑到卡卡聲!

細佬見到哥哥同其他小朋友玩得咁開心, 都開始有返D笑容, 冇咁驚喇!

茶點時間, 細佬知道有餅餅食就肯落地, 搵個位坐低, 食完餅餅有講故事時間, 爸爸媽媽鼓勵佢地出去指住老師本書上面的公仔, 2個都肯出去, 雖然佢地未必聽得明老師講野(因為係全英語), 但好似都聽得明大部份, 細佬返埋位時都有笑!

最後, 老師唱放學歌, 仲每個小朋友送一張貼紙 (貼係手背), 佢地好開心, 可能因為係車車貼紙, 佢地愛不釋手(不過係返屋企途中跌咗)

細佬返到屋企仲講起鄭老師教佢餅餅英文係biscuits (佢以為全世界的老師都叫做"鄭老師", wakakaka...)

後記:
同班小朋友有幾個都係好細個 (未夠歲半), 佢2個係班裏面都算係大B, 做大B真係有著數, 成班小朋友衝出去指住老師本書, 但係D細B行都未行得穏, 跟本埋唔到老師身邊囉!