哥哥戒"豬"成功!

話說哥哥鐘意叫自己個奶咀做"豬豬" (明明我地都係叫奶咀, 或者叫"咀咀", 幾時講過"豬豬"呀?)

Anyway, 豬豬對哥哥係好緊要, 哥哥每次眼瞓, 就會發顛, 喊, 同埋大叫豬豬, 通常即時塞個豬豬入去佢個咀, 佢就會即刻收聲, 不過, 有時喊得太投入, 都未必可以即時收到聲! 咁神奇的豬豬, 真係唔係話戒就可以戒到, 但係好多書/人都話, 其實1歲半就要戒奶咀, 因為對D牙齒發育唔係咁好, 哥哥已經2歲4個月喇! 之前諗咗好多方法都唔係好work, 包括:

1. 係佢面前剪爛個奶咀 -- 呢個方法實在太殘忍, 我諗佢會同我死過, 同埋好似殺咗佢全家咁, 我驚會對佢弱小心靈造成不可磨滅的童年陰影
2. 同佢講大個仔唔要奶咀 -- 佢跟本唔明咩叫做大個仔, 成句說話佢只係會聽到"唔要個奶咀", 佢會即刻喊得好淒厲
3. 佢之前咬爛咗個奶咀, 鼓勵佢自己掉咗落垃圾筒, 以後都唔再食奶咀 -- 阿嫲做咗前半部份, 但後半部份哥哥跟本唔明白, 佢唔知道掉咗個奶咀就會冇得食, 佢仍然叫住"豬豬", 因為佢知道仲有另一個未掉
4. 阿嫲話唔駛特別戒, 佢返學就自自然然戒 -- 咁神奇? 我真係未聽過, 但等佢返學已經2歲9個月, 會唔會遲咗D呢?

結果, 就係復活節假期前一晚, 哥哥食食吓個奶咀, 突然吐返出黎, 原來個奶咀俾佢咬爛咗, 仲有D碎碎吐埋出黎, 於是媽媽乘機同佢講, 咀咀爛咗喇! 冇得食, 於是佢好順攤咁瞓咗!

到第二晚, 佢又叫住要"豬豬", 媽媽同佢解釋豬豬已經爛咗, 仲俾埋佢睇, 佢照食, 無論爸爸媽媽點解釋佢都唔理(但真係好驚佢會吞咗D膠碎落肚), 結果爸爸扯返佢個奶咀出黎掉咗落垃圾筒(扮掉咗佢), 佢即場崩潰, 喊到收唔到聲 (註:媽媽已經全程抱住佢!) 最後, 爸爸執返個奶咀俾佢, 同佢講個咀咀掉過落垃圾筒, 好污糟架, 仲痴住細佬D屎屎喎! 嚇到佢即時拎開塊面, 唔敢食, 就係咁, 媽媽抱到佢瞓著!

因為冇咗奶咀, 哥哥有幾朝早都好早起咗身, 瞓唔返, 媽媽惟有抱佢多D, 午睡都係爸爸抱到佢瞓著為止 (當然唔可以係佢面前提"咀咀"呢2個字啦!) 過咗幾日, 佢已經冇再扭, 只係瞓覺前拎住條巾巾(佢好鐘意搵條巾巾包住隻右手瞓)

媽媽簡直覺得好似抗爭成功咁! 不過, 見到細佬仲要啜住巾巾瞓覺就... 唉! 好無奈(其實巾巾比奶咀更加污糟, 工人好多時都洗唔乾淨, 過水唔清, 細佬呢2年都唔知食咗幾多清潔劑落肚), 因為戒巾巾比戒奶咀更加難, 巾巾可以有好多條, 爛咗仲有其他巾, 爸爸曾經用返同一招對付細佬(巾巾有屎喎!), 但細佬只係偷笑咗一吓, 然後繼續啜巾 (佢似乎想講: 爸爸, 你當我白痴咩? 巾巾有屎?) 細佬實在太醒目喇! 似乎要用過另一個方法, 媽媽亦曾經同佢講: 你咁鍾意豬豬 (佢呢排超級鍾意睇Peppa Pig), 不如送晒D巾巾俾豬豬啦? 佢即時世界末日咁, 爆喊, 發爛渣, 仲係咁話豬豬曳曳... 唉! 又失敗... 似乎要再諗吓其他方法!