東京親子之旅2019 - Day 7

2019.04.23 (星期二)

今早自然醒, 早上8:30先至起身, 刷牙換衫, 9點食早餐, 本來安排咗今日去千葉縣的母親牧場, 但由於星期日去唔成Safari, 去咗兒童王國, 而兒童王國又有牧場, 所以已經騎咗馬仔, 餵咗羊仔, 去牧場揸牛奶同睇剪羊毛Show, 孖寶又冇乜興趣, 同老公上網搵咗好耐, 都唔知去邊好...... 結果, 係房hea到10:20先至Check out (酒店official check out時間係11點)。

是日早餐 -- 全包宴

老公決定今日的行程如下: 去橫濱港口D倉庫行吓, 然後揸車去AEON MALL行街, 食飯, 機場附近還車, 返酒店。早上10:45到咗倉庫附近個停車場泊車 (同一間店舖消費滿3,000円有2小時免費泊車)。原來只有1號倉庫D舖頭開咗, 2號倉庫要11點先至開門營業, 行咗一陣, 我見到有間舖頭係賣食品模型(即係餐廳廚窗Display嗰D), 好靚! 仲有一盒盒DIY, 可以買返去自己整, 我揀咗整朱古力雪糕新地, 盛惠1,718円, 唔夠3,000円冇泊車優惠。再過去2號倉庫行咗一陣, 孖寶開始唔耐煩, 對佢地嚟講, 又真係幾悶, 又冇佢地想睇既玩具, 結果去返1號倉庫, 買咗幾盒手信, 夠3,000円, 可以免費泊車喇!

早上11:45離開, 老公話船橋市有模型舖, 佢想去睇吓 (老公仍然係唔死心, 不斷搵模型舖, 我問: 乜你唔係話Amazon買仲平咩? 點解仲要去睇? 佢: err......) 行東京市區高速, 但行咗20分鐘就開始塞車, 吓? 又嚟? 塞咗好耐好耐, 下午1:20, 終於到咗"模型舖", 原來模型舖係一個叫做Lalaport的大型商場入面, 泊好車, 去咗食嘢先。叫咗2個兒童餐俾孖寶, 我叫咗個白雪魚西京燒, 老公叫咗個燒牛肉。

下午2點, 食完飯, 行商場 (原本安排咗今日下午去成田機場附近個航空博物館, 而家竟然走咗去行街, 太過份!)。原來個商場真係好大, 雖然只係得3層, 但分咗南、北、西館, 我地間餐廳係西館, 老公想睇嗰間模型舖係南館2/F, 我決定同老公一齊去咗南館先, 因為我發現我最鍾意的Majestic Legon同Jelly Beans都係南館, 之後, 老公帶孖寶去睇模型, 我就緊係去Shopping啦! 日本D女仔真係好幸福, 好多靚衫睇, 不過, 我都唔係間間睇, 因為有D一睇就知好貴, 都冇入去, 行咗好耐(雖然好鍾意行街睇衫, 但對腳好易攰的體質), 只係買咗2件衫(其中一件特價, 1,000円咋, 仲要係有牌子 -- as know as pinky)。

下午4:20 call老公, 問佢地行完未, 原來佢地一早冇嘢行, 去咗打機同砌LEGO(老公話孖寶砌咗成個鐘呀!), 同埋去藥房買消毒傷口藥水俾細佬 (佢塊面個傷口仲滲緊D膿水)。下午4:45離開, 老公仍然唔死心, 要去搵模型舖, 於是又去咗唔知邊度(孖寶瞓咗, 我冇落車, 老公自己一個去咗睇, 10分鐘後上返車)。

下午6:15到咗機場附近的AEON TOWN (原來TOWN係細過MALL既, 只有超市, 冇餐廳), 去咗一間寵物用品店行咗一陣, 買咗2包零食俾Nick Nick (已經好耐冇買過嘢俾Nick Nick), 本來想係超市買D嘢飲, 但太多人排隊, 放棄! 老公話不如搵吓附近有冇Volks (我地最愛的日式西餐廳, 自從3年前係大阪食過之後, 一直念念不忘!) 老公上網Search, 竟然就係200米附近有一間, YEAH! 去喇! 原來出咗AEON, 轉個彎已經到咗!

孖寶扭計唔肯落車
(旅程中經常發生咁既情況)

晚上7:15到咗Volks, 冇乜人, very good! 揀咗窗口位坐, 叫咗2個消防車兒童餐俾孖寶, 我叫咗個雜扒餐, 老公叫咗個羊架餐, 兩個餐都upgrade配湯+麵包 (我心諗, 其實upgrade一個已經得)。個餐本身係包沙律吧, 仲有飯, 所以今餐食得好飽好飽。

晚上8:10離開餐廳, 出發去還車, 但要去油站入咗油先, 之後經過7-11, 老公話想買D嘢飲返酒店, 我話想食甜品, 但俾人掃晒, 改為食雪糕, 雪糕會融, 唔可以返到酒店先食, 要係車度食咗先, 於是, 一家四口Share一支雪糕, 孖寶又嚟排隊輪流食雪糕, 好好笑!

晚上8:55到達租車公司還車, 陪咗我地7日的明星保母車, Bye Bye喇! 拎返D行李, 搭租車公司的Shuttle返去我地第一晚間酒店 -- TOBU HOTEL。

去到酒店Counter, 又見返上次幫我地Check in 個Trainee職員, 特登唔去佢個counter, 點知個經理又指返我去佢嗰度, 又係搞咗好耐, 今次已經主動俾埋老公個passport佢對, 都係搵唔到老公個名, 搞咗成10幾分鐘, 終於搵到老公個名 -- 陳大文? YES YES! 終於搞掂, 可以上房喇!

晚上9:20上到房, 細佬大叫: 嘩! 有4張床呀! 媽媽心諗: 正! 今晚應該可以瞓得好舒服! 今晚仲要係旅程中最平的一晚, 盛惠10,000円咋! YEAH! 由於聽朝一早7:30就要到機場Check in, 所以今晚要努力執好晒D行李, 聽朝一起身, 刷牙換衫就走人! 老公之前寄存咗佢箱Amazon戰利品係呢間酒店, 頭先去Bell Counter度拎返, 老公今次都買咗唔少嘢, 仲要唔掟得, 唔壓得, 唔撞得, 所以要騰空成個喼俾佢擺嘢, 反而D污糟衫就可以入紙皮箱, 任掟任壓, 寄艙返香港。就係執嘢期間, 門鐘突然響起, 我同孖寶講: 嗱! 話咗你哋唔好玩得咁嘈! 而家人哋走嚟投訴喇! 老公去開門, 原來係頭先個Trainee女職員同個經理, 佢地話俾錯房我地, 吓??? 咁都得! 老公話我地執到成地都係嘢, 而家調唔到房架喇! (你自己做錯嘢, 冇理由要個客幫你補鑊!) 結果, 我哋一家四口好安然咁係呢間房入面度過咗我地東京之旅的最後一晚!

 正!

望到機場

Day 7 完

後記:
其實孖寶(尤其細佬)今日不停埋怨, 點解要成日行商場? 佢好唔想行! 本來今日係要去牧場同航空博物館, 點知變成Shopping Day! 孖寶陪咗爸媽行咗成日商場, 雖然去咗打機同砌咗LEGO, 但旅行其實就係要去睇多D嘢, 唔係去行商場嘛! 爸媽事後都深感歉意, 決定下次去旅行, 唔再去行商場同模型舖, 安排去多D唔同既景點!