然兄逸弟: 東京親子之旅2019

2019.04.21 (星期日)

今朝又係8點左右起身, 今日比尋日好天, 有少少陽光, 氣溫就差唔多, 所以都係帶多D衫去好D, 因為今日去Safari, 其實就係尋日個Grinpa遊樂園隔離, 一樣係山區, 應該都係咁凍! 不過, 其實今日要搬酒店, 點都係帶晒所有行李架啦! 早上8:45食早餐, 孖寶食完早餐係房玩一陣, 爸媽執嘢。

孖寶有得去旅行, 又有咁多玩具玩, 真幸福!

早上9:45 Check out, 出發去Safari。車程大約50分鐘, 預計同尋日差不多, 10:40會到達。早上大概10:35, 係山路行行吓, 突然間塞車, 吓? 唔係咁大鑊嘛? 咁多人去Safari? 其實仲有10分鐘車程就到, 但好塞好塞, 塞咗1個鐘都未到, 老公同哥哥都急Vee, 我帶哥哥落車, 係路邊解決, 老公就惟有...... 用個咖啡樽(但唔順利......) 我同老公講: 咁既情況, 就算去到Safari都冇用, 我哋都冇book Jungle Bus, 睇怕都冇得坐, 如果自己揸架車入去兜個圈又冇乜特別, 孖寶又唔係特別鍾意睇動物, 其實附近仲有個富士山兒童王國, 一係改為去兒童王國啦?! 問吓孖寶, 佢地都話想去兒童王國, OK!

天氣好好, 條路又冇乜車

突然間塞晒車, 塞咗1個鐘都未到!

係分岔路口離開咗塞車的隊伍 (目測仲有排塞, 真係好痴線!) 11:45終於到達兒童王國(嘥咗好多時間! 好唔抵!) 今日有陽光, 雖然都大風, 但冇尋日咁凍, 不過, 我都係帶返條頸巾穩陣D! 今日係家庭無料日, 免費入場。

原來地方好大(好似成個山頭都係), 不過, 香港好少有機會行山, 當做吓運動都OK! 本來想去玩划艇仔同釣魚體驗, 但搵唔到, 越行越遠, 行咗上山, 去咗騎馬仔, 細佬唔再好似以前咁話好驚, 佢而家話好想騎, 不過要戴頭盔, 佢話好污糟, 有D忟, 今次細佬騎先, 然後輪到哥哥, 兩個都好開心, 仲嚷著想騎多一次! 媽媽提意去餵羊仔, 之後又去買甘筍餵馬仔, 細佬都係有D驚, 哥哥就好大膽, 又搞搞震。牧場仲有3隻兔仔, 可以俾人走入去圍欄入面摸吓兔仔。

仲有少量櫻花

細佬好驚隻馬

好乖的驢仔

哥哥玩兔仔, 漏低咗個水壼

下午1:15, 爸爸話有車呀! 兒童王國入面有架Shuttle, 俾人上山落山, 但唔係免費, 大人200円一回, 小童100円一回, 一家人嗱嗱林飛奔上車, 全車爆滿, 我地一家人要打散坐, 孖寶自動波share一個位(司機後面個一人座位), 我同老公坐走廊開出嚟嗰D位, 到咗下一個站, 全車人落晒車, 得返我哋一家四口, 呆晒! 哥哥突然問我: 媽媽! 我個水壼呢? 係唔係你幫我拎住? 我話: 吓? 冇喎! 媽媽冇幫你拎喎! 估計應該係頭先玩兔仔時, 哥哥擺低咗個水壼係張長凳上, 唔記得拎。我本來諗住放棄哥哥個水壼, 點知爸爸同個司機講(用電話翻譯), We lost something! 個司機用對講機通知頭先牧場D工作人員, 爸爸同我地一齊搭車落返山下面條街, 然後自己一個俾多100円轉做全日票, 搭車去返牧場幫哥哥搵水壼, 辛苦爸爸了! 我就帶孖寶去餐廳食咗飯先, 買咗一碗叉燒拉麵俾佢地share, 我唔食住, 等埋老公先!

下午2點, 老公whatsapp我, 佢搵返個水壼喇! 15分鐘後, 老公搭返車落嚟。由於孖寶已經食完嘢, 老公叫佢兩個出去餐廳外面行吓, 正當我同老公出去排隊買嘢食之際, 老公見到細佬跌親, 即刻跑出去, 我見勢色唔對, 都跑出去睇吓, 原來細佬同哥哥一齊去爬石, 細佬失平衡, 係舊石度跌咗落地下, 擦損塊面, 甩咗皮, 好在唔係流得太多血, 細佬仔當然係爆喊啦! 爸媽即刻扶細佬入返餐廳坐, 搵餐廳D飲用凍水幫佢沖傷口, 貼膠布, 爸爸仲即刻去買咗杯雪糕俾細佬仔食, 安慰佢, 叫佢唔駛驚! 之後, 爸媽去買嘢食, 但媽媽已經食龍肉都冇味! 細佬仔好少會跌得咁傷, 媽媽好心痛!

離開餐廳, 突然風雲變色, 冇晒太陽, 好似尋日咁, 又大風又凍, 本來想去划艇仔同釣魚, 算喇! 加上細佬仔受咗傷, 冇晒心機! 下午3:15離開兒童王國, 出發去山中湖, 我哋今晚會住溫泉酒店。

孖寶上車冇幾耐就瞓咗, 沿途經過超級市場(隔離有100円店同賣衫的舖頭), 老公泊低架車, 去100円店搵模型Display盒, 然後孖寶醒咗但唔想落車, 於是我同老公去行賣衫的舖頭, 買咗2條泳褲俾孖寶, 老公買咗件富士山T-shirt同Made in Japan底底, 我買唔到嘢! 之後返車, 叫埋孖寶一齊去超級市場買嘢, 細佬話好想食泡芙, 買咗2個, 另外又買咗士多啤梨、蘋果、飲品, 另外買咗兩支水槍(因為哥哥係香港帶嚟支水槍壞咗)。

慘慘豬

下午6點到達酒店, 間房都算大, 兩張床都唔算細, 有Sofa, 仲有個露台, 可以行出去睇富士山。由於未夠鐘食飯, 我同老公輪流去大浴場浸溫泉(4萬幾円一晚, 但冇'風呂付客室', 又冇貸切風呂, 只可以去大浴場, 仲話孖寶6歲唔係Infant, 要收每人50%成人charge, 同佢拗咗一輪, 話孖寶唔駛要床, 唔食飯, 但佢仍然堅持要收孖寶早餐錢, 唔俾錢就唔俾入去餐廳, 好小家的酒店!) 我去咗1/F的露天風呂, 原來連沖身的地方都係露天, 好很凍, 快快脆脆沖完個涼, 就去浸溫泉, 不過, 夜晚對住個湖(冇嘢睇!), 個富士山又俾D雲遮住, 浸咗10分鐘, 沖身, 走人!

行出露台, 可以見到富士山

晚上7:30, 落去廳餐食晚飯(冇私人房間, 冇包廂), 我地個package係最basic嗰隻, 所以今晚的晚廳都好basic, 酒店免費送咗每人一碗白飯+味噌湯俾孖寶(皇恩浩蕩啊!) 然後, 個待應上菜俾我同老公, 要食完一碟, 收碟, 再上另一碟, 成餐飯冇乜特別, 味道不過不失, 食完唔覺飽, 好在之前買咗甜品同生果, 一陣返房繼續食。