東京親子之旅2019 - Day 2

2019.04.18 (星期四)

今早8點起身, 天氣晴朗, 氣溫大概19度, 長袖衫加薄外套就OK!

早上8:45落去食早餐, 孖寶食早餐要俾錢, 盛惠1,2XX円。

孖寶只係食咗呢幾舊嘢同飲咗半杯橙汁, 盛惠1,2XX円

早上9:45, Check out, 打電話俾租車公司Times, 叫佢地搵人嚟接我地, 去到租車公司, 職員話今日提供唔到我地租嗰款車, 所以free upgrade咗豐田Alphard(8人車)俾我哋, 職員問我哋OK唔OK? 吓?! 緊係OK啦! 但我見老公有D猶疑, 原來佢話驚架車太高, 入唔到酒店D停車場, 唔會掛?! 不過, 當老公一坐上架車之後, 已經忍唔住咀角微微向上翹起, 唔好扮嘢啦! 人哋free upgrade架明星保母車俾你呀! 執到啦!

 四個人坐咁大架車

孖寶話呢架車舒服過爸爸架車!

早上10:45出發, 老公一邊揸車, 一邊讚架車有幾好幾正! (好驚佢返到香港會忍唔住即刻換咗部車!) 首先去老公最鍾意的AUTOBACS睇車用品, 車程約1個鐘, 11:50到達, 間舖頭好decent, 有兩層, 仲有cafe,  老公本來想買個膠箱, 最後都係冇買 (因為買嚟都唔知裝咩!), 行咗50分鐘, 走喇! 下一站係台場, 老公話先去酒店Check in, 擺低D行李同泊低架車, 然後搭Free Shuttle去台場D商場。

環境舒適寧靜

大約下午1點到達酒店Grand Nikko Tokyo Daiba, 就係停車前既十秒左右, 哥哥突然發晒癲, 大嗌, 佢話細佬用個水壼"揼"佢隻手指, 好痛, 狂喊, 我見到哥哥隻手指真係紅晒, 不過, 爸爸狂鬧哥哥, 話佢痴線, 又鬧細佬, 酒店職員本來想幫我地拎行李落車, 見到咁既情況, 呆晒, 企咗係度 (唉! 我們這一家, 真係失禮死人!), 我惟有走去車尾, 打開車尾箱, 俾職員拎咗D行李先 (原來未可以Check in, 要下午3點後), 老公揸返架車落去停車場, 期間, 老公停咗架車係地下, 繼續狂鬧孖寶, 仲車咗佢地一人一巴, 扯咗哥哥落車, 話罰佢企到今晚, 我忍唔住出口, 其實哥哥先至係受害者, 係細佬持登用個水壼"揼"哥哥隻手指, 因為佢唔鍾意哥哥伸隻手去佢嗰邊。

擾嚷咗20分鐘, 終於可以入停車場泊低架車, 然後搭lift上返去大堂等Free Shuttle。我哋首先去「日本科學未來館(Miraikan)」, 個館入面有餐廳, 可以食Lunch。買咗飛, 先去7樓的餐廳食嘢, D嘢唔算好食, 但環境舒服, 冇乜人。食完飯, 落返地下大堂, 老公見到有"電動凳"體驗 (300円5分鐘), 試玩咗一次。

之後, 入咗去一個大廳, 有好多"沙灘椅"俾人瞓係度欣賞個吊係半空的"地球"(孖寶叫佢做「原子鍋爐」), 孖寶見到有幾張"沙灘椅"吊住個瑩光幕, 超興奮, 玩咗好耐都唔捨得走, 爸爸媽媽惟有話去紀念品店睇野, 佢地先至肯跟我地離開。爸爸買咗盒細模型, 好似係砌人造衞星之類的物體。

 三父子瞓晒係度好搞笑!

孖寶叫佢做「原子鍋爐」

搞咗咁耐, 都未正式入場, 因為展館其實係3樓, 入到展館, 感覺類似香港的科學館, 又係好多制俾人撳, 但大部份都唔知做乜, 雖然有英文說明, 都係唔明佢想表達咩概念。行行吓見到有人排隊, 唔知玩咩, 好似係關於訊息的傳達, 哥哥話好想玩, 排隊要20分鐘, 佢都話想排, 細佬冇興趣, 唔想排隊, 於是媽媽帶咗細佬上一層, 有個模擬太空艙, 仲有其他展覽, 但都係唔知佢想表達咩。之後, 爸爸同哥哥都上咗嚟, 有3個大叔(工作人員)係架餐車度執緊D人體器官模型, 我地又走埋去睇吓, 孖寶玩咗一陣, 幾個大叔就推走咗架車。細佬扯住我入咗一個講醫學的展館, 爸爸同哥哥就唔知去咗邊, 最後要打電話先至搵返佢地, 原來佢地以為我地走咗, 所以落咗樓下, 我同老公都覺得, 去過咁多日本的乜館物館, 呢個未來科學館係最不知所謂der~

下午3:45離開, 離開之前, 哥哥嚷著要去多次玩「原子鍋爐」, 爸爸媽媽又呆等咗10分鐘。離開不知所謂館, 我地又搭Free Shuttle去另一個景點 -- Toyota Mega Web, 本來小朋友可以試揸電動車, 但孖寶唔夠115cm (細佬有114.5cm 都唔玩得), 結果, 佢地只可以玩BB電動車。

孖寶唔夠高, 只可以玩BB電動車

由於冇嘢啱孖寶玩, 爸爸諗住離開, 去下一站 -- 睇"高達", 經過一間賣益智玩具的舖頭, 我叫孖寶玩一陣, 爸爸同媽媽輪流去行吓街, 但冇嘢睇/買, 走喇!

下午5:30, 我地又搭Free Shuttle去下一個商場Diver City, 經過賣手信的舖頭, 爸媽想行吓, 於是買咗杯雪糕俾孖寶Share, 叫佢地企係度食, 唔好走開, 爸媽係舖頭入面行吓, 媽媽買咗一盒"看起來很好吃"的手信, 叫做Sugar Sand Tree, 之前冇見過, 買嚟係旅程途中當零食食吓! 之後就穿過商場個Food Court, 出去睇"高達", 嘩! 真係好高, 手工細緻, 香港淨係識整咩佛像、觀音, 學吓人地日本啦! 整個"高達"出嚟已經嬴晒啦! 不過, 由於已經黃昏, 加上都幾大風, 室外氣溫開始凍, 都係嗱嗱林走人喇!

 你兩個就留係度食雪糕, 爸媽入去舖頭行吓!

由於Free Shuttle 晚上7點就停駛, 老公提意搭Shuttle返酒店Check in先, 抖一陣, 然後再揸車出嚟搵嘢食。下午6:20搭Shuttle返酒店, Check in, 上房, 間房好大, 但兩張床冇尋晚嗰間咁闊, 今晚會瞓得辛苦D, 個浴室好大, 有浴缸(孖寶可以浸"温泉"玩水槍), 仲有個Shower Box。今次旅程所有酒店都係由老公負責搵的, 佢話想住好少少, 大家舒服D, 所以今次所有酒店都堅係Hotel, 唔係Inn。

晚上7:20左右, 離開酒店, 停車場竟然要收我地2,000円出閘(本來顯示係6,000円, 痴線!), 老公撳對講機同個職員講, 之後個職員出嚟, 雞同鴨講咗一大輪, 老公黑晒面, 個職員無奈開閘俾我地出車。揸車去附近的商場DECKS搵嘢食, 老公search過有泊車優惠, 同一間店舖消費滿3,000円有2個鐘免費泊車。不過, 商場冇乜日式廳餐選擇, 有D仲俾人包咗場, 最後惟有去食炸到唔清唔楚的「和幸」, 我地坐窗口位, 個View望住彩虹橋同東京的夜景, 正! 叫咗兩個兒童餐俾孖寶(因為有玩具送, 細佬最like), 我叫咗個女士Set, 老公叫咗個唔知咩Set, 食完餐飯之後已經感覺條脷好痛, 因為真係好熱氣!

晚上8:30食完飯, 係附近行吓, 去返上次(十幾年前度蜜月嚟過)嗰條「一丁目商店街」, 孖寶入咗去機舖玩咗一舖"桌上足球", 由於已經接近晚上9點, D商舖陸續收檔, 我地都離開, 見到有西松屋, 但已經冇晒人, 準備收檔, 我地仲未買聽日既早餐(特登唔係酒店食早餐, 因為酒店要收孖寶早餐錢, 佢兩個又練仙der~ 好唔抵, 都係自己買早餐, 係房食, 仲舒服!) 商場地下的街舖有Family Mart, 買咗麵包, 三文治, 飯團, 果汁同牛奶做早餐!

晚上9:20返酒店, 老公同孖寶沖涼, 孖寶玩水, 我執嘢, 又係搞到11點幾先至瞓。

Day 2 完