然兄逸弟: 東京親子之旅2019

2019.04.20 (星期六)

早上8點左右起身, 今日天陰陰, 但冇落雨, 老公search google話今日氣溫15度(同尋日相差好遠喎!), 不過, 老公話應該唔會好凍既, 唔駛著大褸! 啊......

早上8:25食早餐, 今朝的早餐好豐富, 有冷麵, 哥哥好like!

早上9:55離開酒店, 出發去今次旅行的重點節目 -- Grinpa遊樂園, 上年帶孖寶嚟過, 佢地好鍾意玩樂園入面個忍者屋。由酒店去樂園的車程約50分鐘, 早上10:45左右到達樂園的停車場, 架車的錶板顯示室外氣溫只有11度, OMG! 老公你仲叫我唔駛著大樓?! 落咗車, 已經感覺到好大風, 好凍, 冇錯! 應該只有10度左右, 但我地冇著羽絨, 連大褸都冇, 只有一件長袖外套, 孖寶好D, 因為行程的第一晚拎咗件大褸出黎著, 就一直留咗係車上, 好在冇拎走。我同老公講: 我唔應該咁聽你話! 我舊年又係著唔夠衫, 覺得好凍, 今次比舊年更加凍, 但我今次著的衫更加少! 唉! 惟有凍住咁玩! 希望唔好冷病啦!

唔駛排隊就買到飛, 個樂園又係冇乜人(仲以為撞正星期六會好多人), 同舊年一樣, YEAH! 孖寶一心想去玩忍者屋, 所以skip晒所有經過的遊戲, 本來想搭小火車上山, 但因為唔知要企係度等幾耐, 真係凍到打冷震, 所以一直行, 終於行到去忍者屋, 個工作人員唔識英文, 用對講機call個同事過黎同我地講解, 其實我地以前已經玩過, 跟本唔駛講解, 我地不停咁同佢講: We played before! 但佢唔明, 算啦! 再講幾多次都係嘥氣! 結果又係吹住大風咁等咗好耐, 終於等到佢個同事由山腳跑到上黎, 我地同佢個同事講: We played before! 佢話: OK! OK!

我地今次揀咗挑戰藍色路線先, 哥哥因為之前玩過, 所以好興奮, 一定要佢帶路, 至於細佬就好堅持要幫我地四個搜集晒D印仔, 我同佢講, 印一張得啦! 佢話唔得, 堅持要印晒4張。雖然話係忍者屋, 但只係用木板搭建而成, 係好通透的, 所以係入面仍然係好大風, 好凍! 跟住孖寶兄弟爬高爬低, 雖然keep住郁動身體, 但媽媽仍然係覺得好凍, 感覺雙手就黎結冰! 孖寶全程爭先恐後, 老公叫佢地要俾爸爸行先, 因為爸爸要幫佢地影相。好快就到咗屋頂, 發覺冇咗個搖鈴(舊年有架!), 行返落地面, 孖寶話要玩埋紅色路線, 原來紅色係難過藍色架! 玩完出黎, 孖寶堅持要去隔離間屋仔搜集埋最後一個印章。

中午12點左右, 孖寶轉戰迷宮屋(上次冇玩), 其實同忍者屋一樣, 都係搜集印章, 工作人員先用日文, 再用英文講解遊戲方法, Ready? GO! 話明係迷宮屋, 所以好難先至搵到D印章, 有時離遠見到, 但硬係去唔到, 呢個迷宮屋, 比忍者屋要花更多時間, 又上又落, 又要"捐黎捐去", 救命呀! 我真係好唔想再捐, 可唔可以行過第二條路呢? 玩咗30分鐘都未搵齊D印章, 爸媽好想放棄, 但孖寶好堅持, 平日做功課同溫書又唔見佢兩個咁堅持喎?! 結果, 終於都搵到最後一個印章喇! 太好耐, 終於可以玩完離開個迷宮喇!

孖寶堅持要集齊所有印章

食飯之前, 去玩多一個遊戲, 就係揸車, 今次冇人排隊(上次排咗20分鐘呀!), 不過, 天氣真係好凍, 加上揸車時, 寒風撲面, 我感覺雙手好似凍彊咗咁! 只係一心想踩行油門, 盡快玩完! 孖寶嚷著想玩多一次, 唔得喇! 真係太凍, 爸媽不行了! 爸爸話要盡快入室內暖吓身先!

哥哥影相好叻擺Post

下午1點去食午餐, 去返上次間咸超主題餐廳, 買咗一碟外星人咖喱飯、一碗叉燒拉麵、一碗天婦羅炸蝦烏冬。食食吓, 哥哥進入發眼瞓癲模式, 媽媽叫佢食多少少麵, 佢好大聲咁話: 我粒飛滋好痛呀! 你仲叫人食嘢! 媽媽冇睬佢, 冇幾耐, 佢就自動進入咗睡眠狀態。我話同細佬出去玩吓先! 爸爸就留係餐廳入面篤機, 順便睇住瞓著咗既哥哥!

哥哥食飯前仲係好精神, 但食到一半已經進入咗睡眠狀態

細佬話要玩過山車, 其實唔係過山車, 只係一架空中小火車, 天氣好凍, 我地走咗一班車, 要企係半空等下一班, 好大風, 好凍! 救命! 可唔可以唔玩呀? 緊係唔得啦! 終於到下一班, 玩緊的時候都係好凍, 點解架車行得咁慢? 幾時玩完呀?

玩完空中小火車之後, 細佬話要玩埋"咸超轉轉轉", 媽媽一諗起係半空中係咁轉, D寒風又係兜口兜面咁吹埋黎, 唔玩得唔得呀? 緊係唔得啦! 不過, 個閘又係啱啱close, 又要等下一班, 又係打晒冷震咁企係度等, 救命呀! 轉轉轉期間, 見到爸爸帶埋哥哥出嚟搵我哋, 哥哥叉完電, 好似回復正常喇!

爸爸話太凍喇! 要玩D室內既嘢! 咁一係玩返上次個碰碰車啦! 原來碰碰車已經變咗跳彈床, 孖寶最Like! 只係爸爸媽媽冇得玩咁解啫! 孖寶跳嚟跳去, 好興奮, 玩到流晒汗, 要除衫, 但媽媽對手仍然一直係凍彊狀態, 冇暖過(雖然已經入咗室內, 但冇暖氣, 仍然感覺好凍!) 玩咗2 Rounds跳彈床(爸媽呆等, 好悶啊!) 於是, 出去玩旋轉木馬, 冇人玩, 得我哋一家四口玩, D風迎面吹埋嚟, 好好好凍呀!!!

好大風, 好很凍!

本來山下面近入口仲有水陸兩用車同空中單車, 睇怕都係玩唔到架喇! 下午2:45行返落山, 經過一排屋仔, 入去睇吓咩嚟, 順便避寒, 原來有少量室內機動遊戲, 包括咖啡杯同兒童跳樓機, 媽媽陪孖寶玩咖啡杯, 爸爸早知會發生咩事, 所以即時話唔玩, 結果, 機動遊戲都未開始, 孖寶已經狂轉個軚盤, 救命呀! 媽媽好暈, 好想嘔, 辛苦到標晒眼水, 由爸爸扶媽媽落嚟, 坐埋一邊休息, 孖寶就繼續去玩跳樓機。原來呢一排屋仔係相通的, 前面係一個好大好大的兒童室內Playground, 分開BB區, 女仔區同男仔區, 除咗鞋, 孖寶已經一支箭咁衝落去玩, 爸媽又要呆坐唔知幾耐。玩咗30分鐘, 爸媽真係好悶啊! 走喇!

以後都唔會再陪孖寶玩咖啡杯

佢兩個自己玩跳樓機

睇怕好難走得甩

行去森林家族店睇吓, 價錢冇Bic Camera咁平, 又唔算多款, 又冇新款, 媽媽買唔到嘢! 走喇! 細佬仔嚷想要去參觀綠色屋頂嗰座森林家族屋, 其實媽媽都好想去睇吓, 於是一家四口行去睇吓, 間屋既二樓有個爛晒的鋼琴, 孖寶玩咗一陣, 影咗幾張相, 走喇! 之後又去咗另一間屋睇咗一陣! 下午4點, 離開樂園, 返去沼津市行Bic Camera。

下午5點到達Bic Camera, 叫醒孖寶一齊落車睇玩具, 媽媽當然係睇最愛的森林家族, 咁啱有齊晒3款車仔檔(水果檔、糖果檔、Popcorn檔), 一於買晒佢哋返屋企, 車仔檔可以扣係我之前買嗰架熱狗車後面, YEAH! 另外買咗盒TOMICA馬路俾孖寶, 爸爸都買咗兩架車仔同幾支模型筆。買滿5,000円可以免稅同有7%折扣, 不過, 個收銀員又係搞咗好耐(次次都係咁!) 最後好似平咗500円咁上下!

下午6點離開, 爸爸搵到附近有個商場, 7點左右去食飯, 今晚食烏冬, 叫咗2個兒童餐俾孖寶, 因為有玩具送, 原來我叫嗰個係冷烏冬, 已經凍彊咗成日, 我想食熱嘢啊! 老公同我交換(老公, 你好偉大啊!) 食飽飽, 爸爸陪孖寶出去門口個架揀玩具。之後, 去超級市場買聽朝的早餐, 老公今次買咗盒壽司......errrrr......一朝早食壽司...... 我都係想食包多D!