2019.04.22 (星期一)
尋晚特登校早D個鬧鐘, 今朝7點起身, 嗱嗱林刷牙洗面, 然後落去浸溫泉, 行到去大浴場門口, 見到門口個鞋架超多拖鞋, 仲聽到入面好嘈(講國語), 心知不妙, 打開門, 果然係一堆大媽, 除咗衫, 入到去, 又係好多大媽, 唉! 算啦! 冇辦法! 呢個世界去到天腳底都係大劣人, 避唔到!
沖一沖身, 走去浸溫泉, 今朝個天好清, 冇雲遮住個富士山, 一邊浸溫泉, 一邊望住個富士山, 其實係好舒服的! 可惜, 身邊的大媽不停講野: 巧尾啊! 巧尾啊! 完全破壞晒個氣氛, 我就係一片大媽的嘈雜聲之中, 免免強強浸咗10分鐘, 算喇! 我放棄! 走人! 上返房, 輪到老公去浸, 佢話冇乜人, 每次都係咁, 通常都係大媽多過大叔!
由於酒店個package包咗2張成人的KABA Bus(山中湖水陸兩用巴士)車飛, 酒店仲幫我地book咗10點, 搞到明明可以10點先Check out, 而家要提早半個鐘9:30 Check out, 所以要提早7:45就叫醒孖寶, 刷牙換衫, 8:10落去食早餐, 我叫老公帶定D錢, 驚酒店餐廳要即場收佢地早餐錢, 冇錢唔俾入去, 點知俾咗2張早餐券個經理, 佢冇講野, 就帶我地入咗去坐低。早餐係自助形式, 孖寶都一齊出嚟揀早餐, 選擇都算豐富。孖寶食完早餐, 爸爸同佢地出去花園行吓, 影吓相 (我就繼續隊包, 食飽D, 費是中午肚餓, 老公又唔覺得有需要食嘢, 到時我黑面就唔好啦!)
孖寶好想媽媽同佢地一齊出去影相, 於是走入嚟扯埋我出去, 好難得三母子合照, 仲叫佢地幫爸爸媽媽影相, 老公話: 終於有阿仔幫我地影相喇! 旅行可以有兩公婆的合照! (好滾動啊!)
原來係孖寶個Eye Level睇既爸爸媽媽係咁既!
上房執埋D行李, 早上9:30 Check out, 酒店本來話要收孖寶早餐錢, 但竟然冇收到, hoho! 老公本來想去幫架車入油, 但唔夠時間, 要去咗搭水陸兩用巴士先。9:50到咗KABA Bus站, 我落車先, 嗱嗱林入去上2/F幫孖寶買飛, 小童每位1,000円。然後, 老公泊好車, 帶住孖寶上嚟搵我, 職員幫我地一家四口係架KABA Bus前面影相, 上車, 又係我同細佬坐, 爸爸同哥哥坐, 今日個導遊會講日文同國語, 所以我哋唔駛用翻譯機。
架巴士首先係附近的地方行吓, 導遊介紹山中湖的特色, 同我地玩問答遊戲, 孖寶答啱咗, 好開心! 然後, 架巴士就去到湖邊, 準備要衝落水, 架巴士衝落水一刻, 濺起好多水花, 但孖寶兄弟冇特別興奮。導遊繼續介紹山中湖, 孖寶兄弟聽唔明國語, 呆晒, 爸爸叫佢地睇吓個湖對面個半山, 就係我地尋晚間酒店喇! 仲有, 富士山就係我地後面, 孖寶有少少反應......
早上10:30返到嚟KABA Bus站, 老公買咗頭先導遊幫我地影嗰幅相, 盛惠1,000円, 我就係手信舖買咗2盒餅。老公揸車去油站入油, 見到個湖有人划鴨仔, 我話不如去玩啦! 孖寶好想玩! 揸車去對面馬路, 泊低, 行落咗去湖邊, 阿伯話2-3人2,000円30分鐘, 4個人要3,000円, 我地好明顯計4個人啦! 盛惠3,000円, 都幾貴! (本來仲有一款係電動的, 唔駛用腳踩, 盛惠4,000円, 但孖寶堅持要踩, 好啦!) 隻鴨都幾殘, 仲要分開前後排坐(上年係河口湖可以一家人排排坐), 我同哥哥坐後排, 爸爸同細佬坐前排, 四個人都要踩, 加上都幾大風(我地逆風), 踩得好吃力, 好攰! 但孖寶好興奮, 好開心! (好驚佢地太落力踩, 失平衡, 跌落水!)
隻天鵝見我地冇嘢食, 好快就游走咗!
划完鴨仔, 去返KABA Bus站去手洗間, 老公係手信舖買咗架KABA Bus模型。
11:55出發去忍者村, 中午12:10到咗, 好近! 買飛入場, 另外幫孖寶報名參加忍者體驗(下午1點), 盛惠每人1,000円。職員話12:20有一場忍者Show, 我地就去咗睇Show先, 有好多打鬥場面, 孖寶好鍾意睇, 見到忍者殺咗個人, 個人跌咗落地下, 哥哥竟然大笑!
睇完Show大約12:50, 我地行去忍者體驗場, 原來個老師就係頭先被殺嗰個忍者, 首先係擲飛鏢, 每人可以擲3次, 細佬竟然擲中咗一次, 好叻叻呀! 估唔到平日細佬擲紙飛機唔叻, 但擲飛鏢就咁叻, 哥哥就3次都擲唔中。之後就係吹箭, 係老師的幫助下, 哥哥都係吹唔到, 似乎因為佢吹得太輕力! 細佬第一吓吹到, 但之後都唔得。最後, 就係模擬斬殺敵入, 然後潛入屋內偷走書卷, 由老師示範一次。本來要打筋斗, 但孖寶唔識, 老師叫佢地急步行過去啦! 除咗打筋斗, 孖寶好認真咁完成所有動作, 玩得好投入! 體驗結束, 老師送俾佢地每人一張証書(Ninja Licence)同一個膠飛鏢, 原來體驗完仲有禮物, 孖寶好開心!
老師教大家做忍者手勢, 孖寶好俾心機學
下午1:20, 我話仲有忍者屋未參觀喎! 於是行埋過去玩, 屋入面有好多機關, 燈光又暗, 孖寶又驚又要玩, 玩完一次又要媽媽陪佢地玩多一次。出返嚟, 係個日式庭園度影吓相, 下午1:45走喇! 要去食飯。由於大家都好肚餓, 又唔知邊度有嘢食, 所以就係車上不停食包、食零食。然後揸車去附近的忍野八海。
好難得孖寶肯坐定定, 正正經經咁俾爸爸影相
下午2:10左右, 泊低架車係個爛地停車場, 原來係屬於附近手信舖的, 收費300円, 但購物滿1,000円可以免費泊車, 於是, 我哋嗱嗱林買咗2樽"撈飯粉", 盛惠1,080円。手信舖隔離係餐廳(好殘舊!), 老公話: 就係度食啦! 因為周圍都冇嘢食! 是但啦! 叫咗一客冷麵, 一碗烏冬, 一碗牛肉蕎麥麵, 味道正常。枱面有撈飯粉試食, 孖寶話好好味, 於是媽媽又走過隔離買多一樽。
食完飯, 行過隔離條巷, 兩邊都係賣手信同小食店, 好多人, 早知係度食啦! 不過, 頭先D麵都唔算好差! 所謂忍野八海係有幾個池, 目測D水都幾深, 池底下面有海草, 池水好清, 可以見到好多肥魚! 不過, 真係好多人, 仲要大部份都係大劣人, 我以為自己返咗大陸D咩旅遊開發區。期間, 哥哥突然話要poo poo, 頭先餐廳嗰度你唔講?! 而家邊度搵個公廁俾你呀?! 媽媽嗱嗱林拖住哥哥, 行返轉頭, 睇吓頭先D餐廳、手信舖有冇廁所, 好在, 有間手信舖有廁所 (仲以為咁多大劣人, 廁所已經不外借了!) 同哥哥入咗去廁所, 好細, 得一格, 仲要係踎廁! (又黎! 上次係名古屋大高綠地個公園又係咁! OK! 有經驗! 今次都得既!) 我叫哥哥踎低(佢初時以為係要坐低), 我扎好個馬, 雙手托住哥哥個Galady, 閉氣, 然後仲要幫哥哥抺pat pat, 好在都順利完成! 出返嚟, 原來爸爸同細佬係手信舖門口等我地。
再行咗一陣, 太多人, 太多大劣人, 我頂唔順, 下午3:10, 都係走喇! 臨走買咗個栗子燒餅, 都冇栗子既, 得D豆沙, 好似食緊豆沙包咁, 最後一啖, 我先至見到有粒栗子, 但俾細佬一啖咬走咗!
下午3:30出發去橫濱, 車程要2個鐘(本來想去返上次個交通公園, 頭先發現原來公園今日休息! 好在唔係去到先知啫!) 下午5:45去到橫濱, 老公想去睇模型, 但個模型舖唔知係邊, 個GPS老點我地入咗去行人專用區, 好似大阪個道頓屈咁既地方, 架車差D出唔返嚟! 兜咗2個圈都係唔見模型舖, 算喇! 走人! 返咗今晚酒店Check in先。
個GPS經常老點
今晚住橫濱港口的Royal Park Hotel, 6:20到達酒店Check in, 我地住58樓, 可以見到個港口同摩天輪, 個景好靚! 間房都唔錯, 不過, 廁所有D老套同殘, 是但啦! 今晚盛惠16,500円, 可以住到咁既級數酒店, very ok!
高層無敵靚景
晚上6:50落去酒店附近商場行吓同搵嘢食, 見到有多啦A夢月球探險記的Pop-up Store, 入去睇吓嘢, 仲多嘢賣過早幾日個不二雄館, 孖寶冇嚷著要買嘢, 好乖, 所以媽媽每人送咗一本多啦A夢剪紙簿俾佢地。之後又行咗一陣LEGO專門店, 個商場好大, 好多層, 而且幾個商場都係連住的, 不過, D商場太大, 行仲多過睇嘢, 結果放棄喇! 唔行喇!
晚上8點, 搵嘢食! 唔係好多日式餐廳選擇, 食拉麵的地方通常坐得唔舒服, 唔啱有小朋友的家庭, 食放題又唔啱我地個胃咁細既人, 食炸嘢又會生飛滋, 掙扎咗好耐, 終於決定入去一間食茶漬飯的餐廳 (茶漬飯其實即係湯飯)。叫咗3個餐, 燒雞、鰻魚、半生熟牛肉。孖寶個餐有三文魚碎撈飯, 再加埋自己落大量的紫菜絲, 孖寶好快食晒成碗飯(都仲未食餸), 又要講多1次 -- 養孖寶真係好慳飼料der~! 可能孖寶太肚餓, 要添飯(爸媽分咗自己D飯俾佢地食), 哥哥係咁話爸爸D飯好好味!
然然唔發脾氣時, 係一個Sweet Boy!
食完飯, 去超級市場買聽朝的早餐, 晚上9點返酒店。孖寶今晚都有浸"溫泉", 兩個玩水槍玩得好開心! 今晚的飯後甜品係芝士蛋糕 (我同老公一人一件), 仲有士多啤梨、蘋果, 好豐富, 好飽!
老公每晚都好忙咁記錄低每日的開支
細佬仔嘆蘋果
Day 6 完
