孖寶兄弟語錄(12)

話說細佬尋晚半夜3:30扎醒咗, 佢今朝同媽媽講返:

細佬: 媽媽, 我尋晚醒咗, 黑蚊蚊, 仲係夜晚
媽媽: 啊! 咁黑, 咁你有冇好驚呀?
細佬: 我去搵咗姐姐!
媽媽: 其實你都可以搵爸爸媽媽...
細佬: 我知道你同爸爸聽日要返工, 你地唔夠瞓聽朝就返唔到工架喇!
媽媽: 嘩! 細佬你好乖喎! 好生性! 識得為爸爸媽媽設想, 欣賞你呀!


又話說前晚食飯的時候...

細佬: 爸爸, 點解你之前話8月去完旅行就以後冇得去呀? (把聲吊高8度 + 嬲嬲豬表情)
爸爸: 唔係以後冇得去, 我係話8月去完, 就要等到下年先至再去喇!
細佬: 吓? (超大聲), 點解呀? 我唔要等到下年! 我唔想咁耐都冇得去旅行呀!
媽媽: 噢! 細佬! 你講咗媽媽的心聲呀!
細佬: 我要每個月都去!
媽媽: (心諗: 細佬! 估唔到你得4歲人仔, 但你就講出咗每一個打工仔的心聲!)
爸爸: (繼續好認真咁解釋點解唔可以每個月去旅行)

媽媽已經笑到收唔到聲...