4.6.2017（星期日）
10:30 帶孖寶去兒童遊戲室玩，兩個玩到癲晒，流晒大汗
11:15 一節完，細佬話想排隊再玩多一節，哥哥話好攰，唔想玩，想去行IKEA
13:00 去停車場攞車，拖住哥哥隻手仔，感覺好熱，同老公講哥哥好似發燒，老公話佢都覺得係 (唔怪之得佢連遊戲室都唔想玩啦! 太反常喇!)
13:45 返到屋企，額探超過37.5，係發燒，但哥哥精神唔算太差
19:00 哥哥個人好攰，連佢平時最like的冷麵都冇胃口食
5.6.2017（星期一）
05:00 爸爸餵哥哥食咗一次退燒藥
10:30 哥哥同嫲嫲講，好唔舒服，想去睇醫生
11:00 睇醫生，診所耳探38.5，奄奄一息，醫生開咗退燒同收鼻水藥，似乎係流感，但診所冇流感快速測試
14:00 哥哥個人都尚算精神
16:30 媽媽帶哥哥去另一診所做流感快測，耳探39.6，哥哥係診所嘔水，又變返奄奄一息，測試結果negative，醫生話唔係流感，可能係病毒感染，醫生話佢而家咁高燒，幫佢用肛塞退燒，姑娘話再燒到咁高最好去醫院
18:00 額探36點幾，退燒退得好快，哥哥個人都精神返少少
23:30 哥哥又嘔，額探39，食退燒藥，佢話嘔完有野卡住係喉嚨，好辛苦，大叫，我同老公決定帶佢睇急症
00:00 去到急症室，耳探38.5，分流屬緊急，等咗半個鐘就見醫生，但個醫生好求其，只係話佢感冒，叫佢驗小便，然後又係開普通退燒同收鼻水藥
6.6.2017（星期二）
仍然係發燒，食咗退燒藥，退咗一陣又燒返，經常都係38.5左右，半夜都要叫醒佢食退燒藥
7.6.2017（星期三）
繼續發燒
16:30 又發到39度，同老公決定再帶哥哥睇另一個醫生
17:00 診所耳探39.4，醫生話咁高燒，已經燒咗幾日，試吓食抗生素，另外開咗隻退高燒藥
18:00 仍然超過39，試吓用肛塞（上次好快退燒），但已經冇咩效，仍然係38點幾
8.6.2017（星期四）
08:40 食第一次抗生素，仍然係38.5，但有時個人都精神
14:40 食第二次抗生素
20:40 食第三次抗生素，仍然係未退燒
9.6.2017（星期五）
第二日食抗生素
18:45 仍然係38.5，媽媽餵哥哥食咗普通同高燒藥（姑娘話係兩種一齊食）
21:00 開始退燒，個人都活潑返
23:00 耳探35.8，好驚，係唔係d藥太勁，個體溫繼續跌落去，會唔會死架？
10.6.2017（星期六）
08:00 耳探36點幾，仍然係冇燒，已經有12個鐘冇食過退燒藥，似乎病情已經受到控制，不過雙眼仍然紅紅地，多眼水，仲變咗大細眼
09:15 繼續第三日的抗生素治療
14:00 天氣酷熱，去完小一入學面試返屋企，仍然冇燒，由於佢兩個好鍾意玩爸爸新買的耳探，所以順便探埋細佬，37.3，冇燒，但感覺佢個身比平時熱，媽媽進入戒備狀態
17:00 細佬瞓醒晏覺，耳探37.4，唔算發燒，媽媽再探吓自己，都37.2，應該係天氣熱啫，唔好嚇自己
19:00 幫孖寶沖完涼，哥哥耳探仍然係36點幾，退燒已經差不多24小時，媽媽正式宣布：哥哥好返喇！輪到細佬，耳探37.7，微燒，大鑊，細佬似乎都中招！
20:00 細佬耳探37.9，體溫一直上升，已經好肯定細佬將會同哥哥早幾日的病情一樣，媽媽問佢有冇唔舒服，佢話冇，仲好精神，跳跳扎扎，但媽媽同佢講：細佬呀！你今晚可能會嘔！你唔舒服要同爸爸媽媽講
21:00 細佬耳探38.2，成個人呆晒，冇晒精神，話個胃好頂，又話最衰爸爸迫佢飲咗好多水，話口未完，已經嘔到噴泉咁，成塊面紅晒，標冷汗，佢話好頭痛
21:30 媽媽一直坐係細佬床邊，幫佢按摩頭頭，額頭敷毛巾，耳探38.4，但爸爸話要俾佢燒吓，等佢個身體自己製造抗體，對抗d病毒
23:30 耳探仍然係38.4，未有再上升，唔似得哥哥咁越燒越高
11.6.2017（星期日）
05:00 耳探37.9，工人姐姐話細佬嘔，但只係嘔咗少少，佢尋晚嘔到噴泉咁，應該都嘔晒
細佬成朝早都維持係38點幾度, 所以都冇俾退燒藥佢食, 但下午開始燒到上39度, 所以都係要食退燒藥, 食咗就退燒, 但4-5個鐘後又燒過39度
12.6.2017（星期一）[三號風球幼稚園停課]
今日爸爸媽媽都要返工, 惟有靠嫲嫲睇住細佬, 佢話細佬都精神
07:00 耳探超過39度, 要食退燒藥
13:00 都係超過39度, 再食退燒藥
18:45 都係高燒, 今次食退高燒藥 (只係高燒藥, 冇同普通退燒藥一齊食, 驚好似哥哥咁, 變咗失溫), 希望可以捱耐D
細佬雖然發緊高燒, 但都算有胃口食野, 媽媽都冇咁擔心!
13.6.2017（星期二）[三號風球幼稚園停課]
02:00 爸媽校咗鬧鐘起身睇細佬, 又係燒到過咗39度, 爸爸的佢起身食藥
10:00 由於細佬都燒咗幾日, 爸爸媽媽決定都係要帶細佬去睇醫生, 食抗生素
10:50 燒到39.6度, 就算一陣去睇醫生, 都食咗退燒藥先啦! 咁燒法, 我驚燒死細佬呀!
11:10 去TKOP睇兒科專科, 簡值要俾10個讚呢個女醫生, 好專業, 好細心, 講解得好詳細, 佢話細佬咁高燒, 又冇咩明顯病徵, 都似係病毒, 唔係細菌, 但佢覺得都係要開抗生素, 因為通常燒咗幾日(佢形容為打仗), 小朋友身體已經虛耗咗好多, 呢個時候, 身體裏面潛在的細菌可能乘機出動攻擊個小朋友, 所以食抗生素, 係抑制住呢D細菌, 等佢個身體可以集中火力打呢場病毒仗, 我覺得佢講得好有道理!
13:30 細佬食第一次抗生素, 大喊, 好飽, 食唔到, 好難食, 好辛苦, 情願打針都唔想食, etc. 爸爸媽媽氹咗佢好耐, 最後要用針筒唧入去佢個口, 佢先至食到
18:30 又燒到39.4度, 都係要食退高燒藥, 醫生開呢隻, 好味道, 細佬好like
19:00 已經退到38.9度
21:45 細佬臨瞓要再食多次抗生素, 又係聲淚俱下, 其實工人姐姐都話呢隻抗生素, 佢係中東見過, 中東的小朋友都係極力反抗唔肯食, 所以估計呢隻野應該都幾難食
14.6.2017（星期三）
02:00 爸媽又係校咗鬧鐘睇細佬, 耳探37.8, ok喎! 唔駛食退燒藥, GOOD!
07:30 耳探仍然係37.8, 太好喇! 細佬似乎已經退咗燒!
08:35 細佬留係屋企休息, 媽媽帶哥哥返學, 哥哥經過今次大病一場之後, 成個人瘦咗一個碼, 身體變成一張紙咁薄, 個頭就變咗超級倒三角螳螂頭, 真係慘不忍睹!
細佬全日都冇燒!
15.6.2017（星期四）
細佬仍然冇燒, 所以今天可返學 (因為要照學生相)
細佬燒咗4日, 比起哥哥燒咗6日, 細佬的抵抗力應該好D, 同埋細佬患病期間都有胃口食野, 所以都唔係瘦咗好多, 不過, 兩個隻眼都有D紅(哥哥左眼, 細佬右眼, 哥哥仲變咗大細眼添), 似乎個不知名病毒仲未被消滅晒!
後記@17.6.2017
哥哥仍然係大細眼(左眼有事), 早上睇兒科, 原來係細菌感染, 眼肚同眼皮內都有細菌form咗D membrane, 兒科醫生叫我地去睇眼科, 因為要特效藥, 下午去睇眼科, 醫生幫佢清咗D membrane, 哥哥喊到拆天, 要滴7日抗生素同類固醇, 臨瞓仲要揤眼膏。
後記@18.6.2017
細佬7am走過黎我地房, 話: 媽媽! 我想嘔! 然後果朝嘔咗4次, 又肚痛到要攤係Sofa, 慘慘豬!
之後果幾日, 哥哥同細佬都輪流肚屙......
今次病毒感染, 足足搞咗3星期, 唉!
8月尾去旅行, 到時要健健康康呀!
沒有留言:
張貼留言