情緒班

話說哥哥的情緒比較唔穏定, 經常爆喊, 瞓係地吓典, 歇斯底里, 撞傷眼角, 撞淤塊面, 爸爸媽媽好多時都頂唔順鬧爆佢, 或者車巴佢...... (哥哥, 對唔住, 爸媽見到你咁, 都控制唔到我地自己)

為咗解決呢個情況(應該冇得解決, 只係希望每次可以處理得好D), 爸媽帶咗然然去做評估(結果: 正常! 睇唔到有咩行為問題喎!), 真係啤一聲!

但都拎住封轉介信去排咗政府兒童發展中心, 又去問吓私人機構有冇D咩課程可以俾爸媽或者然然上吓。問咗兩間(都係學校老師介紹), 姑娘聽我描述個情況, 都話然然適合遊戲治療, 即係同個治療師係間房入面, 一對一, 用遊戲去瞭解然然的內心世界, 問題所在, 再針對個問題睇吓有咩方法解決。不過, 兩間都要排隊, 唔知排幾耐(似乎香港都好多小朋友有行為問題)

其中一間係觀塘(近屋企), 有情緒社交小組, 大概六個小朋友一組, 一個單元有六堂, 每堂一個鐘, 由社工姑娘會教小朋友咩係情緒同埋點樣正確表達自己的情緒。於是就幫然然報咗, 每個星期六1:30-2:30去上情緒班。

六堂的情緒班好快就上完, 然然的情緒冇乜太大改善, 不過, 有一至兩次, 然然好唔開心, 正想爆喊的時候, 爸媽見到佢嘗試去忍住唔喊, 雖然仍然係一邊落淚, 一邊話自己好唔開心, 但對比平時喊到瞓地, 撞到塊面淤咗, 已經好大進步! 爸媽都好欣賞, 當然要即場讚佢同安慰佢啦!

希望然然可以繼續努力, 用正確的方法去表達情緒!

不過, 最近一兩個月, 爸媽發覺細佬易喊咗, 似乎係學咗哥哥, 因為佢見到哥哥每次喊, 媽媽都會同哥哥講: 啊! 媽媽見到你好唔開心喎! 啊! 哥哥好唔開心! 啊! 知道! 哥哥因為咁咁咁, 所以好嬲! 啊! 哥哥想咁咁咁, etc. (某某兒童行為治療專家教的) 結果, 細佬就將媽媽呢D說話同反應, 睇成係媽媽認同哥哥的扭計行為, 於是, 佢又有樣學樣, 一有少少唔如意就大喊大叫, 唉! 我應該點做? 我仲可以點做? 爸爸惟有同細佬解釋, 乜你見唔到哥哥喊果時, 我車巴佢咩? 你以為扭計喊我會錫佢咩? 喊係冇用架! 爸爸媽媽唔會鍾意, etc. (希望細佬明白啦!)

不過, 我自己有時都會回想返, 哥哥喊, 同細佬喊, 我的反應有冇分別?! 答案係: 有! 原來哥哥喊, 可能因為我一早預咗, 有心理準備, 所以我會好有耐性咁, 同佢講以上專家教的對白。至於細佬, 可能因為我一向都認為細佬好明白事理, 當佢突然蠻不講理咁爆喊扭計, 我就會怒火中燒, 鬧爆佢, 唔會好似對哥哥咁樣咁有耐性。(細佬仔, 對唔住啊! 媽媽真係要認真檢討一下!)