小一面試大作戰

話說一年半前仲係超大B幼稚園面試大作戰, 一年半後, 又要面對小一面試大作戰, 生於現今呢個年代的小朋友, 好慘!

作為一個唔想做怪獸家長的媽媽, 只希望孖寶能夠有一個快樂的童年, 但又唔想孖寶小學畢業連26個英文字母都未識, 要係中間取得平衡, 其實真係唔易, 有時都唔知自己做得啱唔啱, 或者自己的選擇係唔係真係適合孖寶。

其實, 媽媽一直都冇諗過要考咩私校、直資, 其實當初決定放棄做大B讀民生, 繼續留係屋村的學券幼稚園, 就係諗住最緊要愉快學習, 將來入返一間唔好太差的津校就可以了, 所以冇學樂器, 冇學國語, 冇學劍穚英語, 冇學唱歌、跳舞、朗誦、台拳道、游水, 更加冇參加咩咩咩名師面試班...... 不過, 老公突然話都想俾佢地試吓考私校 / 直資, 橫掂只係俾報名費$150, 當去見識吓 / 玩吓 / 買個機會, etc.

為咗唔好俾孖寶有壓力 (媽媽都唔想有壓力), 我同老公係唔催谷、冇預備的情況吓, 就幫孖寶報咗一間私校, 一間直資, 到面試當日都冇同佢地講係去面試, 只係去小學參觀吓, 同埋扮上堂, 同老師玩遊戲, etc.  哥哥好單純, 以為好似去上畫畫班咁, 至於細佬, 可能佢俾較醒目, 去咗一次, 佢已經話唔想再去, 都冇野玩既, 唔鍾意, etc. 爸爸媽媽惟有同佢講, 咁你想唔想做大哥哥升讀小學先? 咁要去睇吓你鍾唔鍾意間小學嘛!

無論係私校 / 直資, 面試當日都係超多人, 其實咁多人, 學校點揀人呀? 相信都係大抽奬, 只要你小朋友表現唔係太差, 又或者除非你有心谷, 讀咗咩咩名師面試班, 表現好凸出, 令老師印象好深刻, 我相信孖寶兩者都唔係, 平平無奇, 所以都係睇彩數, 或者合唔合眼緣!

由於真係太多人 (幾千人先至揀得個100幾個), 所以爸媽完全冇期望, 下一步就係參加教育局的第一階段自行派位同第二階段的大抽奬, 聽咗學校舉行的小一選校簡介會, 對個遊戲的玩法明多咗少少, 總之有心儀小學就要1-1-1, 到時真係派唔到, 都有機會可以叩門面試, 多個機會咁囉!

不過, 媽媽都係果句啦! 如果係叻既, 讀咩學校都叻, 媽媽細個讀果間小學都係九流小學之嘛, 咪一樣年年考第一, 升到全沙田Number 1中學, 會考有25分(1A5B), 仲要係文科喎! (通常理科先至容易攞A), 之後讀埋大學(中大)同兩個碩士(港大), 所以根本唔關讀邊間學校事!

讀名校唔會令你個仔變叻D, 因為通常名校只會收叻人, 你唔叻, 夾硬讀名校, 一係出去補習, 谷到佢變叻D (所以變叻咗唔係因為讀咗名校), 一係就等俾人踢出校啦!


後記:

5月in咗一間直資, 6月in咗一間私校, 7月中知到結果, 兩間都唔收! 老公話因為佢地係細B, 學校有得揀又點會揀細B呢? 佢兩個表現又唔係特別出眾! 老公話算喇! 唔玩呢個咁唔公平的遊戲喇! 嘥晒D錢(報名費每位$150), 而家叠埋心水參加大抽奬!