然兄逸弟: 九州親子之旅2017

2017.04.11 (星期二)

黎咗日本3日, 不斷留意日本氣象廳的天氣預報, 尋日同今日都會落雨, 似乎已經係事實, 不過, 希望在明天, 因為氣象廳預測之後3日都會係晴天, 真的嗎?

由於落雨令天氣特別凍, 所以今日幫孖寶著返件厚D的衫(之前冇諗過咁凍, 同埋諗住用"洋蔥式"著法, 所以冇帶厚底衫俾孖寶打底, 惟有著多幾件外套+風褸)。

又係未夠8點起咗身, 8:30落去食早餐, 雖然呢間酒店只係盛惠8,000円(包早餐), 房間設備亦一般, 但酒店大堂好靚, 食早餐的地方亦好有情調, 自助餐式的早餐, 竟然有大酒店般的廚師即場炒蛋, 我見佢本來諗住收工, 但見我問佢係唔係有炒蛋, 佢即時係雪櫃拎返D材料出黎, 炒咗兩碟俾我, 仲親自拎埋去我地個位, 10個讚!

媽媽出去叫廚師炒蛋

因為尋日趕唔切去九州鐵道博物館, 所以今朝去返(好在我今次安排D行程好鬆動, 可以調黎調去都冇問題!)

早上10:20去到, 泊好架車, 行入去, D雨冇尋日咁大, 但都幾凍吓! 入場券成人300円, 3歲以上小童150円, 一家四口盛惠900円, OK啦! 睇咗20分鐘火車, 續架車上去睇吓, 坐吓, 搞吓人地D野, 影吓相, 之後就入去博物館的本館參觀。

先黎一張一家四口自拍

張入場券好靚

研究咗好耐, 竟究瞓樓上係點樣爬上去呢?

原來條鐵可以開條梯出黎, 勁! 今次真係識條鐵!

入到本館, 老公記得有得玩揸火車, 由於好少人, 等咗一個就到我地喇! 孖寶例牌爭住要玩先, 媽媽打咗個眼式俾爸爸, 爸爸話今次細佬先, 因為哥哥成日都第一, 哥哥當然即場爆喊+發爛啦! 媽媽惟有抱佢離開現場, 同佢睇吓有冇其他野玩。細佬玩完, 輪到哥哥, 哥哥有得玩就笑返, 仲好開心!

細佬仔扮火車司機, 揸火車

哥哥呢個笑容好嬌俏

原來11:30有火車Show睇, 由於未夠鐘, 孖寶又係Playground入面玩(好欣賞日本人, 所有地方都整個playground俾小朋友玩, 其實有幾難呢? 幾張地墊, 少量玩具之嘛!)

又有兒童playground

媽媽趁孖寶玩緊, 就去紀念品店睇吓野, 多謝老公幫手睇住孖寶! 睇野期間, 竟然俾媽媽發現鐵路造型的餐盤(搵咗好耐, 由沖繩, 搵到大阪, 再搵到黎九州, 終於俾我搵到喇!) 餐盤一個盛惠1680円(未計稅), 雖然貴咗少少, 但好難搵, 一於買兩個俾孖寶, 希望可以鼓勵佢地食多D野, 唔好咁細粒!

Made in China 的火車造型餐盤

睇完火車Show, 諗住帶孖寶去揸小火車, 點知去到, 職員話落雨唔開, 爸爸好失望! 因為佢好想帶孖寶黎揸小火車, 呢個係重點行程黎!

到此一遊相

12:15離開, 爸爸話揸車落別府先, 吓? 要差不多2個鐘頭車程喎! 你諗住唔食野? 爸爸好專心咁set GPS, 全完聽唔到媽媽內心入面的慘叫聲!

由於呢架車個GPS係廢既, 經常老點, 爸爸被誤導向北行(別府係南面喎), 過咗橋, 去咗下關, 媽媽話咁不如去唐戶市場買兩碗魚生飯, 係車度食啦! 正呀!(媽媽的正向思維又發揮作用喇!)

到達唐戶市場, 媽媽落車入去睇吓, 原來已經關門大吉! 惟有再行入去D手信店舖睇吓, 順便買兩樽撈飯粉(以表示自己黎過)! 問咗店員, 二樓有食肆, 原來係食迴轉壽司, 冇外賣, 同埋勁多大劣人, 都係快D走人!

沿途經過一間快餐店寫住Ringer Hut, 之前係香港見過, 係沖繩AEON MALL個food court都食過, 就泊低架車, 入去食咗lunch先(因為已經係下午1:45喇!) 老公叫咗個特大湯麵+餃子, 仲有炒飯, 細佬仔好like個炒飯, 唔夠食, 搞到老公要買多個。

例牌影吓食乜

食完飯, 下午2:30起程去別府, 咁晏, 即係又唔駛去動物園啦! 聽日囉! 反正聽日好天, 有陽光, 去動物園 + Kids Driving School, 就啱晒! (媽媽的正向思維!)

架車行咗1個鐘, 可能飲得太多水, 媽媽開始好急, IC的路牌指示又唔清楚, 搞到miss咗個道之駅, 最後一家四口惟有係路邊解決(註: 係橫風橫雨中)。乜聽日真係會好天咩? 仲話0%會落雨, 真唔真呀? 而家仲係橫風橫雨喎!

再過咗半個鐘, 終於都見到城市喇! 雨停咗, 見到彩虹呀! 係完整一條彩虹呀! 孖寶第一次見到彩虹! 我地落車影相!

彩虹呀!

停低架車係便利店門口, 落車睇彩虹!

神呀! 祢竟然用咁靚的彩虹同世人立約, 好浪漫呀祢!

下午4:30到達酒店check-in, 間房好大啊! 仲有3張床(特登book, 希望瞓得舒服D!)

孖寶見到咁多張床, 好興奮!

冇落雨喇! 酒店間房可以望到別府市景

爸爸話佢呢兩日其實都有D唔舒服, 吓? 咁大獲? 你仲要揸車喎! 你好重要! 於是, 由媽媽幫孖寶沖涼先, 然後一家四口去酒店3/F, 爸爸去浸溫泉, 媽媽睇住孖寶係playground度玩, 之後就輪到媽媽去浸溫泉, 爸爸睇住孖寶。爸爸仲上房拎咗D散錢落黎同佢地玩機動遊戲, 媽媽係更衣室都聽到孖寶的笑聲!

簡單一個playground, 佢兩個玩得好開心

晚上7:30揸車去街口個商場--You me搵野食, 搵到間餐廳食定食(媽媽最like), 爸爸叫咗個三餸飯, 媽媽叫咗個滑蛋吉豬飯, 另外叫咗個烏冬俾孖寶。食飽飯行一陣商場, 爸爸見到有雪糕店, 提意食雪糕, 叫咗個Chocolate Cone加大, 孖寶爭住食, 好似雀巢入面D雀仔等緊媽媽餵嘢食咁, 食飯又唔見佢地個口擘得咁大喎!