九州親子之旅2017 - Day 5

2017.04.13 (星期四)

一早起身, 仍然係陽光普照, Great!

由於時間尚早, 我同老公趁孖寶未起身, 緊係要一齊浸吓溫泉啦! 冇咗孖寶係度搞搞震, 終於可以享受二人世界喇! So Sweet!

由於book咗8點食早餐, 孖寶7:45仲未醒, 惟有叫醒佢地, 雖然有少少扭計, 但佢地聽到爸爸話, 早D食完早餐再返上黎浸溫泉, 佢地就乖乖合作。早餐好似都係尋晚張枱, 又係好豐富, 好decent! 酒店仲送咗一人一碗飯俾孖寶, 姨姨見孖寶咁kawaii, 仲主動加送每人一包撈飯粉, 孖寶基本上食飯就得(養佢兩個好慳飼料, hoho!)

好豐富的日式早餐

哥哥唔喊唔扭計時, 成日笑, 係sweet boy!

食完早餐, 返上房, 爸爸同孖寶浸溫泉, 媽媽執喼, 唔知點解咁多野執, 同埋只係得我一個人執!

孖寶好like玩水

9:30 Check-out, 今日行程: 湯布院溫泉街買B-Speak蛋糕 --> 九重"夢"大吊橋 --> 阿蘇火山(原來12月爆咗封山, 到而家都唔上得去) --> ASO FARM 饅頭屋 (原來前晚ASO FARM send咗個email俾老公, 話日式房間, 兩大兩細, 合共要48,800円, WHAT? 我地book果時係明明係36,000円架喎? 日式房間貴D架? 點解佢兩個要每人俾8,000円? 佢兩個都唔食野, 又唔浸溫泉! 我兩個人住, 同四個人住, 都係住一間饅頭屋咋喎, 四個人住, 唔通你俾兩間屋我呀? 痴線! 48,800円, 我唔好住多晚湯布院私人溫泉?! 我同老公決定到時再去同酒店職員理論, 費是佢話我地冇出現, 收我地100% charge, 我地起碼叫做有黎過check in, 只係你臨時改價錢, 我地最多咪cancel唔住囉!

唔好因為咁樣影響心情, 我地今日要開開心心咁玩咗先! 揸車去溫泉街, 泊咗係便利店的免費車位, 再行過去, 條街好似同以前唔同咗, 多咗間超市同好大個停車場, 早知泊超市個停車場仲近! 媽媽第一時間就見到上次間龍貓店, 即刻走入去睇吓, 求其買咗對龍貓襪俾自己(今次去鄉下地方, 戰利品少得可憐)。

龍貓店

沿途見到大部份遊客都拎住個B-speak袋, 我地上次冇買黎食, 今次一場黎到, 買返個囉! 去到門口已經有好多人排緊隊, 但條隊都算郁得快, 門口個牌寫住, No More Small Size! 咁即係焗住要買Large Size啦! 唉! 是但喇! 出得黎玩就唔好慳! Large Size一個好似都係1400幾円啫, 加上我地今次有四個人, 一定食得晒! 孖寶話要Chocolate味, OK!

去supermarket買D野飲, 10:45離開溫泉街, 向九重"夢"大橋進發, GPS顯示要45分鐘(黎九州呢D鄉下地方有一個好處, 就係唔會塞車, 我地通常都會比GPS顯示的時間, 早15-30分鐘到達, very good!) 開車冇幾耐, 孖寶就瞓著咗, 又瞓? 尋晚做賊?

由於孖寶瞓咗, 加上個B-speak蛋糕要即日食完, 我同老公就係途中搵咗個靚景位, 泊低架車, 切開個蛋糕, 仲要配埋阿蘇4.5牛乳, 慢慢嘆! (不過好大風, 個蛋糕又好似一陣風咁, 好驚會被吹走, 所以都係返上車食好D)。

美景 + 蛋糕 + 4.5牛乳

中午12:15, 到達九重"夢"大吊橋停車場, 泊咗架車, 叫醒孖寶, 俾佢地食埋兩件蛋糕先, 佢兩個超級like, 爭住食, 爸爸叫佢地輪流一人一啖, 佢兩個食完就自動換位, 動作超快, 好搞笑! (媽媽拍咗video)

孖寶好開心咁食蛋糕

入場費成人500円, 小學生以下免費。雖然陽光普照, 但行出條橋度, 真係好大風, 好很凍呀! 孖寶見咁大風, 覺得好好玩! 媽媽就不停叫救命, 好凍, I don't want! 佢兩個就笑到卡卡聲!

雖然好曬, 但現場超級凍

難得同老公合照

老公話縮埋咁影相, 以表示當時好大風, 好凍!

下午1:50離開, 由於之前隊咗個蛋糕, 加上爸爸買咗朱古力包俾佢地係車食, 基本上大家都唔肚餓, 所以可以唔駛搵野食! 由於阿蘇火山封山, 冇咗個行程, 於是爸爸今早上網搵咗另一個行程 -- 去公園瀡滑梯! 咁都係一個行程? 係! 冇錯! 只要孖寶開心, 就值得去!

下午3:30, 終於去到, 個公園係阿蘇市附近, 有一條3層高的滑梯, 爸爸泊低架車係停車場, 孖寶離遠見到條滑梯, 開心到大叫!

哥哥就係瀡完呢條滑梯, 企起身跳落黎, 仆低咗!

一向細膽的細佬仔, 挑戰繩網

玩咗1個鐘, 細佬俾個滑輪打到個額頭紅咗, 哥哥係滾軸滑梯度跳落黎, 失平衡, 仆損個鼻(好在冇仆甩隻牙, 爸爸話仆甩咗仲好, 唔駛煩搵牙醫剝), 不過, 佢兩個玩得好開心, 跑跑跳跳, 爬高爬低, 受傷, 爆喊, 抹乾眼淚, 再玩過, 小朋友的童年就應該係咁!

公園隔離條河好靚, 現場其實有唔少櫻花樹, 但影出黎唔覺眼

下午4:30, 係時候要走喇! 要去ASO FARM理論呀! 搵咗好耐, 明明係ASO FARM停車場, 但見唔到Reception Counter, 原來要行秘道, 過隧道去另一邊, 再行咗唔知幾耐先至見到Reception, 然後由於我地book咗Dream Zone, 所以又要行去另一個counter, 到處所見, 可以用頽垣敗瓦黎形容, 自從舊年4月熊本地震一年以來, 都未整返好, 我同老公講, 黎到呢度, 我對呢間酒店的印象已經跌到負分, 但細佬仔仍然對饅頭屋充滿憧景!

去到Dream Zone個Counter, 個職員仍然話要收我地48,800円, 因為4歲以上要收每位8,000円, 兩個小朋友無啦啦要俾多16,000円, 同佢講, 我兩個仔唔食野, book果時已經講咗, 佢都唔理, 我惟有話佢兩個3歲, 個職員call佢老細, 講咗一大輪, 話可以做返36,000円個價俾我地, 又不停叫我地拎個passport出黎俾佢影印, 點知佢一睇哥哥個passport, 佢話小朋友4歲喎! 要收8000円一位, 一係叫我地用返36,000円的價錢, 住返village zone, 我明明book果時係36,000円住Dream Zone, 住village zone只需26,000円。我唔想再同佢理論! 我話CANCEL! 之後一家四口轉身走人!

行咗出黎已經4:45, 老公即時上網睇吓附近有咩酒店, 搵到一間係附近的, 車程10分鐘左右, 睇相好似都企理, 盛惠17,300円, 是但啦! 起碼今晚唔駛瞓街先啦! 於是一家四口又行咗好耐好耐, 經過頽垣敗瓦, 返去停車場, 上車走人! 慶幸最終決定唔住呢間酒店, 推喼都推死! 老公話早知係咁既樣, 唔book呢間野添呀!

揸咗8分鐘左右, 轉咗入去個樹林入面, 沿車路一直上山, 最後去到一個好似法國莊園的地方, 就係我地今晚間酒店喇! 外觀不過不失啦! 冇上網張相咁靚! 是但啦! 正常酒店一間囉!

入到去counter, 同職員講, 我地15分鐘前先至book, 佢地竟然有record, 勁! 原來個plan又係唔包小朋友的早餐, 每位小朋友要另外俾900円, 盛惠1,800円, 算啦! 都要俾, 冇辦法! 我地被安排入住2樓的雙床房, 面對高爾夫球場, nice view! 不過, 間房就真係......幾殘吓! 不過, 媽媽即刻叫自己要正面D去諗, 幾好丫! 兩張床都夠瞓呀! 仲有張sofa擺吓野, 雖然殘咗D, 乾淨企理就得啦! 同埋慳咗好多錢喎, 今晚可以去食豪D! hoho... (我不斷用正向思維叫自己開心D, 但老公就不停咁話間房好殘 x N次)

間房的確係幾殘

同孖寶沖咗涼, 晚上6點揸返架車出去, 搵野食, 附近只有一間Joyfull餐廳, 好! 我地今晚就係呢度食啦! (媽媽不斷運用正向思維) 老公叫咗個燒汁魚定食, 我叫咗個炸雞扒定食, 另外叫咗個蛋包飯俾孖寶。食完飯, 媽媽提意叫杯雪糕做飯後甜品, 因為住唔到饅頭屋, 要氹返自己同孖寶開心 (正向思維again!) 孖寶話要食朱古力雪糕, OK! 爸爸話不如叫兩杯, 吓? 咁又唔駛咁激動, 兩杯恐防食唔晒喎!

出黎食嘢, 要開心D!

孖寶點咗呢個朱古力雪糕

由於真係四野無物, 食完飯去便利店買咗D零食(又係要黎氹自己同孖寶開心的!) 飲品, 返酒店lu。由於酒店座落於荒山野嶺, 所以泊低咗架車係停車場, 抬頭一望, 嘩! 好多星星呀! 孖寶第一次見到咁多星星! (雖然住唔到饅頭屋, 能夠睇到星星都算係另一個得著, 能夠一家人一齊睇星星, 幸福就係咁簡單!)

現場睇, 係好多星星架!

今晚好早返到酒店, 爸爸開youtube俾孖寶睇, 食吓零野, 飲吓野, 好快就到覺覺豬時間。

士多啤梨味乳酪, 冇藍莓味咁好食

由於酒店張床好硬, 爸媽都覺得瞓得好辛苦, 加上剛剛享受完豪華的湯布院溫泉酒店, 今晚確實有點由天堂跌落凡間(又不至於地獄)的感覺!

聽日會繼續陽光普照, 我地會揸車去高千穗, 搭天空小火車同划艇仔, 好開心啊! (媽媽不斷用正向思維安慰自己!)

Day 5 完