然兄逸弟: 九州親子之旅2017

2017.04.12 (星期三)

今日已經係旅程的一半喇! 落咗兩日橫風橫雨, 又凍冰冰, 今朝一早打開窗簾, 真係有陽光呀! YEAH! 太好喇!

早上8:30落去食早餐, 雖然酒店包咗兩個成人的早餐, 但原來帶埋小朋友去酒店3/F食自助早餐, 小朋友要另外每位850円, 吓? 成1700円(HKD120)俾佢兩個食早餐? 佢兩個練仙架喎, 都唔食野! 職員提意我地落去食日式早餐, 可以share, 小朋友唔駛另外俾錢。落到去, 日式餐廳好decent, 職員話早餐券包兩個套餐, 我地話OK, 小朋友share我地D野食就可以了! 個日式早餐一D都唔求其, 好豐富, 好decent, 好在冇去食自助早餐啫, 食黎食去都係炒蛋牛角包...

酒店包的日式早餐, 好decent!

食完早餐, 好滿足, 返上房執埋行李, check-out, 走人! 本來今日plan咗去搭別府Ropeway, 之後去九州自然動物園, 但由於尋日冇去到Kids Driving School及血之池地獄(已放棄), 所以今日行程改為早上去九州自然動物園, 下午去城島高原遊樂場的Kids Diving School。

Check-out後, 係酒店大堂等爸爸揸架車黎

細佬好想搣晒個喼上面的保護膠膜

早上10:30去到九州自然動物園, 酒店送咗2張入園券, 但如果要坐Jungle Bus餵獅子就要另外俾錢, 成人每位1,100円, 4歲以下小童免費, 佢兩個咁細粒, 連K1都高過佢地, 即係未夠4歲啦!

Jungle Bus 11:00開車, 趁有少少時間, 去廁所, 同架Jungle Bus影吓相先, 雖然有陽光, 但可能位處高原地區, 都比較凍, 媽媽著咗件薄牛仔褸咋! 夠鐘開車, 原來無論買幾多張成人飛, 都只係獲發一盤食物, 上車遇到個香港家庭, 大家同聲同氣, 就一齊坐啦! 成架車大概可以坐30人, 分左右兩排, 各自面對窗口, 所有窗口都有鐵絲網, 唔伸隻手指出去的話, 基本上係好安全。有說明書, 教你乜野動物餵乜野食物, 車上有鐵鉗, 用黎夾D食物出去。

孖寶與Jungle Bus合照

又黎一家四口自拍

餵動物的說明書

唔該晒港人家庭的爸爸(姓"英"的, 好特別), 幫我地影相

Jungle Bus 駛入第一個園區, 係鹿仔區, 好多鹿仔包圍住我地架車呀! 仲不停咁衝擊我地架車, 發出聲响! 之後就係獅子區, 嘩! 第一次咁近距離睇獅子, 原來D獅子俾人cut咗對尖牙, 好慘啊! 但唔惡的獅子原來好可愛! 之後就係長頸鹿, 大象, 駱駝, 不知名動物(全身灰黑長毛, 好污糟咁樣), etc.

媽媽同哥哥一齊餵獅子

獅子個樣好可愛

坐Jungle Bus兜一個圈大概50分鐘, 落車後, 爸爸話再揸車入去兜一個圈, 因為頭先架Jungle Bus係磨砂玻璃, 跟本睇唔清楚窗外的動物。爸爸媽媽好興奮, 不停咁影相, 不過, 孖寶一向對動物冇乜興趣(包括屋企隻Nick Nick), 所以嚷著要走, 尤其細佬, 佢話想快D走, 佢想去Kids Driving School。

揸返架車入去再睇過, 今次睇得好清楚

D動物唔駛困係個籠入面, 可以自由活動, 感覺良好

去咗騎小馬, 哥哥最鍾意新奇刺激的玩意, 佢話好想騎馬仔, 至於細佬仔, 無論爸媽點樣氹佢, 佢都話唔想騎, OK! 你今晚冇騎馬仔的相睇架喇! 因為你冇騎到! 騎馬仔行一小圈盛惠500円, 哥哥好開心, 笑得好靚(女)!

哥哥對動物好有愛心

我好鍾意呢幅相, 哥哥笑得好靚, 好自然

(如果可以P走後面對情侶就更好)

下午1:10到達城島高原遊樂場, 泊好車, 行入去, 雖然有陽光, 但因為高原地方, 好大風, 好很凍呀! 由於唔諗住玩晒成個場, 所以只係買咗入場券。然後第一時間衝去Kids Driving School。去到Counter, 要填表登記, 之後要影相, 每個小朋友會有一張駕駛執照, 仲要去上堂。不過, 原來2:10先至開始上堂, 仲要等成45分鐘, 所以就去食咗lunch先喇!

老公影到好似本雜誌封面咁, 勁!

實在要讚一吓日本的樂園, 樂園入面的餐廳, 價錢同外面差不多, 唔會好似香港D樂園咁, 150蚊一碗叉燒飯! 嬲! 我地叫咗3碗烏冬, 好似都係2400円左右。食完麵, 去完廁所, 原來已經2:10, 即刻衝去上堂。其實上堂只係播一段有關駕駛安全的卡通片, 一班大約有30個小朋友, 原來好多香港人。上完堂, 可以正式去攞車揸喇! 架車係由職員分配, 冇得揀! 細佬架車銀色, 哥哥架車紅色。爸爸媽媽可以坐隔離, 部車就由小朋友控制, 個車場都算大, 有油站, 餐廳, 迴旋處等場景, 佢地玩得好開心!

小朋友, 唔該你專心D上堂!

上完堂, 可以去揸車喇!

今次輪到爸爸做乘客

每人獲發駕駛執照

2:50夠鐘玩完, 佢地話要再玩多一round(其實媽媽預佢地玩多兩round), 由於實在太大風太凍, 媽媽吹到好頭痛, 爸爸都話頂唔順, 所以玩多咗一round就走人。

孖寶最鍾意扮去油站入油

好認真咁玩

今日的行程已經finish, 又係返酒店的時候, 今晚酒店係旅程的重點 -- 湯布院溫泉酒店! 今次住返上次間酒店, 因為感覺良好, 比較新淨(其他殘舊酒店都差不多價錢, 緊係揀間新淨D既!) 我地個plan係西式房間, 房內有私人風呂, 一家四口齊齊浸, 幾時浸都冇問題! 職員幫我地拖埋行李, 帶我地去116號房, 一打開房門, 嘩!!!!!!!!!!!!!!!!!!!!!!!!!!!!!!!!!!!!!!!!!! 好大, 好靚, 好豪華啊!!!

間房好靚啊!

老公話點解仲靚過上網睇相架?! 孖寶兄弟見到兩張雙人床, 興奮到即刻走上去跳! 私人風呂都唔算細, 外面仲有個私人庭園添! 廁所係房的另一邊, TOTO全自動坐廁, 老公話想買個返屋企, 真係好正! 洗手間係廁所外面, 有兩個洗面盤, 有齊男女洗面護膚用品, 好貼心啊!

個私人風呂都OK

趁孖寶食餅同油顏色的時候, 我叫老公一個人去浸咗先(因為佢呢幾日話有D唔舒服, 浸吓個人舒服D), 等陣再同孖寶去浸, 我唔浸住喇! 我要幫孖寶抹身著衫(同埋影出浴照)嘛! 孖寶有水玩, 開心到唔捨得出返黎! 不過, 小朋友皮膚薄, 唔可以浸咁耐架! 最後輪到媽媽一個人浸, 好C服啊!

Book咗7點食晚飯, 原來搞搞吓已經6:50, 落去食飯, 好有親切感, 因為係第二次住呢間酒店, 又係食返上次個set -- 豐後牛滿點。孖寶話好肚餓, 點解冇野食, 因為前菜係刺身, 怪味餸同sake, 冇樣野啱佢地食, 好在後尾有菇菇飯食, 又有燒牛肉, 細佬食晒媽媽成碗菇菇飯, 勁! 今餐食得超飽, 食埋個甜品, 好滿足!(好過上次和歌山溫泉酒店多多聲!)