今日天氣好好, 熱到可以著短袖衫, 不過, 日本氣象廳預測未來兩日, 九州地區都會落雨, 氣溫最高只有14-15度, 所以要帶定唔同厚度的長袖衫同大褸去(為孖寶保暖最緊要, 因為去緊旅行病咗會好大鑊!)
汲取咗上次搭簾航的教訓, 媽媽已經black list咗HK Express, 爸爸為免媽媽黑面, 亦唔敢買其他簾航, 所以今次係搭"尊貴"的CX!
飛機11:15起飛, 諗住10:15到機場(因為48小時前已經網上check-in咗), 所以只係去辦理行李寄艙手續, 一個鐘前到機場應該冇問題掛! 9點鐘係屋企出發, 揸車去到機場2號停車場攞飛, 再揸過去泊4號停車場(泊室內, 但俾2號停車場價錢, yeah!)
10:20去到CX個counter (唔知點解要咁耐, 星期日的交通非常暢順, 連TKO隧道都冇塞車), 由於個counter train緊個trainee, 我地前面果個搞咗好耐, 等到10:40終於到我地喇! 哥哥突然話急, 要去vee vee, 於是媽媽拿拿林帶佢去廁所, 返到黎見到爸爸鬧緊個地勤, 原來佢話我地太遲辦寄艙手續(正常係要30分鐘前個人要去到閘口), 有可能我地四個人連埋D行李都趕唔切呢班機, 要搭下一班, 吓? 咁大鑊?! 老公鬧爆個地勤, 我地明明10:20已經黎到排隊, 你就係度side時間train個trainee, 唔幫我地搞咗先, 而家搞到遲晒!
拎咗登機証, CX派出一位地勤姐姐帶我地入閘, 由職員通道入禁區, 手提行李過X-ray, 但辦理出境手續仍然係要自己去排Immigration櫃枱, 好在香港人都快手快腳, 好快搞掂, 然後個地勤就帶我地去4號閘口, 五個人係機場入面狂奔, 孖寶覺得好好玩, 跑得好快, 好在4號閘口唔駛搭無人駕駛(唔似得簾航咁, 要去到200幾號閘, CX果然係"尊貴"D呀!) 10:50去到閘口, D人仲排緊隊上機, 車! 不過, 雖然我地個人可以上到機, 但我地D行李有機會要下一班機先至送到, 問咗地勤, 可否要求送去當地酒店, 地勤話要到時同日本果邊職員講! 唉! 是但啦! 好在福岡機場同博多只係5分鐘車程啫! 起碼個人到咗先啦! 行李遲D先算!
上到機, 機長廣播, 原來香港去福岡只係2小時50分鐘, 唔駛3個鐘, 好正喎! 下次可以再去! 飛機準時起飛(CX果然係"尊貴"D呀! 上次搭簾航排咗45分鐘先到我地架機起飛)。由於老公網上check-in, mark唔到兒童餐(但其他人又mark到喎), 等咗好耐先至等到正式派餐, 好在孖寶唔知到有兒童餐, 又冇嗌肚餓。空姐派餐派咗好耐, 我地坐41同42排, 唔知點解無論由後面派落黎, 抑或由前面派上黎, 都未輪到我地, 最後先至派到我地, 已經俾人揀晒薯仔雞, 只剩低牛肉飯, 哥哥例牌唔食飯, 媽媽俾埋自己碗冷麵佢食(因為係豉油撈麵, 哥哥勁like!)。食完飛機餐, 瞓咗一陣, 已經到咗福岡。
落機過關之後, 走去行李輸送帶睇吓有冇我地果2件行李, 竟然有喎! 仲要係最快拎到, 原來遲到有著數喎! 下午4:30出咗閘, 走去Shuttle站排隊, 天氣都幾凍! 搭地下鐵去博多(成人260円x2, 孖寶唔駛買飛), 係博多口出, 搵咗好耐都搵唔到點樣上返去地面, 結果搵到條隧道(其實應該係上2/F行天橋過去), 仲要部扶手電梯只有落冇得上, 老公一個人拎住2箱行李行咗幾十級樓梯(佢心入面應該鬧緊我, 因為係我plan行程der...)
下午5:15去到酒店check-in, 返到房, 間房都算大(市中心黎講), 仲加多咗張床俾我地(有3張床, yeah! 媽媽今晚有覺好瞓喇!), 孖寶話好肚餓, 於是媽媽拎咗飛機餐送的曲奇餅俾孖寶做下午茶。 爸爸提意同孖寶沖涼先, 之後再出去搵野食, 呢個提議相當唔錯! 沖完涼, 細佬話好攰唔想出去, 又話自己唔肚餓唔駛食野, 爸爸媽媽惟有利誘(去睇玩具)加恐嚇(你一個人留係度), 好辛苦先至氹到佢肯出去, 出去搵野食已經6:30喇!
好在行過隔離JR HAKATA CITY只係5分鐘, 食肆集中係9/F同10/F, 行咗兩個圈都唔知食咩好, 最後決定去食沖繩料理(因為見到佢有麵有飯)。叫咗個苦瓜炒蛋, 炒飯同排骨麵, 盛惠2,600円, OK啦! 都叫做食得飽! 埋單後仲送咗4舊炸doughnut俾我地。
行咗一陣商場, 冇咩野好睇, 去B/F的supermarket買咗媽媽最like的藍莓希臘乳酪同士多啤梨, 再同爸爸去酒店附近的Family Mart買咗罐啤酒, 就返酒店喇! 媽媽沖涼, 爸爸俾孖寶食doughnut, 兩個超級鍾意食!
由於今次行程每日都要搬酒店, 所以唔可以拎晒D野出黎, 每次用完都要pack返入喼, 所以媽媽用咗好多時間不停咁拎野出黎同pack返D野入喼, 爸爸就負責幫孖寶刷牙, 叫佢地換衫, 煲水, etc. 可能太攰, 孖寶10:15就瞓著咗喇! Very good!
汲取咗上次去旅行冇覺好瞓的經驗(詳情請參閱2016年10月的「關西親子之旅2016」), 媽媽今次帶埋耳塞去旅行, 加上今晚可以自己一個瞓晒成張床, 媽媽好快就瞓著咗, 雖然半夜都有起過一次身幫孖寶蓋被, 但總算叫做有覺好瞓。不過, 由於爸爸要同孖寶瞓, 佢話半夜至少起咗10次身幫孖寶蓋被, 辛苦晒爸爸了!
Day 1 完
沒有留言:
張貼留言