帶住孖寶去旅行@2017(上) (感想篇)

今次去九州同之前幾次帶孖寶去旅行, 感覺好唔同:

(1)  前幾次, 我第一晚係酒店已經好後悔, 好想返香港, 但今次全程都冇呢種感覺。可能係孖寶大個仔咗, 易湊咗, 不過, 好肯定, 係我心態改變咗, 出得黎玩就要開開心心, 無論遇到咩情況, 都要叫自己開心D去面對!

(2)  能夠一家四口一齊去旅行, 係好幸福! 雖然孖寶長大後未必記得(睇怕下年已經唔記得), 但卻為爸媽製造咗好多美好的回憶(雖然開心的相片有好多誤導成份), 從前都冇諗過會有小朋友, 一直以黎, 就係兩夫妻吃喝玩樂的相, 來來去去都係一式一樣, 但孖寶的出現, 令到原本單調的二人合照, 變成幸福滿瀉的全家福, 多謝孖寶, 豐富咗爸媽的相簿, 更豐富咗爸媽的人生!

(3)  以前去旅行, 遇到落雨, 有阻滯, 去唔到幾個景點, 都會有D唔開心, 但今次完全冇呢種感覺, 反而覺得行程中有D意料之外的事, 仲刺激! 好似一家人去探險咁。

(4)  爸媽帶住孖寶去旅行, 雖然辛苦, 但只要見到孖寶開心, 就覺得好值得! 孖寶跟住爸媽周圍去, 雖然辛苦, 但只要爸媽係身邊陪住佢地, 佢地就會好開心! (細佬仔呢幾日又同媽媽講, 我等唔切8月去旅行喇! 不如我地四月尾又去!)

孖寶兄弟語錄(11)

四歲的小朋友, 開始對生死有概念, 尋晚臨瞓, 孖寶又黎同媽媽講...

哥哥: 媽媽, 我唔想你死, 你死咗, 我會好傷心!
媽媽: (鼻子一酸, 差D想喊... 錫咗哥哥個面豬仔一啖)... 唔駛擔心, 媽媽應該冇咁快死掛!

細佬: 媽媽, 你死果時, 記住拖實我, 帶埋我上去(天堂)!
媽媽: (鼻子再一酸, D眼淚差不多流出黎) 吓? 唔得架! 唔可以帶你上去, 媽媽上去先, 我會係天堂度等你! (實在講唔到落去, 驚自己會忍唔住喊咗出黎)

細佬: 媽媽, 咁你幾時會死呀? 我唔想你死呀! 點解人要死呀? 可唔可以唔死?
媽媽: 有生就必定有死! 生與死都唔係我地話事, 係神的安排! 其實本來, 人係唔駛死架! 人類的始祖 -- 阿當同夏娃, 神吩咐佢地唔可以食一個果實, 因為食咗會死, 但佢地唔聽話, 食咗, 俾神發現咗, 自此之後, 人就會死喇!

細佬: 咁死咗會點架? 我會唔會見返你? 天堂係點架?
媽媽: 死咗之後, 就會飛起, 飛咗上去天堂, 好光好光, 你會見到主耶穌同好多你識得的人囉! 媽媽都會係天堂等你, 我會去門口接你! 天堂係一個好靚好靚的地方, 係果度, 會好開心!

細佬: 咁係唔係會復活架?
媽媽: 一定會復活! 我地每一個信主的人, 都會復活, 復活咗之後, 我地會住係一個叫新天新地的地方!

細佬: 咁呢個世界呢? 我地間屋呢?
媽媽: 神話, 呢個世界將會有一日廢去, 將來呢個世界會消失! 我地呢間屋都會冇咗架喇!

哥哥: 咁主耶穌係唔係住係我地心入面呀?
媽媽: 係呀! 你相信主耶穌, 佢就會住係你個心入面。

細佬: 咁我跳黎跳去, 主耶穌會唔會跌咗出黎架?
媽媽: 唔會! 不過, 如果你唔愛佢, 愛咗世界, 佢就會俾你趕走咗架喇!

媽媽: 好喇! 夜喇! 快D瞓!

後記@2017.4.25
哥哥食早餐時同媽媽講...

哥哥: 媽媽, 係唔係我老咗, 我同主耶穌講, 我信佢, 然之後我死咗, 就可以上天堂?
媽媽: 唔係等老咗先至同主耶穌講架, 要而家講!
哥哥: 我想第二時先講!
媽媽: 唔好啦! 而家講啦! 媽媽教你點同主耶穌講... 主耶穌呀! 我相信你! 求你進入我的心入面, 成為我的主, 一生的主, 奉主名求, 阿們! (哥哥真的一句一句跟媽媽講, 我相信哥哥已經得著救恩, 真的!)

憤怒鳥

詳細情況, 無謂講喇!

總之我覺得自己一直以黎都實在太慳, 好對唔住自己!

由而家開始, 我唔再慳喇! 我要對自己好D! 要自己錫自己!

為咗平熄自己的憤怒, 無謂日日黑口黑面對住人, 所以我買咗以下的物品氹返自己開心:

 SK-II試用套裝$690

Agnes b. x Seiko 手錶$2,380

另外係b+ab買咗3件衫(露膊上衣, 鬆身返工褲, 長牛仔裙), 盛惠$1,782。唔睇價錢, 鍾意就買, 超爽!

不過, 我的復仇大計仲未完結, 因為我仲有20萬Quota去買!

九州親子之旅 2017 - Day 7

2017.04.15 (星期六)

今日係旅程的最後一日, 下午要搭飛機返香港喇! 日本氣象廳話今日天陰, 可能有雨, anyway, 天陰OK, 千期唔好落雨就得喇!

一早起身打開窗簾, 有陽光喎! 隔咗一陣, 落雨! Oh No! 唔好啦! 今日要去摘士多啤梨喎! 好在只係一陣過雲雨, 不過, 落完雨真係天陰陰, 冇晒陽光, 仲好啦! 冇咁熱!

今日熊本氣溫有24度, 加上香港天文台話有27度, 所以今日短打(短袖衫打底), 加一件外套。

孖寶尋晚太夜瞓, 所以今朝8點都未起身, 喂!  再瞓D士多啤梨就俾人摘晒架喇! 8:30落去大堂食早餐, 由於係免費, 所以都冇乜要求, 有蛋, 麵包, 粟米, 腐皮壽司, coffee, 比東橫INN豐富, 下次可以再book Comfort Hotel同東急REI呢兩個集團的酒店。

睡姿好可愛

 再唔起身就俾人摘晒D士多啤梨喇!

細佬最like的香蕉豆奶

由於Day 2落雨, 冇去到機場附近的東坪尾公園滑草, 爸爸決定放棄熊本城, 直接揸車去八女市的Pooh-san草莓園(プーさんのいちご園), 然後去滑草。

爸爸去停車場攞車, 媽媽帶孖寶去大堂check-out

早上11點到達草莓園, 門口個牌寫住Take-out 2017年終了! 吓? 唔係掛? 咁大鑊? 我冇諗住放題喎! 即場食? 點隊到咁多士多啤梨呀? 老公話一場黎到, 算啦! 孖寶好想"玩"摘士多啤梨! 成人1小時放題每位盛惠1600円, 4歲以下小童免費, 佢兩個咁細粒, 所以都係4歲以下。俾錢後, 每人獲發一張入場証, 要戴住, 另外一個膠桶同一把較剪仔, 職員話可以去A場同B場。

每人獲發一個膠桶同一把較剪仔

原來士多啤梨棚係溫室入面, 唔駛落田架! 由於已經係季尾, 所以好多都俾人剪晒, 不過, 都仲有唔少既! 媽媽教孖寶, 要揀D又紅又大先至剪喎, 要好似白雪公主個蘋果咁! 孖寶好認真咁揀, 剪吓剪吓, 原來都剪咗好多, 即場食, 冇想像中咁甜喎, 似韓國果D味道, 但大粒好多, 同埋都算juicy, OK啦! 細佬堅持唔食, 只係負責剪, 哥哥就鍾意試新野, 爸爸游說吓佢, 佢都肯咬一啖, 原來真係幾好味喎! 哥哥愛上了!

第一次玩摘士多啤梨

好開心

媽媽好落力

即場食

係溫室入面都幾熱, 細佬開始發脾四, 我帶住哥哥再行多兩個圈, 兩桶滿滿的, OK啦! 行返出室外搵張枱坐低, 哥哥攬住成桶士多啤梨, 係咁食, 係咁食, 仲要每粒只係咬咗尖端最甜的部份, 剩低個底部俾媽媽食... 爸媽都食到不行了! 放棄!

兩桶滿滿的

佢個表情... 乜D士多啤梨好酸咩?

同孖寶影咗兩幅士多啤梨造型的相, 中午12:30揸車離開喇! 細佬仔問我地去邊? 我話我地去一個好刺激的地方! hoho...

草莓孖寶

下午1:30到東坪尾公園, 可能因為今日係星期六, 公園好多人, 滑草要排隊, 排排吓隊, 孖寶走咗去睇人滑草, 得返媽媽一個排隊, 究竟係邊個要玩滑草呀? 原來每節15分鐘, 頭先啱啱開始, 等到1:45, 上一節的小朋友終於玩完, 輪到我地喇! 孖寶又係要揀滑草兜的顏色, 咁啱有藍色同紅色。第一次玩滑草, 爸媽驚佢兩個唔識, 同埋個斜坡都幾高吓, 所以媽媽陪哥哥, 爸爸陪細佬, 玩咗一次, 哥哥已經唔要我陪, 自己拎住個兜, 一支箭咁上梯級, 走到上斜坡頂滑落黎, 細佬就話好驚, 要爸爸陪。(我見佢滑落黎果時笑到卡卡聲架喎! 有幾驚呀?!)

哥哥自己玩

細佬笑得好開心, 唔似好驚喎!

爸爸陪細佬玩咗幾次, 哥哥就自己玩, 媽媽可以坐埋一邊幫佢地拍video同影相。之後換媽媽陪細佬玩, 就黎夠鐘(點解等人地玩咁耐, 自己玩就咁快夠鐘架?), 最後一次, 媽媽同細佬一齊滑落黎, 哥哥無啦啦衝出黎, 嚇到媽媽尖叫同"扭軚", 差D剷到哥哥飛起, 哥哥又發癲+爆喊, 喂! 你知唔知咁樣衝出黎好危險架? 你衝出黎做乜? 差D撞死你呀! 都話咗滑完要即刻走開!

媽媽同細佬玩滑草, 好刺激!

喊完一大輪, 一家四口去玩滾軸滑梯, 爸爸話下次要買返塊瀡滑板先得, 媽媽一早講咗要買啦! 上次係香港12蚊店睇到, 我想買, 俾你阻止! 之後, 孖寶嚷著要玩繩網, 吓? 2:30要走喇! 太遲去到又話要搭下一班機。

細佬被困係繩網中

雖然公園係機場附近, 但要入咗油先可以還車, 加上個GPS老點, 最後搞到3:25先至去到機場櫃位辦理行李寄倉(飛機4:40起飛)。

自助油站

終於搞掂行李寄艙

爸爸決定入咗禁區後先至搵野食(冇錯! 係仲未食lunch既!) 好在入到去有間快餐, 叫咗1碗牛肉飯(爸爸)同2碗烏冬(媽媽&孖寶)。

求其食咗一餐, 媽媽趕住去買手信

食完已經4:00, 媽媽拿拿林跑去Duty Free Shop, 因為仲未買媽媽的Shiseido(上次去大阪係機場猶疑咗好耐, 最終冇買, 好後悔, 今次一定要買返), 仲要買手信俾孖寶校長, 老師, 同學, 我同老公的同事, 原來已經Final Call, 我仲排緊隊俾錢, 老公就帶孖寶去廁所, 俾完錢拿拿林跑去閘口, 已經聽到廣播, 叫緊我同老公個名, 地勤見到我, 都知我掛住"鳩嗚", 等埋爸爸同孖寶出黎, 一家四口, 同Day 1一模一樣, 狂奔去搭飛機, hoho...

上機冇幾耐就起飛喇! 遲上機有著數喎, 唔駛等! 起飛後一個鐘就派飛機餐, 好有效率, 我同老公都揀咗雞、魚每樣一份, 哥哥照例唔食飯, 只係食冷麵(仲要食埋媽媽果碗), 連雪糕都唔食, 媽媽叫佢食完瞓一陣, 佢初頭唔肯, 後尾又話瞓, 細佬就話耳痛, 瞓唔著, 睇卡通睇到落機。

話說孖寶有日問, 媽媽, 有冇朱古力薯片,

媽媽話, 唔係講笑, 真係有, 叫做Royce,

我地遲D去北海道買黎食, 點知福岡機場有得賣,

細佬係機上瞓唔著, 爸爸開黎俾佢食, 佢話好正!

晚上7:30, 客機安全降落香港國際機場, 又係唔駛搭無人駕駛, 行出黎, 過關都好快, 去到行李輸送帶, 等咗好耐好耐(超過30分鐘, 其他人都走晒, 仲未輪到我地, 我地唔算早寄倉丫) 最後終於都等到喇! 孖寶話好口渴, 要買水飲!

晚上8:25終於可以離開機場, 去停車場攞車喇! 泊足7日, 盛惠$660, 都OK!

返到屋企樓下停車場已經晚上9:30, 返上樓, 沖涼, 瞓覺, d行李留返聽日執。

老公話都係屋企張床最舒服！

旅程完結

今次旅程的戰利品

九州親子之旅2017 - Day 6

2017.04.14 (星期五)

今日仍然係陽光普照, 最高氣溫有22度, 所以可以收返埋前幾日的厚褸。

萬里無雲, 好好天啊!

由於張床真係瞓得好辛苦, 所以媽媽早上6:30已經醒咗瞓唔返, 又起身執野...

早上8:10去酒店的宴會廳食早餐, 地方好大, 自助餐都算多選擇, 有媽媽最鍾意食的水煮豆腐同細佬仔最like的日式玉子蛋。酒店有好多外國人, 原來佢地係來自唔同國家, 參加老爺車環遊世界之旅 (老公出去叮麵包時, 同其中一個外國人傾計得知)。

可唔可以用個正常表情影相?!

盛惠孖寶每人900円的早餐

食完早餐, 爸爸見成個停車場都係各式各樣的老爺車, 就叫埋孖寶一齊出去睇車同影相, 原來最老果架係第一次世界大戰前出廠的! 嘩! (正向思維: 住唔到饅頭屋, 可以睇到咁多老爺車, 又係另一個得著!)

由於揸車去高千穗都要個幾鐘, 所以9:45就check-out, 出發喇! GPS顯示要11:35先至到(不過通常都可以早D)。

今日萬里無雲, 晴空一片, 沿途都係田野、杉樹林, 好似去咗北歐咁! (正向思維: 今日心情好好, 無受尋晚間酒店影響, 加上係旅程的第六日, 聽日就要返香港喇! 一定要玩得開心D!)

我地果然比GPS顯示時間早咗去到, 11:15去到天空小火車的車站, 孖寶係車入面瞓晒, 原本諗住朝早的座位已經滿晒, 要買下午的車飛, 點知媽媽落到去個車站, 職員話黎緊呢班車係11:20開出(吓? 即係仲有5分鐘咋喎!), 即刻同個職員講咗句"初拖媽嗲", 急call老公, 喂! 仲有5分鐘就開, 搭唔搭, 抑或下一班12:00呀? 老公話緊係搭啦! 我叫醒佢兩個! 我心諗: 真係叫得醒? 唔扭計? 老公咁勁?!

買完飛, 得返3分鐘, 媽媽拿拿林跑返上去停車場幫手, 原來兩個已經起咗身, 落車, 但哥哥喊緊(意料中事!)

落到去, 仲要去廁所, 結果成車人等我地四個, hoho... 真係唔好意思! 一上車, 火車就開動喇! 車速唔算好快, 路軌旁邊間中有D櫻花樹垂落黎, 好靚, 但影唔到, 算啦! 用眼睇係最靚! 入山洞喇! 小火車打咗D燈係山洞頂, 五顏六色, 好靚, 孖寶好興奮! 兩個不斷咁同對方講: 點解你塊面黑晒既?... haha...

開車喇! 好曬!

火車過山洞

比陽光更璨爛的笑容

對周圍的景色充滿好奇

小火車最後停咗係條鐵橋上面, 小火車司機負責吹bubble, 雖然好曬(唔記得戴帽), 但有微微的涼風, 加上置身係大自然入面, 好恬靜, 好療癒, 好C服! 小火車冇再向前走, 而係返轉頭喇! 11:50返到上車的地點, 我地頭先太衝忙, 冇同架小火車影相, 而家可以影返夠本, 孖寶最鍾意行路軌, 爸爸亦都趁呢個時候幫孖寶同媽媽影吓靚相, 唔該晒爸爸! 爸爸不忘重申: 我買部靚相機都係為咗幫你地影靚相之嘛! (但你好似成日都唔記得帶呢部相機架喎! 又話拎唔到咁多野, 又話要湊住佢兩個, 又話邊有咁好閒情, etc.)

置身北歐一樣

今次旅程經常見到櫻花

又黎一家四口自拍, 喂! 自己搵返自己個頭呀!

孖寶與小火車合照

大特寫

好曬

細佬仔扮站長, 好有型!

中午12點, 出發去高千穗峽划船仔喇! 其實只係5分鐘車程, 好近, 但封路, 改道, 搞到泊咗一個好遠的停車場, 個實Q呃我地話行10分鐘, 點知上山落山, 行咗20分鐘都未到, 最後俾我地發現, 原來划船隔離個停車場, 跟本未滿, 同埋只係500円之嘛, 我地又唔係冇錢! 早知唔駛行餐死 ... (爸爸不停碎碎念) 媽媽係呢個時候, 又啟動正向思維: 唔係丫! 一家人行吓山, 係香港都冇咁既機會喎, 況且天氣唔熱, 又有樹蔭, 幾正! 係行得遠咗D囉, 不過, 孖寶都好叻, 冇話要抱! 當做運動囉!

行咗好耐好耐

終於見到有人划艇仔, 但仍然未見到租艇仔的地方

下午1:15, 終於都落到去租艇仔的地方, 可能太多遊客, 太多大劣人, 所以D職員態度都幾冇禮貌吓! 是但啦! 1200円租一隻艇, 可以玩30分鐘, 一家四口著咗救生衣, 媽媽落船先, 然後到孖寶坐"地下", 爸爸最後落船, 細佬話邊個負責划船呀? 咁緊係最大隻, 最大力果個 -- 爸爸啦!

又黎一家四口自拍, 坐穏呀!

辛苦爸爸了!

點解好似冇上網睇D相咁靚既?! 同埋, 原來可以划船的地方好細, 成日撞艇。峽谷都幾窄, 兩邊係六角柱石, D角位好sharp, cutting好明顯, 係典型的火成岩地貌。幾百萬年前, 呢一帶火山爆發, 噴出的岩漿冷卻形成今日的地質, 加上有河道係地面漸漸形成, 河水沿石隙向下侵蝕, 最後形成窄長的峽谷(媽媽大學主修地理der...)

划完艇仔已經下午2點, 老公提意食咗野先, 佢食快D, 然後我同孖寶係餐廳等佢, 佢行20分鐘返去停車場攞車, 再揸過黎接我地! 辛苦晒老公喇! 老公去咗拎車, 我就帶咗孖寶去對面的土產店睇吓野, 哥哥突然話要poo poo, 細佬又話急vee, 咁大獲? 頭先爸爸係度, 你地又唔話要去廁所?!

好肚餓

去完廁所出黎, 爸爸已經黎咗喇! 細佬見到包餅, 竟然話好肚餓, 要買餅食! 吓? 啱啱食完野咋喎, 原來你食唔飽? 咁你頭先又唔出聲? 結果媽媽買咗包餅, 又買多樽撈飯粉, 走人!

離開高千穗, 今晚住係熊本新市街。孖寶一上車就話要拆包餅黎食, 兩個都話好好味。由於飯氣攻心, 孖寶同媽媽好快就瞓著咗, 冇幾耐, feel到架車停咗, 爸爸話佢都好眼瞓, 於是泊埋咗係個不知名的停車場入面, 一家四口瞓晒! 瞓咗大半個鐘, 爸爸起身, 又再開車, 繼續上路!

下午5:30到達熊本市郊的AEON MALL, 又黎? 係呀! 爸爸最鍾意行AEON MALL, 同埋因為今晚住市中心, 泊低架車行出去搵野食都唔係咁方便, 所以都係係度食埋野先, 最後先至返酒店。

第一時間揀返架靚車, 兩兄弟手拖手, 好sweet!

爸爸話要買返兩個食飯肩俾佢地, 因為有時係車度食野, 驚佢地食到成地碎, 搵咗好耐, 終於搵到價錢合理又Made in Japan的肩, 買咗!

其實AEON MALL唔係只有food court, 係有食街既! 由街頭行到街尾, 都諗唔到食乜, 最後決定去食"五穀", 呢間係沖繩AEON MALL都有, 食過都OK! 叫咗3個Set, 今晚係旅程的最後一晚, 要食豐富D! 爸爸叫咗個三餸飯, 媽媽叫咗個燒汁雪魚, 另外叫咗個燒汁豚肉俾孖寶, 佢兩個好似好肚餓咁, 個豚肉飯一黎到, 已經好似狂風掃落葉咁, 食晒... D餸! 今餐好豐富, 食得好飽, 好滿足!

最後一餐, 要食豐富D

成個枱面都係野食

食完飯, 爸爸又提意去食雪糕, 由於一家四口要share一個, 真係好唔夠喉, 所以今次買咗2個, 孖寶食chocolate味, 我同老公食抺茶味, 都唔錯!

晚上9:30, 要走喇! 我地仲係熊本市郊咋, 返酒店車程要30分鐘。10點去到酒店check-in, 返房, 感覺唔錯, 同東橫INN格局差不多, 但間房大過東橫INN。今晚又係2張床分開, 我同細佬瞓, 老公同哥哥瞓。孖寶可能下晝瞓得太多, 越夜越興奮, 唔願瞓! 喂! 聽日要去摘士多啤梨喎!

酒店房間, 大過東橫INN

12月至4月係士多啤梨季節, 今個旅程幾乎晚晚都食

總體黎講, 除咗高爾夫球場果晚, 今個旅程, 媽媽都算有覺好瞓(唔似得上次去大阪咁, 幾乎每晚都只係瞓幾粒鐘), 應該係因為戴咗耳塞, 同埋有兩晚都係3張床, 另外有一晚係2張雙人床 (似乎下次都要搵吓有3張床的酒店房)

Day 6 完