可憐的逸逸!

逸逸係一個好聰明(理解力高)、好明白事理(懂事)、好生性(唔駛父母操心)、好乖巧(聽話、順服)、好鬼馬(人細鬼大)的一個孩子!

爸爸媽媽都好錫逸逸, 因為佢真係好抵錫, 大部份時間/情況, 佢都唔會令你難做, 唔會令你失望, 唔會令你生氣...

不過, 逸逸有一個好偏心的阿嫲, 自從孖寶出世出院返屋企, 阿嫲就好偏心哥哥, 錫晒哥哥, 餵奶, 抱抱, "暗"瞓覺, 阿嫲都係爭住要負責照顧哥哥, 因為哥哥真係好靚仔, 一出世已經好多頭髮, 五官又生得標緻, 加上肥嘟嘟(後來), 正常人都會好like哥哥。至於細佬, 可能因為出世無乜頭髮, 皮膚比較黑, 又瘦弱, 加上經常喊 (百日哭BB, 喊超過100日, 喊到6個月大先至有好轉), 正常人都唔會揀鍾意細佬, 惟有母愛係無私而偉大, 所以當時只有媽媽肯每晚由8點抱住佢, 抱到11點, 期間不停唱歌仔俾佢聽, 又搖呀搖呀!  (註: 哥哥生得靚仔因為似我, 細佬就似爸爸, 阿嫲你竟然唔鍾意似自己個仔樣果個, 你有冇搞錯咗?!)

原本阿嫲偏心係可以理解(膚淺的人通常只係睇外表, 明o既!), 爸爸媽媽亦覺得冇所謂, 因為只要我地錫逸逸就夠喇! 不過, 隨住佢地慢慢長大, 兩兄弟間多咗好多互動, 當然包括埋鬧交, 打交, 爭玩具......等等! 係咁既情況下, 極需要一個公平, 公正, 理性的大人, 維持秩序, 主持公道! 可惜, 阿嫲完全唔按常理去處理。

兄弟之間打交, 大家都有出手, 但逸逸永遠都係被要求先向對方道歉, 至於哥哥, 永遠唔肯講對唔住, 而且只要即場爆喊, 就可以得到阿嫲的擁抱同安慰, 至於已經講咗對唔住的細佬, 只能呆呆的企係度, 得不到絲毫半點的安慰...

逸逸好鍾意做手作仔, 砌Lego, 玩泥膠, 哥哥見到細佬整得咁靚, 就好想玩埋一份, 但逸逸的性格唔太鍾意同人分享 (3歲的小朋友未識分享, 我認為可以理解), 逸逸會叫哥哥: 你自己整啦! 我好俾心機整架! 哥哥又黎果招, 即場爆喊, 阿嫲聽到哥哥喊, 衝出黎, 唔理前因後果, 就會怪責逸逸, 可憐的逸逸, 明明自己玩緊, 自己好俾心機整得好靚, 竟然又要被屈同哥哥講對唔住!

哥哥曳先, 做咗D衰野, 細佬又跟住做, 結果只有細佬捱鬧, 哥哥冇事!

阿嫲的偏心程度, 就連家中的工人姐姐都睇唔過眼, 要同我呢個Mum報寸, 我話我乜都睇到晒! 係呀! 阿嫲係好偏心, 麻煩你幫我睇住細佬, 安慰佢, 照顧佢啦!

唉! 其實我呢個作為媽媽的, 真係好無奈! 小朋友6歲之前係各方面發展的黃金時間, 偏偏有一個咁偏心, 唔按常理的維思去教孩子的嫲嫲, 媽媽實在好擔心孖寶再長大一點, 已經開始唔識分對錯, 被人打果個, 竟然要先同對方講對唔住, 打人的, 不單唔駛講對唔住, 只要爆喊, 仲可以得到大人的安慰, 見到別人玩緊玩具, 自己好想玩, 唔係問對方, 而係先爆喊, 等大人幫你從別人手上將玩具馬上搶過來, 自己好地地玩緊玩具, 原來唔肯分享就係錯的, 會被怪責搞到對方喊... 呢個係咩世界? 諗起都好恐佈, 逸逸竟然每日都受住咁既對待, 真係好可憐! 媽媽真係好驚逸逸弱少的心靈承受唔住, 會留低童年陰影!

亦因為屋企入面有個咁既怪人, 用異於常理的維思去教孖寶, 搞到爸爸媽媽係教孖寶方面, 亦面對好大的困難同阻力。明明教咗佢, 喊係解決唔到問題, 點解仍然成日郁D就喊? 明明教咗要等待, 等人玩完先至玩, 點解仲係一玩唔到就爆喊? 我終於明白點解......

可憐的逸逸, 媽媽只能眼白白係個cam度睇住你無啦啦俾人怪責, 無啦啦被屈要講對唔住, 諗到呢度, 媽媽已經眼濕濕......