四日的沖繩之旅已經去到尾聲, 雖然話四日, 但實際上只得三日, 因為最尾呢日的行程係: 起床 --> 酒店Check out --> 機場還車 --> 搭飛機 --> 香港
今朝要7點起身, 由於媽媽成日俾爸爸話搞咁耐都未出門口, 自己知自己事, 所以未到7點已經起身, 刷牙洗面, 換衫, 裝身...
7點鬧鐘響, 爸爸都起身, 刷牙洗面之後就叫醒孖寶, 由於尋晚12點瞓, 今朝要7點起身, 哥哥發脾氣爆喊: 好眼瞓呀! 仲好想瞓覺! 爸爸好衰! 嘈醒咗我! 媽媽! 我要你呀! 至於細佬, 佢一向脾氣好, 情緒穏定, 當然冇事啦! 起身仲笑咪咪添!
8:45食完早餐, 返上房執埋行李, 媽媽拖住細佬去check out, 找數, 3晚酒店盛惠57,100円, 原來仲有D迎賓禮物未攞, 同埋免費影民族服裝coupon未用, 算吧啦! 爸爸同哥哥去攞車, 行李搬晒上車, 出發喇! 今日天氣係四日中最好的, 只可惜我地今日就要走喇! 不過, 媽媽同爸爸講, 知道今日可以返香港, 媽媽今朝忍唔住偷笑, 有一種解脫的感覺, hoho...
可能因為係平日, 加上9點仲係返工時間, 好塞車, 原來酒店去機場要成50分鐘, 我地架機係12:10起飛, 即係要10:30去到機場check in啦! 仲要去咗還車先喎, 然後搭佢部龜速旅遊巴去機場, 都幾趕!
總算10:45去到機場, 櫃位大排長龍, 排咗超過30分鐘先至可以check in, 我地今次醒目, 冇做網上check in, 所以可以安排返原先買飛時揀的坐位, 窗口位, 前後排。
11:20 媽媽提意入閘先, 因為媽媽仲有好多手信未買, 包括孖寶學校老師、公公、婆婆、工人姐姐... 入閘後, 爸爸負責睇住孖寶, 媽媽作最後努力買買買, 終於叫做對大家有D交代。
爸爸低頭篤手機, 孖寶就玩到成身汗, 媽媽邀請細佬一齊去買雪糕食, 細佬好開心, 因為佢最鍾意食野! 食完雪糕, 幫佢地同飛機合照, 爸爸帶佢地去廁所, 已經係final call喇! 快D啦! 飛機飛走了喇!
上到飛機, 又係爸爸同細佬坐, 媽媽同哥哥坐 (爸爸, 下次可唔可以調轉呀?) 機長廣播, 機場實施唔知咩管制, 要delay唔知幾耐, 最後遲咗一個鐘先至起飛, 細佬等唔到起飛已經瞓咗! 哥哥頑強D, 又話要睇youtube, 又話要睇熊貓, 搞咗媽媽一大輪先至肯瞓。兩個今朝實在太早起身, 所以瞓到架機降落都唔知!
臨落機, 兩個都突然話好急, 要去vee vee, 搞到所有人落晒機, 我地都未落...
落機, 搭無人駕駛, 過關, 攞行李, 已經差不多4點, 媽媽勁肚餓, 提意係機場食Tea, 食完Tea已經5點, 爸爸去攞車, 哥哥突然又話要去poo poo, 搞到媽媽要一拖二由停車場搭返lift上T2商場去廁所, 好在哥哥都忍得住。
返到屋企6點, 仲要幫佢地沖涼同執返喼入面D野出黎, 好攰!
今次旅程的戰利品, 成績幾滿意!
沒有留言:
張貼留言