帶住孖寶去旅行@2016

終於踏入6月, 距離出發去旅行仲有4日, 自從3月買完飛, 用咗兩日寫咗個行程表, 就一直掉低咗件事, 早幾日仲同老公講笑, 驚住唔記得要上飛機, 由於事隔太耐, 真係唔記得班機幾點起飛...hoho...

呢兩日print返D機票, itinerary, 行程表, 旅行用品清單, 油顏色圖畫, 呢個好緊要, 爸爸話係防止孖寶係飛機上扭計, 我就話最緊要係帶多D零食上飛機食, 仲記得上次搭同一班飛機去沖繩, 媽媽真係充滿心理陰影, 話說本來諗住去到機場check in後食返個豐富早餐 (因為飛機餐得個包, 但佢唔係廉航, 老公話佢唔係!) 點知去到機場check in完已經last call, 乜都冇食飛跑去閘口, 唉! 結果等飛機起飛, 再等成個鐘先至得個包食, 好在空姐肯私人醒多一個包俾我啫!

自從舊年10月帶過孖寶去沖繩, 當時邀請埋奶奶同姑媽去(幫手), 孖寶兄弟就成日問幾時再去旅行, 其實媽媽都好想快D再去旅行, 無奈假期(包括聖誕, 新年, 復活節)機票好貴, 加上俾個衰老闆搶晒D可以放假的日子, 最快都要6月先至可以請到假去旅行 (仲要俾個衰老闆話我買機票前冇問過佢, 大佬呀! 我買機票係日日上網睇, 好似睇住D股票每日上落咁, 價位啱就即買, 我點樣問過你先呀? 唔通話俾你聽我而家撳制買喇?!)

細佬由3月問到4月, 4月問到5月, 隔一排就問我同爸爸幾時去旅行, 仲要我地拎住個月曆同佢講解, 踏入6月, 終於等到喇! 過多4日就去旅行喇! 要開始蘊釀一吓旅行mood先, 首先就係print晒D行程表、旅行用品清單出黎, 再諗吓去旅行要著咩衫, 唔夠衫就要趁呢幾日買埋佢 (其實上星期六已經買咗一條牛仔one piece俾自己, 孖寶一人一件T裇, hoho...) 孖寶兄弟知道過幾日就去旅行都好興奮, 見到佢地咁開心, 咁想去旅行, 爸爸媽媽就算辛苦, 都好想帶佢地去!

媽媽仲已經同細佬仔商量好要帶咩零食上飛機食 (因為上次飛機臨降落時, 細佬爆喊要抱, 應該係因為佢耳仔痛) 所以今次諗住食食食, 食住咁降落, 希望好D啦!  孖寶仲商量好邊個拎行李, 由哥哥推藍色細喼, 細佬推紫色大喼, 媽媽同佢地講, 你地要幫手執行李呀! 話俾媽媽聽, 你地想帶咩衫去著! 細佬即時大叫: McQueen! (佢地最近愛上咗反斗車王, 但其實佢地跟本都未睇過套卡通片)

不過, 細佬上星期六開始流鼻水, 鼻塞, 咳(好驚佢會傳染埋俾哥哥), 而哥哥就由尋晚開始起周身痕, 半夜要起身R, 慘慘豬! 今朝睇咗醫生, 兩個都冇大礙, 希望兩隻豬仔都可以係去旅行之前好返, 健健康康咁上飛機!

進入倒數階段, 仲有4, 3, 2, 1日, 沖繩, we are coming!