孖寶升小三

好似剛剛先至睇住佢地升小一, 小二都冇乜讀過(去年社會事件停課, 今年疫情又停課), 就要升小三喇!

第三波疫情由7月頭爆發, 直到最近呢個星期, 確診個案先至回落到單位數字。

今年9月1號, 孖寶開學但唔返學! 其實今年上半年, 孖寶小二下學期的所有課堂都係網上教學, 升上小三, 仍然係網上教學。

今個學期, 學校安排網上教學有兩個模式: (1) 睇錄影(老師預先製作Powerpoint講解), (2) 睇直播老師實時教學(一個老師教晒全級一百幾十個學生, 老師又唔識得mute晒D學生, 任由某幾個學生不停講嘢, 好嘈, 好混亂, 我兩仔完全聽唔到老師講乜, 呆坐咗30分鐘, 冇人理囉!) 除咗網上教學, 老師亦進一步要求學生唔單止做網上功課, 仲要寫生字, 做作業, 然後影相, 用個好似叫做Notes的software post上去唔知邊條Link還是邊個page度 (有一次老師打嚟追交功課, 爸爸話佢post咗, 唔知點解老師收唔到, 明明有交, 只係老師收唔到就唔俾分佢, 真係離晒譜! 好心老師係疫情期間酌情處理啦!)

實在好懷疑網上教學的成效(大學或以上除外), 好在學校講咗, 唔會一復課就測驗默書 (唔好話測驗默書丫, 我覺得老師要重新再教一次囉! 佢地跟本冇學過嘢/學唔到嘢) 今個星期開始, 學校終於放棄老師實時教學, 改返睇錄影, 我相信應該有好多家長向校方反映咗。

下星期二(9月29日), 孖寶可以復課喇! 希望今次可以返耐D學啦! 唔好返咗一個月又話要停課抗疫!

課外活動方面

由於疫情, 學校都唔敢搞課外活動, 去年報咗學校的樂器班, 最終只係上咗一半, 退返一半錢, 好在去年9月已經安排咗哥哥出去琴行學鋼琴, 學咗一年, 哥哥進步咗好多,應該就嚟叻過我 (我只有Grade 2程度)。至於細佬, 停咗差不多半年冇學小提琴 (學校老師一直答唔到我會否取消樂器班, 一直hold住D學費), 惟有叫佢係屋企keep住練習, 直至7月先至去琴行再學返, 老師話佢唔似停咗半年, 話佢有天份, 不過就要執返D手勢, 拍子同練Scale。

6月的時候, 疫情一度好轉, 孖寶有機會學返足球, 爸媽仲特登買咗2對足球鞋俾佢地, 點知, 踢咗一堂足球, 就爆發第三波疫情, 封場, 冇得踢!

仲有游水, 5-6月期間, 係會所個泳池游過3-4次水, 我仲同孖寶講, 今年要的起心肝跟爸爸學游水, 要學識游水喇! 點知又爆疫情, 封池, 冇得游! 今次政府連沙灘都封埋(明明2-3月第一波疫情時仲可以去沙灘玩沙der~)。

後記@2020.11.23

復課唔夠2個月, 教育局上星期五宣布23/11(今日)起, 小一至小三停課14天, 唔係因為疫情, 係因為流感, 不過, 第四波疫情已經爆緊(而家每日都60-70宗確診)

後記@2021.03.02

由去年23/11因為流感停課, 然後12月頭第四波疫情爆發, 繼續停課到而家(超過3個月), 農曆新年後的網上課堂, 學校終於改為「班本」授課, 終於唔係一個老師教全級150個同學, 而係一個老師教一班30個同學(人哋D學校一開始已經係咁, 唔明點解我哋學校諗得出由一個老師教晒全級學生, 想偷懶??? 乜你地D老師平時上實體課唔係一個教一班既咩? ), 我兩個仔終於有人理佢哋喇! 起碼老師會叫佢地個名答問題, 唔係只係俾一小撮學生隨便開咪搶答, 不過, 默書, 測驗, 考試都接踵而來, 希望可以頂得順啦(我講我自己)!