今次又係細佬仔!
話說最近, 輪到媽媽同孖寶瞓!
上星期六晚臨瞓...... (細佬走入嚟我房)
細佬: 媽媽, 你今晚可唔可以早D入嚟陪我哋瞓? 你今晚唔駛再睇電視啦! 都做完咗喇!
媽媽: Err...... 唔得啊! 我今晚約咗爸爸......
細佬: 約咗爸爸做咩呀?
媽媽: Err...... 總之約咗爸爸啦! 要遲D先入嚟!
細佬: 約咗爸爸做咩呀?...... 啊! 錫錫? 好快啫! 10秒搞掂啦!
媽媽: Hoho...... (媽媽同細佬一齊返去佢哋間房)
爸爸: (已經係佢哋間房入面, 媽媽講返俾爸爸聽) 我同媽媽要錫錫好耐架!
細佬: 咁要幾耐呀?
爸爸: Umm...... 半個鐘左右啦!
細佬: 好! 咁你哋係度錫錫啦! 媽媽, 我等你! 我要做觀眾! (坐定定係床邊)
爸爸: 呢D嘢, 唔可以有觀眾架喎!
(媽媽已經笑到肚痛, 出唔到聲!)
其實, 哥哥都好搞笑!
說話有一個星期日朝早, 媽媽係房入面整緊黏土花, 哥哥走咗入嚟, 佢話有D"心事"要同媽媽講 (媽媽經常聽哥哥盡訴心中情), 今次的"心事"內容大概係話爸爸成日因為少少事就鬧佢, 又話佢唔努力讀書... (下刪一千字)
哥哥: 我唔係唔努力, 我驚太努力, 好快就用晒我D努力!
媽媽: 唔會架! 努力係會越用越有, 相反, 你唔用D努力, 個人就會越嚟越懶! (我想講: 就好似你而家咁)
哥哥: 唔係呀! 你聽我解釋先啦!
媽媽: 啊!
哥哥: 我要儲住D努力, 你明唔明? 即係... 好似「省電模式」咁樣呀! 我遲D就會努力架喇!
媽媽: 啊! 咁你個「省電模式」去到幾時呀?
哥哥: umm......去到我17, 18歲左右啦!
媽媽: (唔知好嬲定好笑!)
每晚食飯時間都係我哋一家四口無所不談的時候 (所以孖寶成日俾爸爸話佢哋掛住傾計唔食飯, 要計時, 食飯都要計時, 好可憐!)
細佬: 媽媽, 你最鍾意食咩餸? 即係例如咕噜肉嗰D...
媽媽: umm..... 其實我都真係幾鍾意食咕噜肉, 我鍾意酸酸甜甜! (好認真思考)
細佬: 啊! 唔怪之得你係「咕噜肉o既體質」啦!
媽媽: 咩「咕噜肉o既體質」? 你想講咩呀? 吓?
孖寶: wakakaka...... (狂笑)
沒有留言:
張貼留言