自學水彩 - 畫紙篇 (下)

 一年前, 啱啱開始自學水彩, 乜都唔識, 仲係摸索階段, 究竟初學者應該用靚紙(即100%棉漿紙)? 還是用價錢經濟一D的木漿紙呢?

一年後, 我終於有答案喇! 貴紙唔等於靚紙, 用貴紙唔代表你幅作品會靚咗, 人哋話好O既, 未必適合自己,木漿紙唔一定差過棉漿紙, 係要睇邊種紙適合自己操作, 能夠得心應手就係好紙喇! 

畫咗一年水彩, 大部份時間都係用Canson 的XL Watercolour Pad 或 Montval (兩款都係木漿紙), 可以講, 我操控得越嚟越得心應手, 雖然係混色同漸變方面唔及得棉漿紙, 但係可以用技巧搭救, 感覺已經習慣咗木漿紙的特性。之前試用過Saunders的Waterford 同 Canson的Arches (100%全棉), Waterford係混色同漸變方面非常容易, 顏色化開得好靚, 好均勻, 但最大問題係紙質偏黃, 超級黃, 成幅畫暗淡無光, 死氣沉沉! 至於被推崇為水彩紙中的殿堂級 -- Arches, 係混色同漸變方面竟然同木漿紙差不多, D顏色化唔開, 一撻撻色, 而且顯色度亦一般, 當我上咗第三層色之後, 竟然開始出現「起渣」、「浮粉」的情況, 令我極度失望, 一路畫一路好想放棄 (我好懷疑自己係唔係買咗A貨?!)

以下係同一幅畫, 我用木漿紙同棉漿紙畫的分別:

左邊用Fabriano(木漿紙), 右邊用Arches(棉漿紙),
棉漿紙一向偏黃, Arches唔算好黃, 我覺得可以接受

Fabriano見到花瓣的紋理

Arches只係上咗3層色就開始起晒渣, 浮晒粉, 我唔敢再畫落去

Fabriano顏色層次豐富

Arches顏色幾乎冇層次可言

網上講到Arches天下無敵咁, 所以我一直都心思思想試吓, 上年因為仲係新手, 用幾靚的紙都係嘥料嘥錢, 所以冇買! 今年初又因為疫情, 全港斷貨, 一直買唔到, 直至最近先至係中南搵到, 點知...... 唉! 老實講, 我真係非常失望, 之前的幻想(以為可以提升畫作的質素)徹底破滅!

以下係我用過的水彩紙

左上: Fabriano (Made in Italy) - 25% cotton

本來諗住買Arches, 點知全港斷貨, 想買其他牌子的100% cotton, 又冇, 惟有買呢隻聽都未聽過的牌子, 只得25% cotton, 用落同 Montval 無分別, 但價錢拍得住全棉漿紙, 性價比低, 而且好易起返底色出嚟, 明明乾咗幾日, 上水仲可以起返底色出嚟, 好驚!!! 而且我發現佢有一個致命的問題, 就係佢每張紙總有D地方係起粒 (起粒的地方特別吸色, 搞到突然深咗一點色, 好樣衰), 以後都唔會買!

中上: Arches (Made in France) - 100% cotton

殿堂級水彩紙, 唔駛介紹, 但對我嚟講, 係最糟糕的體驗, 心理陰影面積難以估算!  

右上: Canson XL Watercolour Pad (Made in France) - 100% cellulose 

可能用慣咗, 越用越得心應手, 明知木漿紙混色漸變都唔掂, 所以我會分幾層上單色 (唔會夾硬用wet-on-wet, 係同一層用2色做漸變), 紙質唔差, 上5-6層, 張紙都未"霉", hoho!

左下: Canson Montval (Made in France) - 100% cellulose

同用Canson XL Watercolour Pad 感覺一樣, 感覺紙質比XL仲要厚實, 超棒, 畫乜都得!

右下: Saunders Waterford (Made in England) - 100% cotton

感覺又愛又恨! 全完發揮到100% cotton紙的功能, 混色/漸變一流, 手殘都可以畫出好靚的混色/漸變效果, 最致命的問題係張紙超級黃, 由於我只係畫花, 成幅畫暗淡無光, D花無晒生氣, 我接受唔到! 官網話佢有出High White (冇咁黃), 但我係香港搵唔到!