話說未有孖寶之前, 我有一段時間超級沉迷樹脂黏土迷你食品, 我叫呢個玩意做「小小廚」, 冇去上堂學過, 只係買咗本書嚟睇, 亦冇買咩日本製靚黏土, 只係上網買咗聲稱台灣製的樹脂黏土(1kg 唔駛HKD100), 同埋幾十蚊一盒的24色國產溫莎牛頓油彩, 亦冇買任何專用工具, 用最原始的方法一頭栽進黏土世界, 以下係我當年的作品:
和風西餐廳
中式點心
水果攤檔
新鮮菜檔
西餅凍櫃
2012年3月, 買咗一本樹脂黏土植物篇的書, 諗住向著黏土植物世界出發, 就係4月尾的時候, 我發現有咗BBs, 由於生理上+心理上嚴重不適, 我完全冇心情整, 加上孖寶出世後一直過著「只為生存, 冇咗生活」的日子, 我的小小廚, 就這樣bye bye咗!
兩年前曾經買過2包日本製樹脂黏土, 教孖寶整小小廚, 不過, 始終係男仔, 邊有咁好耐性同興趣整呢D手作仔(佢地打機就叻), 加上我買唔到油彩, 買咗Acrylic彩, 大鑊! D顏料同樹脂黏土溝唔埋, 完全溝唔到我想要的色, 勉勉強強同孖寶整咗幾個生果, 漢堡包, 叉燒包, etc. 我放棄喇! 仲有一包Luna Clay未用過, 擺咗兩年, 乾硬化咗, 救不回!
最近, 同孖寶係屋企玩泥膠, 求求其其整咗朵玫瑰花, 又求求其其咁做咗whatsapp的大頭相, 點知俾老媽發現, 叫我整一朵俾佢, 惟有叫老公淘一包聲稱係樹脂黏土的物體, 試吓整唔整到, 結果, 跟本唔係樹脂黏土嚟, 我唔知係乜, 好硬, 乾得好快, 又係同Acrylic彩溝唔埋, 原來好多留言都話「挺垃圾的!」果然, 淘寶D嘢都係垃圾! 勉勉強強整咗2朵花送俾老媽, .......errr........
睇落真係挺垃圾的!
老媽唔太滿意, 於是, 我的起心肝係香港搵材料, 由於樹脂黏土比較重身, 只係適合做迷你食品之類, 老媽要求的玫瑰花差不多係1:1, 所以冇可能用樹脂黏土整(太重了!), 上網研究吓, 原來自從8年前我離開咗黏土世界之後, 黏土界已經翻天覆地咗喇! 而家興玩「輕黏土」(係一種輕量的樹脂黏土, 質感粉嫩的, 乾咗似發泡膠!), 可以用嚟製作迷你食品、動物、卡通人物、花, etc., 吓? 整花都得? 會唔會好易爛架? 但係網上見到D人用輕黏土整花, 整到仲靚過真花, 嘩! 簡直係神級呀!
好啦! 咁試吓用輕黏土整花啦! Err..... 輕黏土係邊度買? 原來一般文具舖係冇der~ 我唔想山長水遠去手作仔舖頭買呀! 惟有睇吓屋企 / 公司附近有冇啦! 我記得屋企樓下間書局之前有Hearty輕黏土賣, 仲有唔同顏色選擇, 不過, 我再去睇已經冇得賣喇! 然後諗起之前係Aeon Living Plaza見過, 竟然俾我搵到Daiso牌一款叫做Light Polymer Clay, 中文寫住「輕量樹脂」, 最重要係Made in Japan都只係$12咋! 但係只有紅, 黃, 藍三色, 冇白色喎, 是但啦! 我讀小學時, 美術老師講過: 紅, 黃, 藍係三原色, 咩色都係由呢三隻色溝出嚟! 啊!
首先試用紅色做玫瑰花, 黏土質感一流, 好有當年樹脂黏土的手感, 但感覺更輕盈、更柔軟、更易搓, 而且好濕潤(開頭有少少黏手, 但擺一陣先至搓就OK), 加上延伸性同可塑性非常高, 可以壓得好薄都唔爛, 邊位好薄好sharp, 冇乾紋, 冇裂紋, 作品完成後, 大概2日就乾透 (以前整樹脂黏土要等一星期)。
花辦好薄, 邊位好Sharp!
然後要做玫瑰葉, 用藍色加黃色, 好容易就調到綠色黏土(比起之前要用油彩溝色, 這個超級簡單!) 仲可以做出唔同深淺的綠葉, 增加層次感。
三塊葉一組
由於想整Light Peach玫瑰, 需要白色輕黏土, 但搵咗幾間Living Plaza都冇, 惟有放棄, 咁睇吓有冇書局有Hearty輕黏土賣啦! 原來都唔係間間有, 最後係公司附近間商務搵到, 200g要80蚊, 嘩! 好貴呀! 網上手作仔店賣46蚊咋, 算啦! 我真係唔想山長水遠去買!
前晚開嚟用, 手感同Daiso差好遠, 好似搓緊舊發泡膠咁, 仲感覺到佢好似爆水珠珠咁(但睇唔到有水珠), 搓咗一分鐘左右, 手指頭開始痴住D纖維碎, 救命呀! 我係唔係買錯咗紙黏土呀? 好喇! 終於調到淺Peach色喇! 開始整花辦, 搓成水滴形狀, 用棍碌開, 吓? 點解裂邊??? 用手按壓好D, 但都唔可以壓得太薄, 好易爛! 然後, 可能舊黏土開始乾(但我已經用保鮮紙包住), D花瓣越整越乾, 仲唔小心撕開咗, 冇錯! 係好似紙咁, 撕開咗! 天呀! 又話Made in Japan? 個個都話Hearty輕黏土好好用, 點解我搞成咁架?
用Hearty輕黏土, 花瓣邊撕裂, 想喊!
另外, 用之前係Daiso買的樹脂黏土(真係樹脂黏土, 仲係Made in Japan), 整咗幾朵小花, 的確, 用樹脂黏土係做唔到輕柔粉嫩的花花效果, 加上樹脂黏土有光澤同少少透明感, D花睇落有D怪! 整好晒所有花材, 就可以插落個花盆度, 砌靚靚佢喇!
1. 將高密度海綿放入花盆, 插上綠葉, 圍住花盆邊舖好
2. 隨意插上小花
就係咁樣, 就挑起咗我條筋, 估唔到8年後, 我又重返黏土世界, 繼續8年前未完的黏土植物篇喇!
備註:
這個就係Daiso牌的輕量樹脂黏土, 超超超...級好用!
Daiso牌仲有另一款輕黏土, 千期唔好買, 超級垃圾!
後記@2020.10.06
老媽又要求我整多一盆黏土花俾佢做擺設, 難得老媽咁欣賞我的手藝, 就幫佢整多一盆啦!
