然兄逸弟: 終於有返自己興趣喇!

話說自從7年前, 知道自己有咗, 仲要係孖B之後, 就冇晒心機整小小廚, 之後, 孖寶出世, 一直都過住「只為生存, 毫無生活可言」的日子, 7年過去, 我終於可以搵返自己既興趣, 重拾放低咗廿幾年的畫筆, 真係好滾動!!! (眼泛淚光)

我一直都搵緊自己有咩興趣......

整小小廚? 半年前買過材料返黎, 教孖寶整, 但買唔到牛頓油彩, 係樓下書局求其買咗盒Acrylic顏料, 出事喇! 溝黎溝去都溝唔啱D色, 教孖寶整咗幾件作品就放棄咗, 舊黏土又臭(今次揼本買日本野, 以為貴就好, 點知衰過我當年買的台灣黏土)

彈琴? 我認命, 我係毫無音樂天份, 我的天份唔係音樂方面, 係畫畫、手作仔之類, 所以我
都係放棄, 屋企個數碼鋼琴係要黎睇, 填補我小時候想學琴的遺憾!

學日文? 經常去日本, 超鍾意日本文化, 恨不得下世投胎做日本人, 不過, 一諗起放工後仲要去上堂, 又要溫書考試, 放棄喇! 我呢世人已經讀咗兩世人的書, 我唔想再讀書考試!

學瑜珈? 已經學咗差不多一年(每星期一堂), D筋骨仍然係好硬, 別人輕鬆優雅, 我卻燃燒生命做每個動作! 我認命, 我都係冇運動天份, 我既強項都係畫畫、手作仔之類!

上星期放工後去行吓樓下新開的文具舖, 偶然發現Pentel新出咗(已經係2年前出der!)一款水溶性粉彩筆, 可以做到水彩畫的效果, 好似幾好玩喎! 以前中學玩開都係鉛筆素描, 木顏色, 廣告彩, 水彩真係未玩過, 可以一試!

於是, 老公幫我係網上Art Shop買咗盒Pentel 24色Vistage Watercolour Pastels同50張220gsm水彩紙(其實畫水彩要300gsm, 但220gsm做特價, 算啦! 用黎練習都抵!)

打開個盒的一刹那, 我覺得唔只買咗盒顏咁簡單,

而係好似買返人生的意義咁呀!

結果, 第一晚練習, D粉彩好難溶, 掃多幾吓之後, 張紙開始"梅", 加上220gsm的水彩紙唔夠厚實, 一遇水就起皺, 再加上我太心急, 一開始就想學人畫花, 結果...... 慘不忍睹!

但既然畫畫係我強項, 冇理由就咁放棄, 於是繼續上網睇人地D示範, 想畫真正的水彩, 的確係唔可以用Pentel Vistage Watercolour (佢只係要黎玩架咋!) 其實係要買水彩磚或者支裝水彩, 我惟有走去買多個調色碟, 將D粉彩預先溶咗落個碟度, 再練習一下基本筆法, 但原來水彩唔係想像中咁易(對於初學者黎講, 但畫慣咗就覺得好簡單, 因為係好隨意), 畫水彩好講求水量控制、玩顏色化開的效果、加上落筆要快、狠、準, 修改空間有限, 我估我仲需要好多時間練習, 先至可以開始畫。

上網睇人地D示範水彩畫期間, 見到人有示範粉彩畫(Pastel), Pentel個盒蓋都有Pastel呢個字喎, 既然佢D顏色咁難溶, 索性唔開水, 當粉彩咁畫囉! 結果......簡直係......驚為天人呀!!! 第一次畫, 用咗1個鐘左右, 已經有咁樣的效果, 我心滿意足喇! 望住幅畫, 我覺得我既畫畫天份, 返翻晒黎喇!