7月12日(星期四)係孖寶學校的下學期頒奬禮暨結業禮(又黎?!), 由於學校發通告邀請家長出席, 細佬又話好想爸爸媽媽出席, 於是, 我同老公就一齊去, 用行動黎支持佢兩個(但佢地兩個... um... 應該係唔會有奬攞架喎! 睇怕都係陪坐)
結業禮前夕, 細佬透露佢會攞「學科表現奬」, 嘩! 真唔真架? 你有冇聽錯呀? 至於哥哥, 我都唔敢問佢, 費事佢有比較, 唔開心啦! 我提議帶個Minion公仔返去同佢地影相, 細佬堅持話唔駛, 因為到時會有奬杯! 吓? 奬杯? 學校咁好呀, 借埋道具俾你影相!
由於係頒奬禮暨結業禮, 有顧問校長、校長、老師同好多家長, 我當然要盛裝出席啦! 至於孖寶爸...... err...... 我唔知點解佢只係著T-shirt囉!
頒奬禮暨結業禮當日, 家長同小朋友須於8:45前到達學校, 家長係禮堂就座, 小朋友先返課室換畢業袍, 然後由老師帶領進入禮堂。校長上台講咗幾句開場白, 就開始頒奬, 原來 -- 竟然 -- 哥哥都係攞「學科表現奬」(佢上堂發夢架喎! 老師真係好有同情心啊!) 最叻的小朋友係攞「整體表現奬」(個奬杯大D高D), 除咗呢D奬, 仲有禮貌奬, 服務奬, 圖工奬, etc. 原來, 係每個小朋友都有奬杯o既! (學校真係識做!)
大約30分鐘, 所有小朋友都攞咗奬杯, 之後就係自由拍攝時間, 可以係學校每個角落, 同各位老師影相, 不過, 天氣都幾熱, 孖寶唔想出去花園影相, 後來更加整蠱做怪, 唔多肯合作, 影到大約11點, 同校長、老師講再見, 就離開學校, 孖寶正式告別幼稚園的生活!
回家換衫之後, 就揸車去廸廸尼... 隔離間酒店... 入面間華特餐聽食Lunch, 由於我肚屙, 所以有好野都唔食得, 只係叫咗個帶子龍蝦汁意粉, 老公叫咗個semi-buffet lunch, 孖寶就share一個兒童餐。實在要讚一吓廸廸尼的餐廳, 職員服務態度好好, 先後有2個待應主動走黎幫我地影全家幅, 又有待應哥哥時不時行埋黎同孖寶傾吓計, 價錢唔算貴, 埋單$700有找!
孖寶去年11月黎過食Lunch, 今次第二次黎, 佢地好記得地下花園有個大迷宮, 雖然當日天氣非常熱, 好曬, 但佢地堅持要落去玩, 我同細佬一組, 老公同哥哥一組, 後黎, 我同細佬先走出迷宮, 哥哥竟然發脾氣, 話我地唔應該係呢個出口出, 要佢指定邊個出口出。我當然睬佢都傻啦! 拖住細佬行開一邊, 去海邊睇風景, 老公就負責鬧爆哥哥(Good! 幫我鬧埋我果份, 最好車多一巴添! 入我數!)
擾嚷咗15分鐘, 一家四口再玩多一次迷宮, 走喇! 由於真係好熱(再留係戶外地方真的會中暑der~), 所以原定去廸欣湖玩水上單車, 都要消取, 打道回府!
沒有留言:
張貼留言