不過, 上天可能驚我太過完美喇, 所以唔俾我生咁高, 仲要私人醒多N條毛俾我, 搞到我細細個就俾人笑我係「毛女孩」, 又話我可能係男性hormones太旺盛喎! 由於實在太多毛, 連我自己都覺得好樣衰, 所以孖寶媽好細個就開始同"N毛"展開咗幾十年的抗戰歲月。
初中的時候, 因為超多手毛, 於是偷偷地拎阿媽個眉鉗, 續條手毛鉗出黎, 結果 -- 緊係痛到標眼水啦! 但為咗靚, 係可以去到好盡! 不過, 完來鉗晒D手毛同手指毛出黎, 都唔會變成人家的白滑玉手der... 因為D毛孔係唔會消失, 所以最驚就係去買化妝品, D sales 通常叫你試上手, 一拎隻手出黎...... 我想搵loan捐, 同埋盡快試完, OK喇! 就呢支啦! 唔該!
第一次剃腳毛係中四暑假, 用界刀, 係! 冇錯! 係用界刀 -- 刮! 仲要冇用任可cream或gel, 齋刮, 結果 -- 緊係刮損啦, 仲要超級乾, 刮完成地都係白色粉末(死皮), 雙腳好似發霉麵包咁! 由於用界刀刮實在太痴線, 都係正正經經買返把剃刀算, 記得第一次去萬寧買剃刀, 超尷尬 (唔知點解)!
第一次修眉係中七畢業, 因為堂眉真係粗到好似成個刧匪咁, 不過, 由於第一次修, 當時又冇Internet可以上網睇人教修眉, 結果 -- 俾人發現: 「倚! 你修咗眉呀?...............條眉咁dup既? 咁多雜毛冇修既? 做乜唔去美容院俾人修呀?」(下刪一千字)
第一次用脫毛膏係阿媽幫我去藥房買, 阿媽推介話好過剃, 剃腳毛, 再生返出黎D毛好粗好硬, 用脫毛膏唔會有呢個情況, 同埋效果持久D! 結果 -- 嘩! 阿媽, D脫毛膏臭到咁既...... 支膏附送埋一個膠刮, 先搽脫毛膏, 等20分鐘軟化咗D毛, 刮得喇! 不過, 刮唔乾淨既, 同埋都係過幾日就生返出黎喎, 咁我不如用返剃刀, D膏咁臭, 又要等20分鐘咁耐, 都剃晒啦!
第一次用蜜蠟好似係表妹介紹, 佢話好過癮der! 真唔真呀? 等我試吓先! 於是就去Body Shop買咗一大盒 (好似都過$100), 返到屋企, 準備試脫腳毛先, 拎個盒出黎睇吓個用法說明先, 吓? (1) 要用熱水座融D蜜蠟, 唔可以擺入微波爐叮 (好麻煩喎!) (2) 用個匙更畢出黎 (個匙更畢完蜜蠟仲可唔可以畢野食架? 我係廚房拎架喎!) (3)搽落去要脫毛的部位, 用布(唔係毛巾)覆蓋 (無啦啦邊有布呀大佬? 惟有拿拿林搵吓有冇舊衫唔要剪D布出黎用住先, 咁兩隻腳咪要用N塊布) (4) 等佢凍咗乾咗, 好大力好快手咁撕出黎 (表妹推介好過癮呀! 好想講粗口) 結果 -- 都唔得既, D毛仲係度, 可能係D蠟未乾晒就撕!
第一次用電動脫毛器係大學一年班初戀, 出街的時候, 男朋友會搭你個膊頭, 我之前唔小心用剃刀整損咗, 要貼膠布, 仲俾佢問我咩事, 惟有求其講咗個解釋 (當然唔可以話我剃毛整損啦!) 之後拿拿林走去泰林 (好似執咗笠lu) 買咗個電動脫毛機 (好似$500幾, 好貴啊!) 結果 -- 阿媽! 好很痛呀! 電動脫毛機的原理係高速轉動一次過扯走你一排毛, 比起續條鉗出黎快, 但痛楚就係一條毛的N倍咁解囉!
第一次用鉗鉗Garlady毛, 好似都係拍拖時期, 由於用剃刀好易整損, 試過剃損咗, 第二日出街, 一出汗, 個Garlady......真係女人最痛! 所以我決定用鉗續條鉗出黎, 鉗第一條的時候真係要好有勇氣, 對住塊鏡, 遞高隻手, 對準, 用力鉗實, 大力扯佢出黎, 撐住呀... 嘩! 原來Garlady D毛係好深入皮膚(起碼有5mm), 同埋係生得好實, 要幾大力先鉗到出黎, 但當見到條毛同毛囊一齊扯埋出黎, 就會好有動力繼續鉗落去!
經過幾十年的抗戰歲月, 孖寶媽主要都係用剃刀 + 電動脫毛機, 配合唔同部位的需要, 雖然都有諗過去美容院永久脫毛, 但真係好驚俾人屈買幾十萬的療程或者永久留低巴痕, 所以唔敢去。兩三年前出咗家用彩光脫毛機, 聽落好驚喎, 冇醫生在場用彩光, 得唔得架? 今年暑假, 佢(部機)又賣廣告喇! 好心動呀! 諗咗成個月, 同唔同老公講好呢? 佢會唔會話我痴線? 結果 -- 鼓起勇氣同佢講, 佢竟然叫我試吓囉咁樣! 仲幫我去深水埗買水貨 ($2800幾), YEAH!
說明書有英文, 其實好易用
部機叉電要2個鐘左右, 夜晚要等孖寶瞓咗先至安心用部機 (費是佢地見到, 以為媽媽買支激光槍返黎打Star Wars, 又要玩埋一份!)
7月10日第一次試用 (手 + 腳 + Garlady)
(1) 沖涼時剃咗D毛先, 唔係打彩光時會有燒焦味
(2) 開冷氣, 預備一個好舒適的環境
(3) 開機, 部機會發出D風筒聲, 好似唔駛等就用得
(4) 用力壓落去皮膚度, 著綠色READY燈就可以撳制
(5) 初頭試3度係手臂, OK, 再試4度, 有少少灼熱, 但可接受
(6) 打腳用5度, 都OK
(7) 最後打Garlady, D毛咁粗咁深入, 緊係要5度啦! 嘩! 好痛! 打完紅咗同埋有D痛, 似乎唔可以去到咁盡喎!
(8) 搽cream保濕
左手揸機有D難度, 尤其後手臂近膊頭位置,
好多時都著唔到綠燈, 要壓得好實先得
係呀! 為咗靚, 女人係可以去到好盡架! 我叫佢試吓, 佢唔制, 但最後好無奈咁俾我打咗佢隻手一吓!
妖! 燒loan咗喇! 仲有陣燒焦味添!
可能佢D毛太濃密, 太吸光喇! wakaka......
至於我, 用完好似冇用過咁, 冇即時效果, 沖涼時剃唔淨的毛, 打完仲係度, 仍然屹立不倒, 好頑強!
7月11日第二次試用 (面毛 + 唇毛)
由於塊面都幾緊要, 當然唔可以去到咁盡啦(架機個度數)! (雖然平時每個月都有去診所打1064美白去斑) 今次試用2度, 冇感覺, 唔駛1分鐘已經打完, 一樣係冇即時效果, 只係面上有D俾部機壓過的印, 即時再敷個豆腐面膜, 呵護返面部脆弱的肌膚, 一樣係冇即時效果, 只係自我感覺良好, 好似做咗成個療程咁... hoho!
見咁多人話好用, 又可以用$50 Coupon,
減咗都係$88, 買黎玩吓!
後記@2017.07.25
隔咗兩星期, 尋晚第二次用彩光機脫毛, 其實D毛係一星期前已經生返出黎, 重災區係上手臂、小腿同膝頭位置, 基本上同冇用彩光冇分別。 至於Garlady、下手臂、手背、手指同大腿就好D, 雖然都有部份毛生返出黎, 但唔濃密, 比較幼, 所以都唔係好覺眼!
第二次打, 手臂、大小腿都用4度(其實都感覺到好似俾火壇咗一壇咁, 同埋打完D皮膚興興地, 手背同手指就用3度, 由於上次效果麻麻, 所以今次試吓唔好將D毛剃咁乾淨黎打, 留返少少毛係度, 較深色的毛會見到即時burn咗, 但淺色D毛打完仍然係屹立不倒, 希望打多幾次, 真係會見到明顯的脫毛效果, 唔駛再每星期剃毛啦!
後記@2017.08.07
又隔咗兩星期, 尋晚係第三次用彩光機脫毛, 其實一星期前, 手臂、手背、小腿同膝頭位置D毛已經生返出黎, 由於有機會著小背心, 手臂要見人, 所以都係要剃咗佢, 手背、小腿同膝頭D毛就由得佢, 做彩光之前都冇剃咗先, 諗住做彩光時順便一把火燒晒D毛佢, 其實都開始見到少少成效, Garlady D毛已經冇乜點生返出黎, 小腿雖然都有生返D毛, 但見到真係稀梳咗!
後記@2018.07.20
用咗部彩光脫毛機一年(其實只係開頭嗰6至7次要每隔2星期用一次, 之後(冬天)都係大約每隔2個月先至用一次), Garlady冇晒毛, 手臂、手背、小腿同膝頭位置的毛量減少咗99%(好滾動喔~), 而家只係有時間中有幾條毛仔, 就開部機出黎burn咗佢! 最重要係 -- 我唔需要每隔5日沖涼時剃一次毛(有時仲會錯手剃損忽肉), 慳咗好多好多時間! 對我黎講, 部彩光脫毛機係物有所值! (不過, 今年5-6月時, 部機壞咗2次, 拎咗去整都唔得, 最後Philips換過部二手機俾我, 如果再壞, 我諗我會轉會去Panasonic囉!)
後記@2017.08.07
又隔咗兩星期, 尋晚係第三次用彩光機脫毛, 其實一星期前, 手臂、手背、小腿同膝頭位置D毛已經生返出黎, 由於有機會著小背心, 手臂要見人, 所以都係要剃咗佢, 手背、小腿同膝頭D毛就由得佢, 做彩光之前都冇剃咗先, 諗住做彩光時順便一把火燒晒D毛佢, 其實都開始見到少少成效, Garlady D毛已經冇乜點生返出黎, 小腿雖然都有生返D毛, 但見到真係稀梳咗!
後記@2018.07.20
用咗部彩光脫毛機一年(其實只係開頭嗰6至7次要每隔2星期用一次, 之後(冬天)都係大約每隔2個月先至用一次), Garlady冇晒毛, 手臂、手背、小腿同膝頭位置的毛量減少咗99%(好滾動喔~), 而家只係有時間中有幾條毛仔, 就開部機出黎burn咗佢! 最重要係 -- 我唔需要每隔5日沖涼時剃一次毛(有時仲會錯手剃損忽肉), 慳咗好多好多時間! 對我黎講, 部彩光脫毛機係物有所值! (不過, 今年5-6月時, 部機壞咗2次, 拎咗去整都唔得, 最後Philips換過部二手機俾我, 如果再壞, 我諗我會轉會去Panasonic囉!)
係記@2020.09.28
原來買咗部彩光脫毛機已經3年喇! 「N毛問題」已經徹底解決(差D忘記咗以前每隔5日就要剃毛的日子), 對我黎講, 部彩光脫毛機唔止係物有所值, 簡直就係扭轉咗我的命運! 而家部彩光脫毛機都好少用(因為D毛真係好耐都冇生返出嚟), 今年好似只係用咗2-3次 (只係間中拎出嚟叉電, 好似話唔用都要keep住得閒叉吓電, 唔係會壞!)
沒有留言:
張貼留言