暑期興趣班

仲有一個星期, 孖寶就開始放暑假喇!

為咗唔想孖寶暑假期間日日留係屋企(做宅男)咁悶, 媽媽係今年4月又幫佢地報咗暑期班 (舊年都有報暑期班 -- English Smart Kids + 繪畫班)。 其實佢地今年2月至4月期間, 媽媽都幫佢地報咗繪畫班, 但個繪畫班似手工班多D, 佢地2個都唔係咁like, 所以媽媽報暑期班之前, 都有做意見調查, 繪畫班OUT! 最後揀咗兩兄弟都有興趣的 -- 小小魔術師 + 入廚自理家政班 + 好玩非洲鼓班, 三個班都冇學術成份, 真心想孖寶過一個開心的暑假, 玩佢地鍾意玩的野!

不過, 同學校輔導老師講開, 報咗呢三個暑期班, 老師同我分析:

1) 魔術班可以訓練佢地大腦思維, 同埋要係別人面前表演, 可以幫細佬練大膽D

2) 入廚家政班可以訓練佢地的耐性, 因為煮野食要一步一步咁跟住個部驟去做, 小朋友見到自己咁有心機整出黎的製成品, 亦會有滿足感, 同埋自我肯定

3) 非洲鼓班就啱晒好動同埋手多多的哥哥, 亦可以訓練佢地身體的協調, 對音樂、節奏、拍子的觸覺, 音樂又可以陶冶性情, 舒發情緒, 啱晒郁D就爆喊控制唔到自己情緒的哥哥

啊! 原來係咁, 媽媽報名果時都冇諗咁多野, 唔該晒老師的詳細分析。

其實媽媽都想佢地學吓樂器, 未必一定要學琴 (細佬成日都話想學琴, 每次企係個琴前面就同媽媽講: 媽媽, 呢個係C, 我搵晒個琴入面的C俾你睇, 佢只係今年年初試學咗一堂半個鐘, 但就記得點搵個C音, 媽媽覺得細佬理解力都幾高, 係學音樂的材料黎!) 但爸爸就成日話, 佢地仲咁細, 遲D先啦! 之前未夠4歲, 就話等到4歲先學, 夠4歲, 就話佢地冇興趣, 等佢地有興趣先學, 而家細佬話有興趣, 就話細佬可能係一時痴咗條筋啫! 阿爸爸, 唔明點解你千方百計要阻止佢地學樂器呢? 抑或你想慳返D錢咋?