自家製藍莓撻 Homemade Blueberry Tart

由於整曲奇餅已經整到零失敗 (每星期整一次), 可以升呢喇, 試整其他款色的甜品, 用曲奇餅的麵團整撻底係最簡單不過, 而整得好個撻底, 就已經可以整多好多款式的甜品, 早前上網買咗12個鋁製蛋撻模, 不過, 每次都只係用得2個, 因為一次過整一打撻出黎, 都唔知送俾邊個食好, 一家四口都要食幾日先至食得晒, 加上技術未成熟, 都係整住2個試吓先!

今次試整藍莓撻, 本來係想整雜果撻, 但要用咁多材料, 先至整得2個撻, 唔符合成本效益, 見老公買咗2盒藍莓, 就用佢D藍莓整撻, 其他材料都係屋企垂手可得, 唔需要特別預備。

材料:

撻底 (請參考牛油曲奇)

餡料 (即係藍莓同撻底之間果pat黃色的吉士醬Custard)

蛋黃一個
砂糖30g
粟粉一湯匙
低筋麵粉一湯匙
牛奶100ml
雲呢拿香油一茶匙

製作方法

撻底

1. 先用製作牛油曲奇的方法整好麵團
2. 預備2個撻模 (呢款撻模唔需要預先搽油, 脫模容易, 讚!)
3. 取出適當份量的麵團, 搓成圓球, 放於撻模中央, 邊向外按壓, 邊旋轉, 直至麵團平均覆蓋撻模, 邊沿凸出約2mm
4. 預熱焗爐至160度, 焗大約15分鐘至金黃色
5. 取出略為攤涼, 脫模待用

吉士醬

1. 蛋黃同砂糖打勻
2. 分2-3次加入粟粉同低筋麵粉, 攪勻
3. 牛奶用微波爐叮熱 (唔好滾)
4. 將熱牛奶慢慢加入蛋漿中, 不停攪拌, 感覺變成滑滑的蛋液
5. 將蛋液擺係電爐上加熱, 小火, 要不停攪拌
6. 蛋液會開始變得杰身, 繼續快攪, 直至變成所需要的杰身度
7. 攤涼待用

舖面

1. 洗淨藍莓 (7cm撻模每個大約需要7-8粒藍莓)
2. 抹乾水份

將吉士醬放入撻底, 上面擺藍莓, 最後撤上糖霜, 完成! (雪凍食更佳)

小確幸

話說媽媽尋日中午開始感覺胃頂, 到咗放工返屋企後, 就開始出現疑似腸胃炎的陣痛, 飯後, 正當陣痛過後, 媽媽軟弱無力攤軟係梳化之際, 兩隻豬仔見機不可失, 立即拎晒D架餐出黎, 玩醫生與病人的遊戲!

細佬: (戴住個玩具聽筒) 你係唔係唔舒服呀?
媽媽: 係呀! 好痛肚!
細佬: 啊! 要打針 (拎起支針筒扮打), 你要食藥 (拎住隻匙更餵我), 每日食3啖! 落到個胃度, 跟住就會嘔返出黎
媽媽: 吓? 我唔想嘔喎! 嘔好辛苦喎!
細佬: 要嘔返出黎, 連埋D血!
媽媽: 吓? 仲要嘔血? 媽媽就黎死喇!

之後就輪到哥哥
哥哥: 你係唔係唔舒服?
媽媽: 係呀! 好肚痛! 要搽D薄荷膏, 按摩吓個肚!
哥哥: 吓? 啊! 我幫你! (然後用佢隻細小的食指仔點落去樽薄荷膏度, 搽落媽媽個肚皮, 再用兩隻小手來回按壓)
媽媽: 唔該然然! 你好錫媽媽呀!
哥哥: (開始大大pat咁挖D薄荷膏出黎, 然後兩隻手仔初初初, 初到熱晒, 再幫媽媽按肚皮)
媽媽: 好C服呀! 唔該晒然然! 你咁乖, 幫媽媽按摩肚肚, 下次你肚痛, 媽媽幫你按返丫!
哥哥: 唔駛! (豪氣地) 我自己得架喇!
(支薄荷膏冇咗三分之一)

然後就係繼續醫生與病人的遊戲...

哥哥: 媽媽, 你要擘大個口照吓
媽媽: 吓? 我唔係喉嚨痛喎!
哥哥: 媽媽, 要用個放大鏡照吓
媽媽: 吓? 照邊度?
哥哥: 照個肚
媽媽: 但係你唔駛扯到媽媽件衫咁高架喎, 果度已經唔係個肚黎...

細佬: (拎住把玩具較剪走埋黎)
媽媽: 吓? 咩療程黎架? 好驚喎!
細佬: (拎住個鐵製tomica火車頭過黎)
媽媽: 吓? 呢個係咩儀器黎架? 肚痛要用呢個?

兩個仔都咁關心媽媽, 咁錫媽媽, 媽媽真係好幸福啊! (幸福 x 2)

備註: 爸爸當時落咗街買肚痛藥俾媽媽! (幸福 x 3)

前世情人

人家話阿仔係媽媽的前世情人, 而我好肯定, 細佬就係我的前世情人! (哥哥, 你唔好唔開心, 媽媽今世一樣咁愛你!)

佢地出世的時候, 護士先後拎咗哥哥同細佬俾媽媽睇, 唔知點解, 抱住哥哥個護士俾我睇完哥哥就抱開咗佢, 只有抱住細佬個護士叫我錫啖細佬......

出世第二日傍晚, 細佬嘔奶, 俾護士推咗出去, 然後送咗去新生嬰兒加護病房 (之後先至通知我, 嬲!), 媽媽去到加護病房睇細佬, 當時先至係第二眼睇返自己個仔, 見到佢好細好弱小咁瞓係個氧氣箱入面, 因為唔飲得奶, 要插喉吊葡萄糖水, 媽媽眼前呢個人仔, 只係認識咗2日, 見過2次面, 但就為呢個人仔而擔心, 甚至淚水不由自住的流落黎, 唔通我地前世已經識認?!

細佬出世時唔靚仔 (反而所有姑娘都讚哥哥靚仔, 幫佢改咗個花名叫梁朝偉), 細佬D皮膚好黑, 冇頭髮, 眼凸凸, 仲無啦啦會反白眼 (曾經懷疑佢係唐氏), 加上佢成日喊, 喊到人心都煩埋, 所以阿嫲同爸爸都唔鍾意照顧佢, 但作為媽媽, 當呢個世界冇人鍾意佢的時候, 媽媽仍然愛佢! 媽媽每晚都抱住佢, 唱歌俾佢聽, 所以細佬由細到大都好痴媽媽!

媽媽覺得同細佬之間有一種好微妙的感覺, 或者就係人家所講既 -- 緣份! 做母子都好講緣份, 講真, 細佬唔係靚仔, 又唔係肥肥白白可愛型, 仲成日喊, 又成日嘔奶 (係噴射式, 餵佢果個真係好驚), 但就可能因為細佬咁樣, 媽媽更加覺得自己要保護佢, 照顧好佢!

細佬好迷戀媽媽, 乜都要媽媽, 餵飯, 換片, 沖涼, 暗瞓覺, 陪玩, 都係要媽媽, 早排細佬成日話想同媽媽結婚, 可惜媽媽已經同爸爸結咗婚喇! 你第二時大個搵個好女仔結婚啦!

細佬好唔想媽媽返工, 佢會朝早7點扎醒起身, 走去媽媽間房, 同媽媽講: 我唔想你返工呀! 我好掛住你呀! 到媽媽放工返黎, 佢又會話: 媽媽, 我好掛住你!

最近, 細佬臨瞓前都會搵媽媽, 同媽媽say goodnight, 然後主動kiss媽媽咀咀 (雖然佢都有kiss爸爸), 媽媽真係甜到入心! 媽媽攬住佢細小的身軀, 真係唔想佢咁快大, 而家個size好好攬!

講故事

最近係一年一度的書展, 社交網站全部都係朋友帶仔女去書展買書的相, 連新聞都大字標題話D父母係書展度用幾萬蚊買D咩教材俾仔女...

至於我呢? 之前已經講過, 我本身真係唔鍾意睇書(唔好問我兩個Master Degrees點讀返黎既!) 再加上我一直都唔認為書係雖要用錢買 (堅持去圖書館借, 呢個係我作為納稅人惟一可以享用到的福利), 由於所有育兒理論都話睇書對小朋友好, 為咗唔想執輸, 於是媽媽就係孖寶兄弟兩歲左右, 開始去圖書館借書俾佢地睇!

於是就開始咗每晚由媽媽主持的Bedtime Story時段, 初初開始講故事, 可能佢地真係太細個, 唔係好明媽媽講乜, 又冇心機聽, 媽媽就好似對牛彈琴咁, 仲記得哥哥係咁指住書上面隻雀仔話: 飛機! 飛機! (俾佢激死!)

不過, 媽媽自己唔鍾意睇書, 都堅持定期去圖書館借書俾孖寶睇, 終於有少少起色, 細佬慢慢培養出對睇書的興趣, 每次媽媽帶D圖書返屋企, 佢都急不及待揭開黎睇, 每晚都主動去揀書俾媽媽講故事, 冇故事聽會喊, 哥哥就被動D, 通常每晚都要媽媽提佢, 去圖書角揀書喇, 佢先至慢慢走去揀, 有時好似唔想我講故事咁, 但問佢想唔想聽, 佢又話想聽, 不過, 佢揀的書多數係遊戲書, 佢唔鍾意坐定定係度聽故事。

以前, 佢地太細個, 所以媽媽主要係借一D生活上的書, 例如: 上學的第一天, 看醫生, 生病了, 牙痛了, 去海灘真好玩, 學游水, 交朋友, etc.  到佢地開始返學, 媽媽就主要借一D培養良好品格的書, 例如: 有禮貌, 有公德心, 誠實, 不驕傲, 不爭吵, 注意健康, 注意安全, etc.

最近, 佢地開始對以上種類的書冇乜與趣, 媽媽又要改變一吓策略, 專家話繪本好喎, 但實際上就唔知點好, 聽講話可以培養想像力, 創作力之類掛, 媽媽之前都嘗試揭吓D繪本黎睇, 一揭開, 嘩! 畫得咁核突既 (唔好意思, 應該係我唔識欣賞), 一係就抽象派大師的手筆, 恕我真係睇唔明佢畫乜, 一係就用水彩油到化晒, 濛渣渣都睇唔到乜黎, 一係就成本書99%都係空白, 只係每頁中間有一個主角同一隻動物, 然後就係每一頁都係一樣, 小朋友會有興趣睇每一頁都係一樣的書嗎?

媽媽心諗繪本究竟點好法呢? 實在借唔落手喎! 就算借咗返去, 一係就媽媽都唔知點講, 一係D圖畫嚇到佢兩個發惡夢, 一係就悶到佢兩個走開玩其他野!

但係專家話繪本好喎! 媽媽惟有死死地氣再去圖書館睇吓, um... 都有D睇得明, 畫得比較像真度高D! (繪本就係要畫到唔像真嘛, 咁真點訓練小朋友想像力呢?) 勉強借咗幾本, 返去試吓佢地有冇興趣先!

不過, 媽媽的堅持 (借書 + 陪佢地睇書 + 講故事) 都有少少成果:

1. 佢地好鍾意叫媽媽教佢地讀封面上面D字, 然後自己拎住本書, 一個個字指住黎讀 (有時貪玩, 特登發另一個音)

2. 佢地想自己講故事, 尤其媽媽已經講咗N次的故事, 佢地會每人講一頁, 可以訓練佢地組織句子同語言表達的能力, 當然都要用埋記憶力啦

3. 佢地鍾意角式扮演, 嘗試諗吓故事中的人物面對當時的情況, 會講咩說話, 可以訓練佢地邏輯思維

當然, 講故事唔應該咁功利主義, 要訓練佢地乜乜物物, 其實簡簡單單的Bedtime Story時段, 就係瞓覺前一齊享受一段美好的親子時光!

後記@2021.04.21

5年後偶然睇返呢篇「講故事」, 我好開心, 孖寶由2歲到而家8歲, 仍然都係好鍾意每晚聽媽媽講故事(早兩日, 哥哥因為要溫英文默書, 冇得聽媽媽講故事, 好唔開心, 爆喊!)

經過呢6年以來的悉心裁培, 孖寶已經養成咗閱讀的興趣, 除咗打機之外, 就書不離手, 真係可以用"廢寢忘餐"嚟形容佢兩個睇書的情況! (媽媽都幾成功, GOOD!)

自從孖寶升小二, 媽媽就開始去圖書館搵一D所謂「橋樑書」俾孖寶, 幫助佢地由BB圖畫書過渡去純文字書, 因為佢地唔可以一世睇BB書, 但一時間又唔可以轉晒純文字書(超級悶, 會嚴重打擊孖寶睇書的興趣!) 誤打誤撞之下, 搵咗一D科學漫畫(嚴格嚟講, 漫畫其實唔算係橋樑書!), 佢地睇咗幾本之後, 就深深愛上, 冇錯! 係愛上! (睇完一系列科學漫畫之後, 佢兩好似醫學博士、傳染病學家、植物學家、生物學家上身咁, 成日發表偉論!)

疫情之下, 圖書館關閉, 冇得借書睇, 爸爸改為上網係台灣買(連埋運費都平過係香港書局買, 大概係香港的6折左右), 孖寶每次都好期待D書快D運到嚟香港, 然後, 一收到, 就急不及待拆嚟睇(比拆聖誕禮物仲興奮), 見到佢地真係好鍾意睇書, 媽媽都覺得"老懷安慰"(媽媽心諗: 鍾意睇書的人, 應該都唔會壞得去邊?!) 希望孖寶繼續熱愛睇書, 係書海中得著豐富的知識!

準備升K.2 (1)

孖寶兄弟今年9月就會升K.2, 由於今年K.1被編排讀下晝班 (因為佢地唔係正選, 只係後補, 所以只有下晝班), 學期初, 媽媽向校方要求轉上晝班, 老師都好好, 話會盡量安排, 當時校長更私底下同爸爸講, 其實上晝班有一個同學退學, 另有一個同學搬咗屋, 睇怕遲少少都會退學, 果兩個位會留俾我地咁話喎...

哥哥係一個極需要瞓覺的小朋友, 可能因為佢鼻敏感, 夜晚瞓覺D鼻鼾聲好大聲, 估計應該有少少睡眠窒息, 同埋佢經常扎醒話抖唔到氣, 所以晚上的睡眠質素唔好, 導致佢日間的時間都好想瞓覺, 記得舊年開學初期, 佢12:45要返學, 但係佢12點就話眼瞓 (已經差不多早上9點先至起身, 只係起身活動咗3個鐘就話眼瞓要瞓覺, 俾佢吹脹!) 返到學校, 成日都釣魚, 甚致真係瞓著咗, 老師惟有抱佢埋一角俾佢瞓, 試過瞓足3個鐘, 起身就放學喇!  後來好咗少少, 有時佢係學校hub眼瞓, 老師會叫佢去廁所洗個面, 精神D! 不過, 就算捱得到上堂唔瞓覺, 通常放學離開校門就會即刻"暈低", 所以阿嫲每日都要預備架BB車俾佢瞓住返屋企!

至於細佬, 佢戰鬥力一向好強, 雖然朝早同哥哥差不多時間起身, 但可以戰鬥到放咗學, 自己行埋返到屋企先至瞓, 叻叻!

不過, 最大的問題係, 放咗學返到屋企都已經下晝4:45, 有時5點先至瞓, 瞓到夜晚6:30, 爸爸返黎先至開始叫醒佢地, 細佬通常都可以叫得醒, 但叫醒哥哥, 佢仲好眼瞓, 會發顛, 爆喊, 然後要人抱, 仲要喊足30分鐘, 再加埋開youtube俾佢睇, 平靜返佢個情緒, 結果同8點先至叫醒佢食飯係冇分別! 由於兩個都瞓到夜晚7點, 結果全晚都好精神, 就算10:30陪佢地返房瞓覺, 都要搞到11:30先至真正瞓著, 媽媽...媽媽... 就黎死架喇!

上學期結束, 老師通知媽媽, 上晝班有位, 問我下學期轉唔轉, 但媽媽諗起, 佢地啱啱先至適應咗間學校, 又識咗一班同學仔, 突然轉上晝班, 除咗要重新適應過作息時間 (係好事黎!), 仲要乜同學仔都唔識, 佢地又唔係同班, 媽媽驚佢地會唔開心, 再加上, 如果孖寶轉返上晝班, 媽媽朝早跟本帶唔到佢地返學, 阿嫲亦冇可能咁早黎到, 工人姐姐一個人冇可能搞掂佢地起身, 刷牙, 換衫, 食早餐, 孭書包, 返學, 所以就同老師講, 都係唔轉住喇! 等K.2先轉啦!

到咗下學期尾, 老師話下年K.2上晝班有位, 仲可以安排兩兄弟同一班 (因為老師話細佬見到哥哥係度, 個心定D), 其實轉上晝班有好多好處 (除咗諗唔掂點樣湊返學之外):

1. 早睡早起身體好, 孖寶兄弟可以早D瞓, 會生長得好D (佢地而家可能太夜瞓, 生長速度緩慢, 特別係高度!)

2. 孖寶兄弟早D瞓, 媽媽都有好處, 起碼唔駛同佢地搏鬥到11:30 (媽媽係早瞓的人, 自從孖寶出世之來, 遲瞓/冇覺好瞓已經令到媽媽死咗好多腦細胞, 睇怕已經折壽咗10年)

3. 返上晝班, 下晝就可以返屋企瞓覺, 早D瞓晏覺, 早D起身, 唔駛搞到食晚飯前先至起身, 仲要爆喊一輪

4. 瞓醒晏覺, 仲有時間可以食吓茶點/生果, 然後沖涼, 食晚飯, 做功課, 玩一陣, 講故事, 瞓覺, 作息有序

5. 佢地夜晚早咗瞓, 媽媽終於可以做吓自己鍾意的野, 重拾興趣, 彈吓琴

由於佢地返下晝班, 發展到後期, 已經演變成朝早10點起身, 10:30食早餐, 11:45食午餐 (根本食唔落), 4:30放學返到屋企處於極度hyper狀態, 5:30先至瞓晏覺, 6:30起身 (根本叫唔醒, 或者發顛), 8點食飯, 8:30做功課, 9點沖涼, 9:30飲夜奶, 玩到10:45返房, 11:30瞓覺... (哥哥有時無啦啦爆喊, 最後搞到12點幾先至瞓)

下年K.2返上晝班, 媽媽計過, 要7:30起身, 7:45刷牙, 8:00食早餐, 8:15換校服, 8:30出門口 (媽媽同工人一齊湊佢地返學, 然後跑去搭MTR返工), 8:45返到學校

為咗要焗佢地早D瞓, 所以一定要朝早早D叫佢地起身, 佢地一放暑假, 媽媽就叫工人姐姐8:00叫醒佢地, 初頭幾日, 姐姐用咗30分鐘先至叫得醒佢地, 今個星期好D, 8:00叫, 通常8:15都醒得到, 然後就係午睡時間, 都係要焗, 工人姐姐好叻, 通常都焗到佢地瞓, 下晝2:30焗, 3:00左右瞓得著, 然後4:00叫醒, 通常叫到4:15都會醒 (哥哥雖要更長時間同耐性), 然後就係夜晚, 爸爸6:30放工返屋企即刻幫佢地沖涼, 7:15食飯, 7:45做功課, 玩一陣, 8:30飲夜奶, 8:45刷牙, 9:00講故事, 9:15去廁所, VV, 換片, 返入房, 通常10:00左右都瞓晒! 不過返學要7:30起身, 應該要9:30瞓著, 所以仲要再早D返房瞓, 夜晚可以活動的時間變得更加趕! Anyway, it's a good start!

孖寶放暑假 (上)

孖寶兄弟由上星期五開始放暑假, 可能返學實在太開心, 好似去玩咁, 所以佢地對於放暑假可以唔駛返學, 冇乜太大反應。

孖寶兄弟放暑假有咩做? 答案係: Hea!

去旅行?
冇! 因為暑假機票太貴, 爸爸媽媽唔捨得...

去學游水?
冇! 一來爸爸話游水唔駛學, 二來阿嫲加工人帶唔到佢地去學游水, 阿嫲成日話頭暈, 難得帶孖寶落樓下會所玩, 已經係阿嫲的極限

去上暑期班?
咁都有既... 逢星期三、五, 一個鐘, 起碼叫做有出過街, 好過一日24小時都留係屋企咁慘!

好在星期六、日, 爸爸媽媽都會帶孖寶出去玩, 去沙灘, 去泳池, 去行商場, 去探小朋友, etc.

至於媽媽, 都希望可以係暑假期間陪吓佢地, 所以媽媽提意去兩日一夜澳門, 都叫做離開過香港, 當帶咗佢地去旅行, 希望真係可以去到啦!

孖寶兄弟3歲7個月零3日!

孖寶兄弟自從3歲之後, 語言及體格的發展已經冇之前的變化咁大, 呢個時候的小朋友, 應該開始發展更深層次的系統, 包括性格的定型, 思維的模式, 想像力, 創造力, 社交行為模式, etc.

哥哥 (體重27lbs, 身高91.5cm)

性格

樂觀, 樂天, 不拘小節, 大情大性, 純真, 天真無邪, 冇機心, 對所有人都好友善, 所以係學校都有唔少朋友仔

情緒

哥哥對自己情緒的控制都幾差, 仍然會因為好小的事, 爆喊, 盡情發洩內心的不滿, 可以喊超過一個鐘, 爸爸媽媽仍然試緊唔同的方法, 希望可以減少佢喊的頻密程度同埋縮短佢每次喊的時間

責任心

哥哥個人冇乜責任心, 自己野唔會想自己做, 例如: 朝早起身除片換底褲, 佢明明識做都唔肯自己做, 寧願爆喊, 喊足一個鐘先至收聲。哥哥唔肯認錯, 明明係自己錯咗, 都話: 冇呀! 我冇喎! 叫佢講對唔住, 佢就另歪面, 唔睬你!

思維

非常自我中心, 要別人先滿足自己, 無耐性, 唔鍾意等待, 想做就做, 唔顧後果, 唔聽別人意見, 認為自己的方法就係惟一的方法

都會睇別人眉頭眼額, 只要人家對佢語氣唔好, 佢就扁咀, 爆喊, 然後話: 媽媽, 我想你温柔D呀! 我好驚你呀!


細佬 (體重30lbs, 身高93cm)

性格

小心謹慎, 面對陌生人較拘謹, 對小朋友有少許敵意, 但聽話, 順從, 願意受接別人意見, 願意妥協

情緒

細佬的情緒相對較為穏定, 但最近都喊多咗 (可能學咗哥哥), 不過, 佢喊唔會超過30秒, 佢可以好快冷靜落黎, 聽爸爸媽媽同佢講道理。細佬有時會將自己唔開心/不滿的情緒隠藏, 學校老師話細佬比較壓抑, 唔得釋放, 開心都唔敢笑, 呢方面可能需要爸爸媽媽多關心佢的情緒表達

責任心

細佬好有責任心, 好緊張自己D野, 食完飯會自己係書包拎D功課出黎做, 做錯事叫佢認錯, 佢會即刻講對唔住, 叫佢去門口隔離罰企5分鐘, 佢會照做

維思

有條理, 可以順序講出即將要做的事, 例如: 食飯先, 食完飯睇youtube, 跟住沖涼, 跟住玩一陣, 刷牙, 聽媽媽講故事, 去vee vee, 洗手, 瞓覺; 另外, 細佬遇到困難, 或事情不如預期的時候, 會諗辦法去解決

自理能力

爸爸媽媽最想訓練佢地的自理能力, 因為佢地自理能力越高, 爸爸媽媽越唔駛take care佢地咁多, 可以輕鬆D, 例如: 自己食飯, 食完飯自己抹咀, 掉垃圾, 拎返D碗/杯入廚房, 除衫沖涼, 將D污糟衫擺落洗衫籃, 除尿片換底褲, 換衫褲, 著襪/除襪, 著鞋/除鞋, 係書包拎D功課出黎做, 做完擺返入書包, 下一步應該係訓練佢地自己沖涼, 自己刷牙, 咁爸爸媽媽就可以輕鬆好多喇! hoho

興趣班

話說孖寶兄弟今年5月第一次參加興趣班, 吓? 3歲幾先至參加興趣班? 係香港, 6個月大就要參加Playgroup, 1歲要學西班牙文, 2歲學彈琴喇喎! um...

我同爸爸本身都唔係怪獸家長, 爸爸更加主張乜都唔好參加, 佢覺得完全冇需要, 以前參加Playgroup, 係媽媽想佢地熟習一下課室的環境, 有老師, 有同學, 有規舉, etc. 自從舊年9月升K1後, 已經冇去Playgroup, 我同爸爸一向奉行從生活中學習, 例如: 去超級市場學習食物名稱, 去公園上體育課, 去餐廳學習禮儀, 家中所有物件都可以成為教學的工具......

今次之所以參加興趣班, 純綷希望佢地可以熟習一下社區中心的環境, 同埋記住由屋企行去社區中心的路線, 之所以要熟習環境, 係因為媽媽幫佢地報咗2個暑期班, 之所以要報暑期班, 係因為媽媽覺得佢2個放暑假, 日日留係屋企會好悶 (因為阿嫲唔會帶佢地落公園玩), 參加暑期班可以唔駛一日24小時留係屋企咁悶啫!

一連7堂的藝術至多FUN班 (媽媽簡稱畫畫班) 話咁快上晒, 孖寶兄弟似乎都幾鍾意上畫畫班, 因為每次都可以搞到成手都係顏料 (係屋企會俾爸爸禁止), 帶佢地返第一堂的時候, 爸爸媽媽同佢地一齊去, 爸爸又話行得遠 (屋企樓下夠近啦! 但雙倍價錢喎, 爸爸, 你捨唔捨得先?), 又話呆等一個鍾唔知做乜 (OK! 下次唔預你囉, 我叫工人同我一齊帶孖寶去), 又話星期六黃金時間, 阻住去街 (我已經盡量避開D黃金時間, 我冇報暑假7-8月的星期六架, 同埋我本來唔係揀呢個時間架, 但人地開唔成班, 惟有安排孖寶返呢班) 由於佢地第一次冇媽媽陪 (返教會都要媽媽陪), 媽媽初頭都有少少擔心, 但佢地見到枱上面擺滿顏料同工具 (佢地最鍾意玩較剪), 就自動波搵個靚位坐低 (兩兄弟當然要一齊坐啦!), 媽媽見佢兩個冇咩野, 就行咗出課室外面。

一個鐘頭好快過 (媽媽覺得), 老師開門, 小朋友排排隊出黎, 佢地見到媽媽就好開心, 笑笑口同媽媽講: 媽媽, 你睇吓, 我整咗呢個! 老師同我講, 佢兩個好乖, 好專心!

佢地每次都好期待下星期再返畫畫班, 細佬話: 不如聽日再黎過, 我話聽日係星期日呀! 我地係返星期六, 要等到下星期六先至再返喇!  星期五晚食飯, 媽媽會提佢地, 聽日返畫畫班喎, 細佬仔通常都會Yeah!  佢地有時又會同媽媽講: 媽媽, 我好想返畫畫班呀!

蜜桃芝士蛋糕

材料:

忌廉芝士 250g (一盒)
砂糖 50g
牛油 50g
雞蛋 2隻
雲喱拿香油 1茶匙
切片蜜桃 1罐

做法:

1. 所有材料放室温, 預備一個6寸蛋糕模, 用焗爐紙圍邊及舖在底部, 用錫紙厚厚的包著蛋糕模外圍 (因坐水焗, 不能滲水)

2. 忌廉芝士與砂糖混合, 用電動打蛋器打勻成cream狀

3. 雞蛋略為打勻, 分5-6次拌入芝士混合物中

4. 牛油坐熱水坐溶, 分幾次拌入芝士混合物中

5. 最後加入雲喱拿香油

6. 將芝士混合物倒入蛋糕模中

7. 預熱焗爐160°c

8. 底盤加熱水約5mm, 坐水焗約40分鐘至全熟, 蛋糕面變為金黃色

9. 拿出焗爐稍為待涼, 趁熱脫模, 以免出現倒汗水

10.  放於不鏽鋼架上待涼, 包上保鮮紙, 放雪櫃雪一晚

11.  切片蜜桃瀝乾水, 雪凍, 待用

12.  把切片蜜桃舖上蛋糕面即成

13.  凍食最佳

孖寶兄弟下水禮2016

今年未到夏季已經好熱, 孖寶兄弟早於5月7號(星期六)已經下咗水禮, 其實當時d水都幾凍 (媽媽覺得), 但孖寶有得玩就乜都唔理, 結果...... 緊係病咗, 仲眼睛發炎, 唔知關唔關事>_<

原來佢地好鍾意玩船仔, 所以爸爸又淘咗2隻消防車造型的船仔俾佢地去沙灘玩, 當然都淘咗2張浮床俾我地自己啦！但到而家7月都未有機會玩……

因為次次去海灘, 爸爸媽媽都係負責推艇, 冇得玩

睇返舊年d相, 細佬去沙灘驚到唔敢落地, 全程要媽媽抱, 到咗今年, 細佬不但唔驚, 仲要拖住媽媽同佢一齊投奔恐海, hoho

卡通印模曲奇

材料 (約25塊份量):

低筋麵粉 125g
粟粉 25g
牛油 100g (感覺太邪惡的話, 可減到85g)
砂糖 50g (用糖霜效果會更脆, 想少甜可減到40g)
蛋黃 1個
鹽 少許
(聽說將部份低筋麵粉換成高筋麵粉, 做出來的曲奇不易碎, 但我曾經用低筋粉都可以搞到起晒筋 (用起了筋的麵團焗出的曲奇會變成石頭般堅硬), 所以不敢嘗試, 我加蛋都不敢連蛋白, 不過, 其實只要於加入麵粉後避免過份攪拌, 就沒有問題)

做法 :

1. 牛油與糖打勻 (盡量打耐D)

2. 分3-4次加入蛋黃, 拌勻

3. 低筋麵粉及粟粉拌勻, 分幾次篩入

4. 拌勻後, 變成粉團

5. 把粉團放入雪櫃約20分鐘 (因為剛做好的粉團太腍軟, 不能印模, 要雪致適當的硬度, 千期唔好貪快雪入冰格)

6. 取出粉團, 取一個約乒乓球大小的份量, 用木棒壓平(7mm厚), 用模具印出圖案 (雙手沾粉, 木棒沾粉, 托盤灑少少粉, 防止黏模)

7. 預熱焗爐170°c

8. 焗10-15分鐘至金黃色即可

9. 攤涼即可食用 (隔一日食口感更佳, 孖寶兄弟非常鍾意食, 媽媽下次會整多D)

後記:
試咗加入約10g高筋麵粉, 但做出來的曲奇好似過期餅乾咁, 林晒! 就算加返多D低筋麵粉, 做出來係不易碎, 但口感死實, 千期唔好太過相信網上的所謂秘方, 始終個個口味唔同, 慢慢試到啱自己口味, 就係獨門秘方喇!