哥本善良(2)!

哥哥仍然係會因為一D好小的事而大發雷霆, 喪喊, "典"地, 歇斯底里, 可以喊足一個鐘! (其實佢舊年12月果時曾經好過一段時間, 仲以為佢大個仔喇, 開始識講/聽道理, 但到咗今年1月, 又變返以前咁樣...唉!)

雖然係咁, 其實哥哥真係好善良, 好單純, 對所有人都充滿愛!!!

1. 媽媽上個月去做Laser脫疣, 成塊面有超過100個傷口, 結咗焦之後成面一點點, 樣衰到要戴口罩出街, 媽媽每日放工返到屋企, 哥哥就會走埋媽媽面前, 問: 你塊面好返未呀? (仲會好細心咁望吓媽媽兩邊面)  媽媽呢幾日傷風, 鼻塞, 要噴鼻, 佢唔隱心睇, 次次都會有咁遠走到咁遠, 媽媽噴完鼻攤咗係sofa, 佢又會走返黎睇吓媽媽有冇事, 仲幫媽媽按摩吓個鼻!

2. 雖然兩個成日爭玩具, 細佬仲成日打哥哥, 但哥哥仍然好錫細佬, 出街成日都主動伸手拖細佬, 成日邀請細佬同佢一齊玩。 有次媽媽好惡鬧細佬, 差D出手打細佬時, 哥哥走埋媽媽身邊扁晒咀, 好可憐咁喊, 話: 媽媽! 我好驚你打細佬呀!  有野食一定預埋細佬果份, 有次姑媽送咗2包橡皮糖俾佢地, 哥哥自己拎一包, 然後追住細佬, 點都要俾一包細佬!

3. 有次食完飯, 媽媽奬佢地每人食一條朱古力手指餅, 佢地好開心, 然後媽媽發現原來仲有2條, 哥哥即時開心到彈起, 話: 好野! 爸爸媽媽都有得食! (佢當時個表情仲開心過自己有得食!)

4. 爸爸有次同哥哥講: 我唔開心!(扮野), 哥哥即時問爸爸: 你做咩唔開心呀? 我錫返你丫! (爸爸即時冧晒!)

哥哥仍然會無啦啦好大力咁攬住你條頸, 然後話: 我好鐘意你! (Sweet到爆)