其實然然跌親的第二日, 我同爸爸已經不停上網搵資料, 跌斷牙 --> 細菌入侵牙髓 --> 牙仔壞死 --> 變灰黑 --> 杜牙根 / 剝牙, 我地亦帶佢睇過一個私家兒童牙科專科, 醫生建議杜牙根 (50-90%成功) 或者剝牙 (100%成功), 但係由於佢當時只係得2Y5M, 我實在好驚佢要全身麻醉接受手術, 所以爸爸另外搵咗一個政府的兒童牙科專科, 呢個醫生建議補咗2隻牙先, 再觀察情況, 如果真係生牙瘡時會好痛, 但生完牙瘡, 隻牙D神經線基本上已經死晒, 唔會再痛, 但問個醫生係唔係要杜牙根, 佢就話然然咁細個, 做唔到喎!
6月同9月的牙科覆診, 幸運地, 然然冇生牙瘡, 醫生只係幫佢補返補牙的物料, 但唔夠幾日就甩咗! 而最重要係照X光, 但由於然然唔合作 (唔肯咬住塊膠), 所以係照唔到既!
上星期六, 日, 然然係咁話牙仔好痛, 痛到大喊, 我同爸爸心知不妙, 應該都係出牙瘡, 到星期日晚上9點, 佢個上唇腫晒, 初頭仲以為佢係食物感敏, 但星期一睇兒科, 醫生話唔似係敏感, 咁媽媽更加肯定佢係生牙瘡, 雖然爸爸話上網見過生牙瘡唔係咁!
星期一晚放工返到屋企, 然然上唇冇咁腫, 但偷偷睇吓佢對門牙, 發現左邊門牙近牙肉邊緣已經有少少變灰, 爸爸都承認應該係生咗牙瘡!
逃避咗半年, 今日又上網係咁搵資料, 爸爸唔建議睇醫生, 原因係:
1. 半年前已經決定咗唔會同佢杜牙根 (係咩? 我係諗住等佢大D再算, 唔係決定唔做喎!)
2. 生牙瘡好小事, 好多人生完再生都冇野 (但上次個醫生話會影響恒齒發育喎!)
3. 好多小朋友 (上一代)都跌崩牙架啦! 以前D父母乜都唔識, 都冇理佢地 (但我地而家有知識喎, 明知有影響都唔理佢?)
4. 你睇醫生, 佢實叫你剝咗佢, 你接唔接受到先? (呢點我好認同, 我真係接受唔到個仔做冇牙仔, 佢而家先至得3歲, 距離6歲換牙, 仲有3年喎!)
5. 都係外觀問題啫, 個仔又唔係要做明星
6. 佢始終都要換牙架啦, 乳齒黎啫, 唔駛咁緊張喎
7. 我細個都係咁曳, 成日跌穿頭, 試過跳水撞崩牙, 佢係男仔黎, 係要有D傷痕先至夠Man
8. 隻牙啫, 冇生命危險就得啦
(下刪N個原因)
唔知點解, 個個做爸爸的, 好似唔會好緊張自己小朋友的情況, 抑或係做媽媽的, 太過份緊張呢? 我又諗返起佢當日跌親的情景, 諗返起佢以前對大板牙好可愛, 好想可以時光倒流, 冇發生當日的意外...... 諗到呢度, 媽媽仍然係好想帶佢睇吓醫生, 聽吓專業意見 (其實都估到醫生講乜), 媽媽真係好想救返佢隻牙仔, 但又好驚佢要承受全身麻醉的風險, 始終冇咗隻牙唔會有生命危險, 但為咗隻牙, 要承受全身麻醉的風險, 媽媽真係決定唔到! 但如果剝牙同杜牙根都要全身麻醉, 媽媽會選擇杜牙根保住隻牙仔囉! 唉......
後記@30.11.2015
爸爸突然又話都係想帶然然去睇牙醫, 雖然都估到醫生會講乜 -- 剝咗隻牙佢! 但爸爸話想去睇吓照唔照到X光, 於是我同爸爸今朝一早就帶然然去, 因為係當急症咁睇, 所以冇得Book, 要等醫生得閒, 本來仲以為要等好耐, 好在等咗唔夠一個鐘就叫然然, 醫生話隻牙已經灰咗, 即係壞死咗 (我知!), 於是醫生話不如試吓照唔照到X光 (爸爸正有此意!), 初頭都擔心佢又好似上次咁, 唔肯咬住塊膠, 但媽媽唱歌仔 (jolly phonics), 加上拎包熊仔餅出黎氹吓佢, 佢竟然肯咬住5秒, 終於影到喇 (雖然歪咗少少)!
醫生睇片, 佢話其實X光都睇唔到D乜, 就咁睇, 見到入面兩隻恒齒 (3歲小朋友只有齒冠, 牙腳未出黎), 不過, 我就咁睇, 兩隻恒齒好似冇咩異樣, 應該冇斷到, 醫生話通常都會建議剝牙, 唔會建議杜牙根, 因為杜牙根唔係100%有效 (杜完牙根都有機會生牙瘡), 杜牙根同剝牙都要全身麻醉, 政府醫生一定係選擇100%有效的方案, 即係剝咗隻牙, 一了百了!
爸爸媽媽當然唔想然然做冇牙仔啦! 惟有問醫生...
爸爸: 如果唔剝, 由得佢, 咁會點呀?
醫生: 個牙瘡唔會自己好返
媽媽: (心諗: 咁即係長期係度?)
爸爸: 咁係唔係要食藥?
醫生: 食藥只係縮細個牙瘡, 止痛, 治標唔治本
媽媽: 咁係唔係會影響恒齒?
醫生: 有機會架! 可能會牙腳歪咗, 但呢個同個牙瘡無關, 而係撞親的時候已經撞歪咗牙腳, 牙腳歪咗, 隻恒齒要剝咗佢! 另一個可能就係隻恒齒會有撻野
媽媽: (心諗: 咁呢個我都聽過!)
爸爸: 咁有幾大機會係咁樣? 咁只係有機會啫, 唔係一定?
醫生: 都話唔埋架, 有機會咁解囉!
媽媽: 咁其實算唔算話好迫切, 唔剝牙唔得?
醫生: 咁又唔係好迫切!
媽媽: (個心都定D)
醫生: 咁你地會唔會決定剝牙? 因為都要排期
媽媽: 係唔係要排成一年架?
醫生: 差唔多啦! 你預返咁上下時間
爸爸: 咁排住先囉!
醫生: 係啦! 幫你排住先啫~
揸車返屋企途中, 診所打電話俾爸爸, QE排到2018年10月, 東區醫院快一年, 2017年10月......是但啦! 到時都5歲, 我由得佢隻牙自己剝落算喇!
下年2月1號返去覆診, 爸爸話如果可以keep住照X光, monitor住個情況都OK啦! 希望然然對門牙可以平安過渡去到換恒齒啦!
忽然又諗起阿媽尋日同我講果句說話: 緊係啦! 你唔好以為(小朋友)咁易大, 唔係咁簡單架! 要好多心機架!
後記@14.12.2015
然然粒牙瘡終於係尋日爆咗, 而家扁晒, 但唔知有咩後遺症, 同埋唔知幾時又會再生過......唉! 唔知可以拖到幾時......
後記@22.02.2019
早兩日, 然然係學校上運動堂時, 跳繩唔小心仆到, 佢話趕唔切用雙手撐住個地下, 成個上唇直接仆落地下, 佢傷得好犀利, 流晒牙血, 牙床D肉撞到淤晒同腫咗, 上唇條筋斷咗, 睇怕牙床入面D恒齒都凶多吉少, 我同老公講, 如果唔係之前已經仆斷咗對門牙, 睇怕今次都肯定斷, 其實我想帶佢去睇牙科急症, 但老公覺得睇黎都冇用, 都係照X光, 就算對恒齒真係有事, 都已經冇得救! 唉! 我都冇眼睇, 真係唔知點解然然可以"論盡"成咁樣! 如果將來換咗恒齒, 佢都係咁成日仆, 斷咗就真係一世架喇! ......
後記@23.9.2019
上星期二, 爸爸帶然然去學童牙科保健覆診, 我估係之前醫生見到佢隻牙咁樣, 可能提議脫咗佢, 嗰朝早上, 我仲同爸爸講, 如果醫生話要剝牙, 就剝啦! 爸爸話可能都係叫佢照X光, 結果, 爸爸估中咗! 醫生只係同佢照X光, 基本上, 牙床入面D恒齒已經Ready, 睇X光片唔覺佢隻門牙(恒齒)有事! 醫生亦冇話要剝咗隻爛牙佢! 呢幾日, 哥哥話隻爛牙有D鬆, 我就希望佢快D甩, 到時隻恒齒生出嚟, 就真係睇到有冇事喇!
後記@21.10.2019
早幾日, 然然話隻爛牙有D痛, 今朝一早起身, 然然爆喊, 完來佢個上唇腫晒(好似
想問問 係邊搵到政府兒童牙科？
回覆刪除即係菲臘牙科醫院嗎？
係灣仔的麥理浩兒童牙科
回覆刪除請問小朋友粒牙瘡爆咗是否已好返? 有沒有再復發? 最後有沒有剝牙呢? 因囝囝也面對同樣抉擇...>_<
回覆刪除我當初都好唔開心, 喊咗幾日, 係我! 唔係阿仔!
刪除牙瘡謝咗, 幾個月之後又痛咗一次, 醫生話今次冇得食抗生素, 只可以食消炎止痛藥, 之後, 呢幾年都冇事, 但隻牙變咗灰色, 阿仔而家6歲, 就黎換牙, 遲D甩牙, 生返隻恒齒出黎, 就知有冇影響......
好多謝然然媽媽的回覆！我絶對明白你的心情，做媽媽真係好唔容易！對任何有關仔女的事情都特別容易憂心.....希望然然生返的恆齒冇事（這也是我對自己囝囝的盼望！）
回覆刪除希望我地大家的囝囝生返隻牙都冇事啦!
刪除你好然然媽媽，我小朋友又係上兩個月撞到門牙，今日發現有牙瘡，牙醫話要杜牙根。想問下你當初是否衹食抗生素等牙瘡自己爆?牙醫有無放濃?隻牙幾時變灰? 唔好意思咁多問題，謝謝你! 唉。。 我都好唔開心好想喊呀。。
回覆刪除然然生牙瘡時, 牙醫開咗抗生素同退燒藥俾佢食, 之後, 個牙瘡就自己謝咗(好似冇爆!), 但之後, 隻牙就慢慢變灰, 牙醫話隻牙已經壞死咗, 所以應該唔會再有痛的感覺, 我唔想幫佢剝牙或杜牙根, 因為兩者都係要全身麻醉(有風險), 然然而家6歲, 呢2年都再冇生牙瘡, 或牙仔痛, 遲D換牙, 就知道有冇影響恒齒了!
刪除Hi 你們好，我囡囡今年5歲，因為佢有兩隻分別係兩邊同一個範圍，大牙低咗少少，所以導致佢好對稱咁蛀左牙，又其喺右邊蛀牙，牙肉開始生牙倉，之後我地幫佢擦牙嘅時候整爆左佢，而家就謝咗，不過最近又發現喺門牙，牙肉旁邊又生左一粒仔。睇過兩個牙醫，牙醫都話佢太細個未適合剝牙或者杜牙根，而家諗住11月再去睇第三個醫生，我想問吓，其實如果唔搞佢，佢唔痛係，係咪可以拖延到幾年，等佢生恆齒嘅時候再算。
回覆刪除