幼稚園面試大作戰2015

繼2014年11月一輪地獄式幼稚園面試大作戰之後, 今年又嚟過... 唉!

因為一心係想佢地做大B, 可以醒D, 叻過人, 老師都會鍾意佢地多D (媽媽一相情願咁諗), 所以今年又報讀下年的K.1, 不過今次冇密集式面試, 只係報咗4間: 培正, 民生 (兩間都係一條龍名校, 只係玩吓大抽奬), Greenfield (英文學校全日班, 讀咗唔駛出去再補英文), 力勤 (最近屋企的全日班, 得工人一個湊放學應該都OK, 因為同嫲嫲的照顧方法, 教育理念太大分歧, 讀咗全日班, 嫲嫲的參與可以減到最少)

7.11.2015 (星期六) 早上10時
民生面試, 好多人係學校門口排隊, 好似阿婆輪米咁, 仲有大批警察維持秩序(其實目的係抄牌), 由於附近冇車位, 就由我一個人帶住佢2個入去interview, 全校好多中國人老師, 但就由幾個鬼婆interview, 全程英文, 問英文字母, 問數字, 問顏色, 問物件, 係幅圖上面指出黎, 識英文就攞100分, 唔識英文就企係度, 好想講粗口(心入面已經講咗), 跟本就唔係考小朋友的發展, 係考佢識唔識英文, 但你又冇話你自己係英文學校囉 -- 民生!

14.11.2015 (星期六)
中午12:15, Greenfield面試, 首先係一班小朋友由家長陪同入去班房, 聽鬼婆講故事, 唱歌仔, 旁邊企住3個中國人老師, 可能係評緊分, 兩兄弟係房入面最有反應的小朋友, 其他都係呆晒, 緊係啦! 我兩個係大B, 牌面都已經贏晒! 鬼婆係咁讚佢地: so cute! so cute! 尤其哥哥, 佢走去拖住老師對手! 跟住就係入另一間房interview, 考分享食物(餅餅), 認形狀, 砌積木, 對答環節, 完全冇問題, 然後老師同媽媽傾吓佢地如廁同進食的情況, 應該係想瞭解佢地的自理能力!

下午4:00力勤面試, 仍然見到上次Open Day好惡個老師, 校長好nice, 其他老師就高矮肥瘦乜都有, 感覺冇茵怡D老師咁nice, 咁關心小朋友, interview 內容對佢地兩個都冇難度, 起碼唔駛好似上年咁 (上年都IN過力勤), 驚細佬喊/扭計, 今年對答如流, 問姓名, 年齡, 串珠仔, 圖形配對, 考收拾, 完全冇難度, 連老師都睇得出細佬係讀緊幼兒班, 媽媽惟有講真心話: 係! 佢係讀緊K.1, 但我想佢做大B, 嚟緊想佢repeat K.1......

5.12.2015 (星期六) 將會IN培正, 亦係爸爸媽媽最希望佢地入到的幼稚園, 唔係貪佢係名校, 係貪佢一條龍, 小學部100%會收晒自己幼稚園的小朋友, 起碼黎緊呢9年都唔駛再煩!  不過, 機會都應該好微, 算啦! 大抽奬啫!

後記@7.12.2015
上星期六終於都in埋最後一間 -- 培正, 好多人排隊, D怪獸家長仲要爭先恐後, 好似先到先得咁, 大佬, 乜唔係要interview既咩? 行咗3層樓喘晒氣, 終於都入到課室, 同普通幼稚園冇乜分別, 好快就interview, 家長唔可以陪, 但孖寶冇喊, 出黎都冇喊晒! Good! 已經好難得, 如果上年去in, 應該喊到入唔到去in囉! 要被迫放棄!  晚上, 老公收到信, 係民生幼稚園, 竟然收咗佢地, 唔係waiting list,  係收咗, 不過又係下晝班, 但真係喜出望外, 冇諗過會收, 老公上次in完仲鬧爆間學校!