戒片(2)

自從9月幼稚園開學之後, 孖寶兄弟就被老師要求戒片 (實在要讚老師的耐性, 同埋佢地真係有辦法) 經過差不多3個月, 孖寶兄已經成功戒咗日間時間著片片, 而家最新情況係:

1. 日間係屋企的時間都唔需要著片片, 去vee vee用大人廁所, 去poo poo用potty, 間中都會賴尿, 但兩個都好少 (10次以內), 只係哥哥有時忍唔住, 整濕咗少少條底褲, 或者有少少poo poo係條底褲仔度

2.  上星期爸爸買咗塊兒童廁所板, 哥哥第二日夜晚已經肯用塊兒童廁所板屙poo poo, 係佢人生第一次係大人廁所屙poo poo, 佢仲好開心, 親手沖廁

3.  返學時間唔駛著片, 只係著底褲 (雖然間中都會賴濕, 哥哥更加試過每日都係著便服放學, 書包仔就吊住一大袋濕晒的衫褲鞋襪, 不過最近幾個星期已經冇呢個情況)

4.  落去平台玩滑板車或者落樓下商場食飯都唔駛著片, 係佢地自己要求唔著, 哥哥話: 「我忍到架嘛!」 反而爸爸媽媽好擔心, 每次佢話急急, 就抱住佢衝去會所/商場個廁所

5.  去長途街要坐爸爸車車, 爸爸就一定要孖寶兄弟著學習褲, 因為萬一賴濕咗就好大鑊, 但係媽媽會教佢地, 雖然係著咗學習褲, 但都唔可以賴落去架, 要去廁所一定要同爸爸媽媽講, 結果哥哥真係忍到, 全日都冇賴到落去學習褲度, 好叻仔! 星期日去公公屋企, 佢仲係公公屋企屙poo poo, 媽媽話公公屋企冇兒童廁所板, 媽媽扶住你屙啦! 佢竟然冇扭計, 好合作, 真係要錫晒佢! 至於細佬仔, 出街好多時都唔去廁所, 問佢要唔要去, 佢一定係話唔駛, 然後就屙晒落條學習褲度... 激死人!

6.  係屋企午睡(大概2個鐘)都冇著片, 驚佢地屙濕會舖隔尿墊, 哥哥賴濕過一次, 但佢懵然不知, 細佬都賴過一次, 佢自己都feel到, 即時起身爆喊, 阿嫲話細佬有一次突然扎醒話要去vee vee, 去完又瞓返, 好叻! 佢地開始有意識知道咩叫做急尿, 同埋可以忍住

7.  細佬本來都識得去potty屙poo poo, 但上星期唔肯用potty, 一定要著片片, 然後係片片入面屙... 唉!

本來以為細佬戒片會快D, 因為初頭佢真係好肯用potty屙vee vee同poo poo (反而哥哥就成日係學校賴濕, 老師仲話可能佢果組肌肉仲未ready, 有時掛住玩, 賴濕咗都唔知, 但呢幾個星期, 哥哥好大進步, 佢真係忍到, 同埋要vee vee或者poo poo, 佢意識到, 仲識得同我地講

至於夜晚瞓覺, 仍然要著片片, 因為每朝起身, 佢地包片都係好大包, 好重, 似乎瞓覺期間仍然會屙好多vee vee, 不過, 都唔急得黎, 戒咗日片已經好開心 (我係講個銀包), 因為真係買少咗好多片, 慳咗好多錢! 上個月去旅行時係日本買的學習褲, 到而家都未用完, 勁呀!