穿衣失敗教學(上)

當越嚟越瞭解自己的身型(一向係XS size上身, M size下身, 生完仔之後個膊頭橫向發展到可以去打美式欖球, 加埋對肉肉手臂同埋對甲組腳), 我開始受接呢個係不可改變的事實(做運動係冇用der~), 然後, 我開始發現(雖然都已經太遲), 有D衫款, 無論今季有幾流行, 無論人家著得有幾好睇, 都千萬碰不得!

慘不忍睹(1)

雖然一向係XS size上身, 都唔係吓吓買XS, 太貼身的衫, 睇落成個人發脹咗, 反而著件S或M碼的Tee, 有少少鬆身, 睇落成個人瘦返晒!

慘不忍睹(2)

眾所周知, 黑色有顯瘦效果, 不過, 唔係件件黑色都顯瘦, 本來以為飄逸的袖邊可以或多少遮掩一下對肉肉手臂, 結果...... 出事! 手臂顯得更肥美, 仲將我個美式欖球膊頭無限伸延!  反而露膊加有袖的款式, 就完美無瑕地縮短咗我個膊頭同收埋咗對肉肉手臂喇!

慘不忍睹(3)

夏天咁熱, 我都好想著飄逸的小背心, 涼快一下! 結果......又出事! 小背心令我對肉肉手臂一覽無遺(天呀!連腋下D贅肉都"必"埋出嚟!), 加上飄逸的設計, 睇落成個人發脹咗! 夏天想涼快一下, 著一字膊都可以, 其實闊肩絕對唔建議著一字膊, 所以一定要用長頭髮遮遮掩掩!

慘不忍睹(4)

日系簡約衫好多都係無肩線的設計(唔知點解?), 呢種設計係闊膊頭的天敵, 無肩線加雞翼袖, 簡直就係災難級別! 不但將我個美式欖球膊頭無限伸延, 仲露出我手臂最肉的部份, 天呀! 不過, 如果無肩線但袖比較長, 可以垂返落嚟, 就可以扭轉命運喇!