40+

話說39+1的時候, 無論係外觀, 抑或心態上, 都唔覺得有咩變化......

嚟到40+, 其實都冇咩變化......

不過, 最近上Amazon JP睇衫, 好似突然有所領悟!

好多日本的40+媽媽, 身型同我差不多(細粒), 佢哋D衣著好優雅大方, 有氣質又有型, 我突然覺得, 我都係時候要升級成為一位優雅媽媽! (自從孖寶出世後, 我就由淑女變成咗湊仔婆)

上網參考咗好多日本媽媽的返工同休閒穿搭, 我總括咗以下幾個重點:

(1) 中長裙/超長裙(長到落腳趾尾的款式)

要優雅, 一定唔可以再著短裙, 所以衣櫃入面D短牛仔裙可以Bye Bye喇! 就算及膝裙都唔得, 同樣冇得留低!  另外, 著裙都有技巧, 一定要"攝"衫, 然後張條裙有咁高"休"咁高, 拉高腰線, 令自己身高由155cm目測成165cm! 至於裙的款色就不限, 可以係傘裙、A字裙、包臀裙、蛋糕裙 (當然就要跟據自己的臀圍/大腿寸數嚟選擇, 唔好自暴其短啦!) 顏色可以淨色, 可以有圖案或碎花。

(2)  中長闊褲/超長闊褲(長到落腳趾尾的款式)

我要強調係闊褲, 要有氣質又有型, 唔可以再著窄身/貼身褲(用嚟打底的leggings除外), 一定要著闊褲, 所以衣櫃入面D Skinny Jeans可以Bye Bye喇! 牛仔短褲、沙灘褲同及膝裙褲都唔得, 可以留返嚟做家居服! 不過, 如果有直筒/筆筒褲, 都可以暫時留一留! 另外, 選擇闊褲要好小心, 一定要有cutting, 冇cutting由頭闊到落腳的闊褲, 會令你下身腫脹, 變成大媽咁款! 西裝布料會挺身D, 睇落去下身瘦D, 加上深色的話, 會有型D, 但就休閒感欠奉, 唔太適合夏天出街/去旅行著, 所以我仍然好努力搵緊休閒闊褲。至於著闊褲都有技巧, 都要"攝"衫, 但著休閒闊褲就唔可以"攝"晒成件衫入去, 要"攝"前唔"攝"後, 營造不經意的感覺, 更重要係可以遮掩個大屁屁!

(3)  黑白淨色上衣

要襯出大方的氣質, 一定要著黑色或白色的淨色上衣, 我要強調係淨色, 但可以有暗花, 或者衣領袖口有特別設計, 原則係要簡潔, 同埋淨色、淨色、淨色! (太重要, 所以要重覆3次!) 針織或挺身的衣料會顯得有氣質D, 適合返工, 而棉質T裇就可以親出休閒的效果。如果衣櫃入面有其他顏色上衣, 都可以Bye Bye喇! (黑白間條上衣除外, 因為黑白間條可以打造日系無印風!) 我好鍾意粉紅色, 以前忍唔住買咗好多粉紅色衫, 都可以送埋去堆田區!

(4) 裇衫

要有氣質又有型, 可以著裇衫, 無論係斯文返工裇衫, 休閒鬆身裇衫, 抑或連身裇衫配腰帶, 都可以。衣櫃入面D吊帶小背心, 娃娃裝可以Bye Bye喇! 佢哋唔再適合40+

(5) 高踭鞋/高踭涼鞋

日本媽媽甚少著波鞋, 佢地無論居家旅行, 一定要著高踭鞋/高踭涼鞋, 極其量只會著Converse之類的帆布鞋, 唔似得香港咁通街都著Adidas波鞋。我曾經都係Jelly Beans高踭鞋Fans, 但近年腳痛, 真係著唔到高踭鞋(著1日返工對腳痛足3日, 所以每星期只可以著1次), 高踭涼鞋就更加唔駛諗, 得幾條帶, 叉晒D腳趾出嚟, 點樣可以著住嚟搭地鐵呀? 我唔想俾人踩爆腳趾或者著到腳趾外翻, 所以惟有著厚底白鞋返工, 但就即刻冇晒優雅感!

(6) 手挽袋/手袋

要優雅感, 一定要用手挽住個袋, 唔可以斜孭, 唔可以上膊, 係直接用手挽住個袋, 無論個袋大定細, 一定要挽住, 咁先至優雅大方, 即係話我個要嚟擺飯盒上膊返工大袋, 可以送去堆田區, 因為一D都唔優雅! 如果要優雅地帶飯返工, 都可以帶大袋, 但唔可以上膊, 一定要用手挽住個袋 (不過要咁辛苦, 咁重都唔可以上膊, 咁我情願唔帶飯喇!) 惟一可以用膊頭孭住的, 就只有小手袋(條帶部份係金屬同好幼嗰款), 不過, 由於容量有限, 女士除咗要帶銀包、電話、紙巾, 仲要帶補妝用品出街, 真係要好有技巧去執袋先得! 至於我, 自從孖寶出世後, 我就由淑女變成咗湊仔婆, 湊住兩個仔出街, 一定係帶個大奶粉袋, 或者索性孭個帆布背囊, 真係好佩服日本媽媽, 帶住兩件出街, 仲可以挽住個細袋, 唔通佢哋個袋係多啦A夢個百寶袋嚟?