然兄逸弟: 孖寶單車

話說自從2016年5月, 爸爸淘咗兩架平衡車俾孖寶之後, 我家假日的主要節目就係 -- 帶孖寶去公園踩平衡車。

至於孖寶當年入讀K1, 爸爸為咗鼓勵佢地返學唔喊, 用作做奬勵的兩部滑板車, 只係玩咗大半年, 就已經被平衡車取代, 自此打入冷宮, 永不超生! 雖然爸爸都曾經慫恿過孖寶兄弟玩返滑板車, 但佢兩個都不為所動!

今年年頭, 媽媽開始覺得, 佢地玩平衡車的時候, 對腳屈曲得好明顯 (應該係孖寶長高咗!) 然後, 媽媽每次見到, 就會同孖寶爸講, 似乎要買返架單車俾佢地喎, 唔可以再玩平衡車! 但每次孖寶爸的答覆都係: 遲D先啦! 仲玩到呀! 冇野喎!

至於孖寶, 每當媽媽同佢地講: 其實你地唔可以再玩平衡車喇! 大個仔喇! 要踩單車! 冇人成世都係踩平衡車架! 但孖寶好抗拒, 堅持要一世踩平衡車, 仲話如果爸媽買咗架單車返黎, 會dump咗佢! (要佢地唔踩平衡車, 轉踩單車, 就好似搶咗佢地最心愛的玩具一樣, 佢地會同你死過!) 而呢個時候, 孖寶爸都會加把咀: 咪由得佢地繼續玩平衡車囉! 有咩問題? (媽媽係呢個家裏面, 基本上係唔會有人聽我講野der!)

可能由於媽媽成日講, 加上有朋友個女, 同孖寶一樣都係5歲, 已經學識踩單車(堅係識踩, 冇用輔助轆), 爸爸的態度開始有D軟化: 好啦! 問朋友借架單車黎先, 俾佢兩個試吓!

於是, 上星期六, 我地就問咗朋友借咗一架12寸的小童單車(當然係冇輔助轆啦!) 由朋友個女即場示範, 哥哥試踩, 不過, 佢好驚, 未能成功! 加上唔想嚇親哥哥, 所以放棄!

星期日早上, 爸媽又帶孖寶去交通城, 都係叫哥哥試踩先(因為哥哥一向富冒險精神, 又比較有運動細胞, BB時學坐、學爬、學企、學行, 都係哥哥學識先!) 至於細佬, 佢好堅持唔學, 要一世玩平衡車!

教阿仔踩單車呢個咁重要的任務, 緊係由我家德高望重的大老爺負責執行啦! 我呢個做阿四既, 緊係幫手拍video, 記錄低呢個咁重要的時刻啦!

哥哥初頭都有D驚, 其實佢平衡到, 只係控制唔到個軚盤, 架單車炒黎炒去, 加上佢唔慣踩腳踏, 成日踏空, 雙腳離開咗個腳踏, 而爸爸就一直扶住佢個膊頭, 佢好有信心, 繼續嘗試! 過咗5分鐘, 哥哥好似掌握到個技巧, 爸爸可以鬆開少少對手, 有時冇扶住佢, 佢都得得地, 踩到幾步! 再過咗5分鐘, 爸爸已經可以完全放開手, 俾哥哥自己踩, 哥哥仲識得用手制黎刹停車, 然後好穏陣咁停落黎! (哥哥只係用咗10分鐘就學識, 好勁呀!)

媽媽正式宣佈: 哥哥學識踩單車喇!!!
(見到哥哥學識踩單車, 媽媽諗返起哥哥BB時學識行路, 好震撼! 好滾動! 果刻, 真係有D眼濕濕!)

爸爸話要記低呢個日子: 2018年2月25日, 哥哥學識咗踩單車喇!

由於細佬親眼睇住哥哥學識踩單車, 佢個心態已經係呢10分鐘內180度轉變咗! 幾時到我踩呀? 我都想試呀! 不過, 由於時間關係, 要下午先至可以繼續!

下午2:30, 我地帶細佬去屋企附近單車徑試踩, 但由於係星期日, 單車徑好多車, 好多人, 好危險! 要換場, 去咗魷魚灣村村口個足球場, 細佬雖然平時冇乜運動細胞, 但始終都叫做有over 1.5年踩平衡車的車齡, 所以細佬仔都係用咗10分鐘左右就學識咗! 只係起步果一下, 佢未掌握到(就跌就跌咁), 佢堅持要爸媽推佢起步。

半日之內, 佢兩個由非常抗拒踩單車, 發誓一世都唔會踩單車 --> 變成愛上咗踩單車, 係爭住要踩! (因為只係借咗一部單車, 要兩個輪流踩) 廿四孝的爸媽, 見到此情此景, 心入面都不約而同, 起咗同一個念頭 -- 不如買兩架單車俾孖寶!

於是就帶咗孖寶去屋企隔離條村的單車舖, 睇吓有冇啱佢地踩的兒童單車! 單車舖老闆娘介紹我地買台灣製的PONY, 價錢同大陸車唔係相差好遠, 但質素好, 冇咁易甩鍊! 爸爸本來想過幾日去第二度再睇吓, 但媽媽好明白小朋友的心態, 黎得睇車緊係想買埋啦! 爸爸都明白, 於是同老闆娘講價, 每部車平$10(um......好過冇啦!), 哥哥要藍色, 細佬要紅色(佢初頭唔知有紅色, 揀咗部黃色), 兩部14寸小童單車, 盛惠$1,660, 多謝爸爸!