然然的情緒問題

然然的情緒問題, 由佢未夠2歲開始浮現, 到而家5歲, 仍然係我同老公的困擾! 因為佢唔單止發癲, 整傷自己, 仲會令到我同老公心情煩躁、血壓上升、EQ下降、忍無可忍、火山爆發! (老公有好多次都忍唔住 -- 車巴佢!)

其實, 由K.1開始, 媽媽就好想睇吓, 有冇情緒輔導之類的課堂, 可以俾然然去上堂, 學習認識同控制自己的情緒, 而學校的老師亦好幫得手, 經常都會俾一D社區中心/志願機構的單張我, 又介紹我帶然然去做評估。

話說去年2月帶咗然然(&逸逸)去做評估, 然後3-4月帶然然去上咗6堂的情緒社交小組, 但然然的情況冇明顯改善, 時好時壞, 反反覆覆!

最近半年, 哥哥的情緒好似有少少改善, 佢快咗收聲唔喊, 但仍然會因為好小事發脾氣, 爆喊, 但已經再冇歇斯底里瞓地的情況。

去年9月升讀K.3後, 校長同老師開始發現, 然然係學校都會鬧情緒, 校長話見過哥哥有幾次, 都係喊住返學校, 問佢咩事, 佢都講到少少。細佬話哥哥有次係班房入面好嬲, 好大力咁拍枱!

去年年尾, 情緒社交小組的志願機構打電話俾我, 佢話之前幫然然排咗遊戲治療, 而家排到佢喇! 問我地仲有冇需要, 我話要同爸爸相量一下! 其實, 都冇得點相量, 因為, 每堂盛惠$450, 仲要起碼要上4-5堂先至會開始見到成效, 爸爸即刻Say No!

上個月, 校長主動話想同我傾傾哥哥的情況 (校長好錫孖寶的), 佢同我傾咗1個鐘, 原來佢早前已經安排咗註校社工去觀課, 睇一睇哥哥上堂的情況同情緒表現, 另外, 佢又留意到哥哥內心入面其實有好大的需要(愛)。呢點都提醒咗我, 由於佢地係孖仔, 所以我同老公每事都以公平為原則, 但原來, 有時候係需要「唔公平」(哥哥需要的愛多D)。 其實, 係管教上, 我地對哥哥同細佬都有唔同的方法, 根本好難公平。校長話, 哥哥只係情感上比較敏感, 其實係一件好事黎, 將來佢可能會擅長做一D對人的工作。

係校長的安排同幫助之下, 我同老公有機會見社工, 瞭解返哥哥上堂的情緒表現, 校長同社工都認為哥哥可以試吓「遊戲治療」(我暗暗的開心, 因為上次老公Say No, 今次校長同社工親自同佢講, 我睇你點樣Say No?)。不過, 社工都解釋, 經過遊戲治療, 哥哥未必會即刻變成一個平和的小朋友, 而遊戲治療的最大目的, 係要幫助小朋友解開心結 -- 一D大家都唔知, 連小朋友自己都未必知道的心結, 同埋讓小朋友搵返自己「Self」, 自我存在感!

社工所屬的志願機構有「遊戲治療」, 就係由社工姑娘本人負責, 加上佢收費唔貴(1次家長面談 + 4次45分鐘的遊戲治療), 盛惠$1,000, 我好想俾然然試吓, 希望幫到佢。老公係校長同社工面前, 都表現到好有興趣俾然然參加遊戲治療, 於是, 我就打鐵趁熱, 聯絡社工姑娘, 安排然然去參加遊戲治療。

2月10日下午2:30, 我帶孖寶上去位於西灣河的中心(老公係車度等我地), 中心的環境好舒適寧靜, 感覺好好, 職員好有禮貌, 最重要係 -- 中心有個遊戲corner, 有好多玩具, 孖寶玩到唔捨得走!

我同姑娘面談咗超過一個鐘, 主要係俾姑娘瞭解返然然由出生到而家的經歷, 可能有D經歷做成佢今日的情緒問題。由於細佬都有少少社交障礙(對小朋友有敵意, 驚多人, 好難識朋友), 所以都問吓姑娘, 細佬可唔可以都參加遊戲治療, 姑娘話冇問題, 不過, 佢要問一問佢係美國的Supervisor(佢讀緊一個兒童情緒治療的遙距課程), 孖寶係分開治療抑或可以一齊。

約咗2月24日第一次遊戲治療, 希望可以幫到佢兩個解開心結啦!