孖寶單車

話說自從2016年5月, 爸爸淘咗兩架平衡車俾孖寶之後, 我家假日的主要節目就係 -- 帶孖寶去公園踩平衡車。

至於孖寶當年入讀K1, 爸爸為咗鼓勵佢地返學唔喊, 用作做奬勵的兩部滑板車, 只係玩咗大半年, 就已經被平衡車取代, 自此打入冷宮, 永不超生! 雖然爸爸都曾經慫恿過孖寶兄弟玩返滑板車, 但佢兩個都不為所動!

今年年頭, 媽媽開始覺得, 佢地玩平衡車的時候, 對腳屈曲得好明顯 (應該係孖寶長高咗!) 然後, 媽媽每次見到, 就會同孖寶爸講, 似乎要買返架單車俾佢地喎, 唔可以再玩平衡車! 但每次孖寶爸的答覆都係: 遲D先啦! 仲玩到呀! 冇野喎!

至於孖寶, 每當媽媽同佢地講: 其實你地唔可以再玩平衡車喇! 大個仔喇! 要踩單車! 冇人成世都係踩平衡車架! 但孖寶好抗拒, 堅持要一世踩平衡車, 仲話如果爸媽買咗架單車返黎, 會dump咗佢! (要佢地唔踩平衡車, 轉踩單車, 就好似搶咗佢地最心愛的玩具一樣, 佢地會同你死過!) 而呢個時候, 孖寶爸都會加把咀: 咪由得佢地繼續玩平衡車囉! 有咩問題? (媽媽係呢個家裏面, 基本上係唔會有人聽我講野der!)

可能由於媽媽成日講, 加上有朋友個女, 同孖寶一樣都係5歲, 已經學識踩單車(堅係識踩, 冇用輔助轆), 爸爸的態度開始有D軟化: 好啦! 問朋友借架單車黎先, 俾佢兩個試吓!

於是, 上星期六, 我地就問咗朋友借咗一架12寸的小童單車(當然係冇輔助轆啦!) 由朋友個女即場示範, 哥哥試踩, 不過, 佢好驚, 未能成功! 加上唔想嚇親哥哥, 所以放棄!

星期日早上, 爸媽又帶孖寶去交通城, 都係叫哥哥試踩先(因為哥哥一向富冒險精神, 又比較有運動細胞, BB時學坐、學爬、學企、學行, 都係哥哥學識先!) 至於細佬, 佢好堅持唔學, 要一世玩平衡車!

教阿仔踩單車呢個咁重要的任務, 緊係由我家德高望重的大老爺負責執行啦! 我呢個做阿四既, 緊係幫手拍video, 記錄低呢個咁重要的時刻啦!

哥哥初頭都有D驚, 其實佢平衡到, 只係控制唔到個軚盤, 架單車炒黎炒去, 加上佢唔慣踩腳踏, 成日踏空, 雙腳離開咗個腳踏, 而爸爸就一直扶住佢個膊頭, 佢好有信心, 繼續嘗試! 過咗5分鐘, 哥哥好似掌握到個技巧, 爸爸可以鬆開少少對手, 有時冇扶住佢, 佢都得得地, 踩到幾步! 再過咗5分鐘, 爸爸已經可以完全放開手, 俾哥哥自己踩, 哥哥仲識得用手制黎刹停車, 然後好穏陣咁停落黎! (哥哥只係用咗10分鐘就學識, 好勁呀!)

媽媽正式宣佈: 哥哥學識踩單車喇!!!
 (見到哥哥學識踩單車, 媽媽諗返起哥哥BB時學識行路, 好震撼! 好滾動! 果刻, 真係有D眼濕濕!)

爸爸話要記低呢個日子: 2018年2月25日, 哥哥學識咗踩單車喇!

由於細佬親眼睇住哥哥學識踩單車, 佢個心態已經係呢10分鐘內180度轉變咗! 幾時到我踩呀? 我都想試呀! 不過, 由於時間關係, 要下午先至可以繼續!

下午2:30, 我地帶細佬去屋企附近單車徑試踩, 但由於係星期日, 單車徑好多車, 好多人, 好危險! 要換場, 去咗魷魚灣村村口個足球場, 細佬雖然平時冇乜運動細胞, 但始終都叫做有over 1.5年踩平衡車的車齡, 所以細佬仔都係用咗10分鐘左右就學識咗! 只係起步果一下, 佢未掌握到(就跌就跌咁), 佢堅持要爸媽推佢起步。

半日之內, 佢兩個由非常抗拒踩單車, 發誓一世都唔會踩單車 --> 變成愛上咗踩單車, 係爭住要踩! (因為只係借咗一部單車, 要兩個輪流踩) 廿四孝的爸媽, 見到此情此景, 心入面都不約而同, 起咗同一個念頭 -- 不如買兩架單車俾孖寶!

於是就帶咗孖寶去屋企隔離條村的單車舖, 睇吓有冇啱佢地踩的兒童單車! 單車舖老闆娘介紹我地買台灣製的PONY, 價錢同大陸車唔係相差好遠, 但質素好, 冇咁易甩鍊! 爸爸本來想過幾日去第二度再睇吓, 但媽媽好明白小朋友的心態, 黎得睇車緊係想買埋啦! 爸爸都明白, 於是同老闆娘講價, 每部車平$10(um......好過冇啦!), 哥哥要藍色, 細佬要紅色(佢初頭唔知有紅色, 揀咗部黃色), 兩部14寸小童單車, 盛惠$1,660, 多謝爸爸!

要等半個鐘等老闆砌好架單車

兩兄弟非常開心, 踩住部新單車, 沿住單車徑踩返屋企, 爸爸媽媽一直係後面追呀追! 等埋呀! 唔好踩咁快呀!

傍晚接近6點, 終於返到屋企喇! 爸媽對腳就黎斷喇!

一早叫爸爸換架貨van架啦!

後記@2018.03.15

經過2星期的練習, 孖寶已經大部份掌握到踩單車的技巧, 包括可以自己起步, 唔駛爸媽推喇! 不過, 細佬放電過度的時候, 就會發忟憎, 埋怨媽媽唔扶佢落車, 好似由得佢跌低咁! (係呀! 細佬! 成長係需要跌低再爬起身架! 媽媽愛你! 所以更加唔可以吓吓都幫你!)

孖寶兄弟的英姿

爸爸幫佢地整咗個車牌

帶住孖寶去旅行@2018(計劃篇)

話說今年1月1號加插咗一次沖繩Ad Hoc之旅, 我家由每年去2次旅行變咗去3次(暫時只限今年, 希望明年都可以啦!) 最開心當然係媽媽同孖寶啦! (爸爸一向都話自己唔去旅行都得!)

今年3月(下個月咋!)會去東京, 老公話想試吓去遠D (但又冇吉C去北海道咁遠, 所以去東京, 去年暑假之前已經買定機票)。

至於今年暑假去邊? 一直都諗唔到, 因為可以帶小朋友去的地方都去過: 沖繩(去咗3次, 十年內應該都唔會再去)、九州、大阪、名古屋、東京(將會去), 一係就再去過九州或大阪, 一係就試吓四國(有同事帶小朋友去過, 好似都幾適合親子, 加上我同老公都未去過, 又係鄉下地方(媽媽最Like), 不過, 老公上網睇睇吓, 覺得冇咩啱孖寶玩, 放棄!

最近, Hong Kong Airlines好似做優惠(其實只係小恩小惠), 暑假去宮崎只需$2500(淡季係$1,000都唔駛), 而CX同一段時間去福岡要接近$5,000, 平一半的價錢, 媽媽相信We can overcome der~! (老公重申呢間唔係簾航喎, 有飛機餐架! 啊! 係咩? 希望今次個飛機餐唔會只係一個包啦! 但機上冇電視睇就肯定der, 老公話佢會帶2部pad上機俾孖寶一人一部睇卡通片, GOOD! 我希望我可以係機上瞓得著啦! 算啦! 平咗一萬蚊喎, 要黎補貼酒店房錢都好呀! 3個鐘左右啫, 我忍你! 最驚係佢Delay, 去到宮崎已經半夜, 所以我打算Day 1住機場附近酒店, 唔會重蹈大阪的覆轍! 老公再重申, 大阪果次係HK Express, 唔同架! 堅係簾航! 啊! 係咩? 原來兩間係唔同一間公司? 咁應該係我眼花!)

於是, 老公就係上星期買咗今年8月4至11日(8日)來回九州宮崎的機票, 一家四口盛惠$9,060 (暑假喎, 唔係簾航喎, 咁既價錢, 算啦! 我冇要求! 平安無事去到同返黎就OK!)

又去九州? 係呀! 鄉下地方, 我最like! 加上, 由於去咗2次九州都係冬天 -- (1) 2011年12月我同老公倆口子去, (2) 2017年3月一家四口去, 都未試過夏天去, 所以今次係全新體驗黎架喇!

鄉下地方有咩玩呀? 由於今次係飛宮崎, 所以會玩吓南九州, 另外, 會北上去返別府同湯布院, 因為孖寶兄弟要去返城島高原遊樂場的Kids Driving School(記得帶返佢地個駕駛執照, 可以唔駛上堂, 直接租車玩), 同埋住返上次湯布院間溫泉酒店, 客室有源泉掛け流し内風呂付, 孖寶兄弟知道有得玩水, 超興奮!

今年3次的旅行, 終於有定案喇!

2018.01.01 - 2018.01.06 (6日) --> 沖繩 (去咗!)
2018.03.24 - 2018.03.31 (8日) --> 東京 (下個月去喇! Yeah!)
2018.08.04 - 2018.08.11 (8日) --> 九州 (期待中!)

其實, 每年可以有22日去旅行, 媽媽已經覺得好幸福喇!!!

漸漸被遺忘的童年回憶

最近, 看到一篇文章, 關於小孩子的記憶, 原來孩子4歲以前, 由於腦袋的海馬體未發育完全, 所以只有短暫記憶, 換句話說, 孩子根本不會記得4歲以前所發生的事。說實話, 我也曾經是小孩子, 但現在對兒時的記憶, 即或是4歲以後的回憶, 也是很模糊。事實就是這樣殘酷, 即是說, 媽媽每天盡心盡力照顧孖寶:

(1) 每晚媽媽說睡前故事, 然然和逸逸各選擇一本故事書, 他們總是嚷著要媽媽再多說一個故事

(2) 睡前要媽媽陪伴, 三母子常常談天說地, 論及生死, 又與他們祈禱, 受接主耶穌作他們生命的主

(3) 媽媽和他們躲在被窩中, 幻想搭飛船上太空, 去大文台、可嘆星、慢之谷、藍之谷, 再返回地球

(4) 每晚, 他們總是覺得媽媽陪他們不夠, 然然臨別總是緊緊的繞著媽媽的手臂, 說很愛媽媽, 不想媽媽走

(5) 逸逸要媽媽看著他砌LEGO, 也邀請媽媽砌他的LEGO, 逸逸很喜歡畫畫, 經常主動向媽媽講解他畫中的內容, 滔滔不絶

(5) 媽媽又會邀請他們一同玩媽媽最愛的森林家族

(6) 媽媽提意一起玩煮飯仔, 然然做廚師, 逸逸做待應, 媽媽做顧客

(7) 他們會邀請媽媽報名參加他們舉辦的賽車及釣魚比賽

(8) 他們邀請媽媽一起玩飛行棋, 為免孖寶輸了大哭, 媽媽總是讓他們出「茅招」

(9) 玩記憶咭的時候, 媽媽會故意拿錯咭

原來, 這一切一切...... 將會漸漸消失於他們的記憶裏, 最後, 就只剩下媽媽一個人的回憶...... 想到這裏, 我已經眼眶濕透, 淚水差點兒要流下來!  這令我想起幾年前看過的一套卡通電影「玩轉腦朋友」, 主角的幻想朋友「乒乓」, 乒乓曾經與她一同渡過了無數快樂的玩耍時間, 也是她生命中一個很重要的角色, 然而, 隨著她長大, 乒乓也慢慢被遺忘了! 原來我每天艱苦經營, 希望能為孖寶留下開心的童年回憶, 但事實卻是...... 他們將會忘記這一切!

不過, 文章的結語, 也成為媽媽最大的安慰! 也許, 這些親子片段將會在孩子的記憶中漸漸被遺忘, 但卻轉化成一種更深層次並一直延續到將來的親子情! 今日, 你的陪伴給予孩子最有力的支持, 你的鼓勵成為孩子面對困難的勇氣, 你的認同造就孩子堅強與自信, 你的信任成就孩子的責任感與獨立能力! 我們對孩子的付出並不會白費, 因為孩子正正因著我們對他們的愛, 得以幸福和快樂地成長!

孖寶, 雖然你們將會忘記媽媽曾經和你們一起搭飛船上太空, 但媽媽相信, 媽媽對你們的愛, 已經烙印在你們的生命中!

然然的情緒問題

然然的情緒問題, 由佢未夠2歲開始浮現, 到而家5歲, 仍然係我同老公的困擾! 因為佢唔單止發癲, 整傷自己, 仲會令到我同老公心情煩躁、血壓上升、EQ下降、忍無可忍、火山爆發! (老公有好多次都忍唔住 -- 車巴佢!)

其實, 由K.1開始, 媽媽就好想睇吓, 有冇情緒輔導之類的課堂, 可以俾然然去上堂, 學習認識同控制自己的情緒, 而學校的老師亦好幫得手, 經常都會俾一D社區中心/志願機構的單張我, 又介紹我帶然然去做評估。

話說去年2月帶咗然然(&逸逸)去做評估, 然後3-4月帶然然去上咗6堂的情緒社交小組, 但然然的情況冇明顯改善, 時好時壞, 反反覆覆!

最近半年, 哥哥的情緒好似有少少改善, 佢快咗收聲唔喊, 但仍然會因為好小事發脾氣, 爆喊, 但已經再冇歇斯底里瞓地的情況。

去年9月升讀K.3後, 校長同老師開始發現, 然然係學校都會鬧情緒, 校長話見過哥哥有幾次, 都係喊住返學校, 問佢咩事, 佢都講到少少。細佬話哥哥有次係班房入面好嬲, 好大力咁拍枱!

去年年尾, 情緒社交小組的志願機構打電話俾我, 佢話之前幫然然排咗遊戲治療, 而家排到佢喇! 問我地仲有冇需要, 我話要同爸爸相量一下! 其實, 都冇得點相量, 因為, 每堂盛惠$450, 仲要起碼要上4-5堂先至會開始見到成效, 爸爸即刻Say No!

上個月, 校長主動話想同我傾傾哥哥的情況 (校長好錫孖寶的), 佢同我傾咗1個鐘, 原來佢早前已經安排咗註校社工去觀課, 睇一睇哥哥上堂的情況同情緒表現, 另外, 佢又留意到哥哥內心入面其實有好大的需要(愛)。呢點都提醒咗我, 由於佢地係孖仔, 所以我同老公每事都以公平為原則, 但原來, 有時候係需要「唔公平」(哥哥需要的愛多D)。 其實, 係管教上, 我地對哥哥同細佬都有唔同的方法, 根本好難公平。校長話, 哥哥只係情感上比較敏感, 其實係一件好事黎, 將來佢可能會擅長做一D對人的工作。

係校長的安排同幫助之下, 我同老公有機會見社工, 瞭解返哥哥上堂的情緒表現, 校長同社工都認為哥哥可以試吓「遊戲治療」(我暗暗的開心, 因為上次老公Say No, 今次校長同社工親自同佢講, 我睇你點樣Say No?)。不過, 社工都解釋, 經過遊戲治療, 哥哥未必會即刻變成一個平和的小朋友, 而遊戲治療的最大目的, 係要幫助小朋友解開心結 -- 一D大家都唔知, 連小朋友自己都未必知道的心結, 同埋讓小朋友搵返自己「Self」, 自我存在感!

社工所屬的志願機構有「遊戲治療」, 就係由社工姑娘本人負責, 加上佢收費唔貴(1次家長面談 + 4次45分鐘的遊戲治療), 盛惠$1,000, 我好想俾然然試吓, 希望幫到佢。老公係校長同社工面前, 都表現到好有興趣俾然然參加遊戲治療, 於是, 我就打鐵趁熱, 聯絡社工姑娘, 安排然然去參加遊戲治療。

2月10日下午2:30, 我帶孖寶上去位於西灣河的中心(老公係車度等我地), 中心的環境好舒適寧靜, 感覺好好, 職員好有禮貌, 最重要係 -- 中心有個遊戲corner, 有好多玩具, 孖寶玩到唔捨得走!

我同姑娘面談咗超過一個鐘, 主要係俾姑娘瞭解返然然由出生到而家的經歷, 可能有D經歷做成佢今日的情緒問題。由於細佬都有少少社交障礙(對小朋友有敵意, 驚多人, 好難識朋友), 所以都問吓姑娘, 細佬可唔可以都參加遊戲治療, 姑娘話冇問題, 不過, 佢要問一問佢係美國的Supervisor(佢讀緊一個兒童情緒治療的遙距課程), 孖寶係分開治療抑或可以一齊。

約咗2月24日第一次遊戲治療, 希望可以幫到佢兩個解開心結啦!