然兄逸弟: 一年一度的郊遊日 -- 濕地公園

2017年11月4日星期六

一年一度的郊遊日 -- 濕地公園

孖寶兄弟第一次去濕地公園已經係一年前的事! 雖然只係去過一次, 但孖寶印象深刻 -- 個遊戲室 (因為遊戲室內面有棵樹屋, 身高100cm以上的小朋友可以爬上去玩, 孖寶一年前未夠100cm, 飲恨! 所以佢地經常嚷著等佢地夠100cm, 就要去多次濕地公園!)

今年11月4日, 我地可以再去一次濕地公園, 因為孖寶終於都夠100cm喇! (哥哥101cm, 細佬103cm)

由於係星期六早上, 唔算多人, 停車場有車位, GOOD! 泊好車, 幫細佬噴超多蚊怕水(因為細佬俾蚊針到會好大鑊!), 排隊買入場券, 入咗場, 即刻飛奔去遊戲室門口排隊, 下一節係20分鐘後, 排隊的人唔多, 太好喇!

入到遊戲室, 孖寶好興奮, 孖寶終於可以爬到最頂個層喇! 不過, 封咗既?! 原來個樹屋維修緊, 封咗! 再一次飲恨! 不過, 孖寶玩最高果條瀡滑梯仍然係好開心, 笑到卡卡聲!

由於想幫孖寶爭取玩多一節的機會, 媽媽走返出去門口排隊 (媽媽永遠都係排隊機器, 上次去名古屋Legoland又係咁囉!) 於是, 孖寶順利玩多一節, 玩咗兩節, 夠喇! 孖寶滿頭大汗!

遊戲室對面就係鱷魚貝貝之家, 影咗一幅相, 再去前行, 見到有導賞團, 一場黎到, 有人講解吓, 好過自己睇! 導賞團的講解員都係義工, 好欣賞佢地啊! 導賞團大概20分鐘完結, 之後, 每位小朋友獲贈一支筆作為紀念品。