小一選校大抽奬 (下)

話說9月的時候, 係教育局第一階段的小一自行選校, 媽媽由孖寶K1的時候, 已經心儀區內的基督教宣道會宣基小學(宣小), 因為:

(1) 基督教

(2) 孖寶讀緊的幼稚園都係宣道會, 希望將來要叩門, 有多少同情分

(3) 宣小都算係區內口碑比較好的學校, 但當然會有人覺得我地區同天水圍區冇分別!

9月26日, 孖寶爸媽請咗下午假, 先去宣小附近的酒店食個semi-buffet lunch, 然後懷著沈重又戰驚的心情(孖寶媽only), 前往宣小交表。我地係第二日交表, 但當時已經有150幾人交咗, 即大概每日有100人交表, 教育局有5日的交表時間, 即係5日總共會有500人報宣小 (加上係龍年B, 實際數字可能更多, 競爭激烈)。 教育局規定計分制收生, 只可以收學位總數的25%, 即125 x 25% = 31人, 孖寶入到宣小的機會率 = 中六合彩!

交表第二晚, 孖寶媽就發惡夢(可能實在太緊張), 夢見孖寶係大抽奬階段獲派另一間(雖然都係基督教, 但口碑有D差, 又話收特殊學生, 又話收生不足之類), 孖寶媽係夢中喊咗出黎, 喊醒咗! 第二朝起身, 同孖寶爸講返: 我已經rehearsal咗一次, 所以到真係抽中果次, 我就唔會喊架喇!

不過, 自從果次之後, 孖寶媽就叫自己唔好再諗! 加上十月係我地的慶祝月 -- 孖寶爸&媽生日+結婚周年, 所以孖寶媽忙於諗一連串的慶祝活動, 已經忘記咗孖寶小一選校的事!

到咗11月中, 孖寶媽開始諗起, 係喎, 11月27號有小一自行選校結果, 就開始有少少不安! 冇期望, 就唔會有失望! 所以孖寶媽不停叫自己, 唔好有期望, 一定抽唔到!

終於到咗11月27日, 孖寶媽俾咗孖寶的申請編號爸爸, 叫爸爸自己上網睇啦! 唔駛同我講孖寶抽唔到! 有先至講啦! 點知, 爸爸冇出聲, 只係send咗個取錄表俾我! 咁抵死? 想整喊我呀?

結果, 媽媽真係喊咗! 因為媽媽發現...... 孖寶的申請編號...... 竟然......係個取錄名單上面呀!!!!!!!!!!!!!!!!!!!!!!!!!!!!!!!!

宣小收咗孖寶呀!!!!!!!!!!!!!!!!!!!!!!!!!!!!!!!

孖寶唔駛進入下一輪大抽奬喇! 可以今個星期三去宣小註册! 太好喇!

神蹟呀! 感謝主! 榮耀歸神!