名古屋親子之旅2017 - Day 6

2017.08.29 (星期二)

雖然一早起身好似天陰陰咁, 但出到去好好天, 好熱! 去游水啱晒!

今日去日光川公園游水, 網頁介紹有人工沙灘, 超長滑梯(孖寶冇得玩, 我同老公要照顧孖寶, 都唔會有得玩), 最重要佢有一個兒童池, 有架海盜船造型的滑梯+繩網。

係酒店食完早餐, 返上房執埋D泳衣、水泡、毛巾、沖身用品, 出發!

落去食早餐

日光川公園係Legoland 附近, 所以今日又係要揸1個鐘頭車。

早上11點, 終於去到日光川公園, 入場費成人每位1500円 (盛惠3000円), 小童免費, 老公話早知咁貴, 唔黎喇! (但我編行程時, 已經寫咗入場費, 佢肯定冇睇過行程! 所以佢呢幾日成日問我: 阿媽, 我地今日/聽日去邊? 下個景點係咩?)

入咗場, 我帶孖寶去更衣室換泳衣, 仲以為只有我一個著長袖泳衣(我上次去沖繩, 海灘上所有日本妹, 都係著bikini), 原來好多日本靚媽都著, 佢地唔單止著長袖泳衣, 仲要著條legging係沙灘褲入面, 戴埋帽, 全副武裝。

換好泳衣, 準備去游水

行樓梯上二樓, 行出去就見到有兩個好大的"泳池", 整到好似沙灘咁, 最盡頭就見到個兒童池, 好大, 但架船唔大, 第一時間帶孖寶去玩, 好多小朋友同家長, 哥哥自己走咗去玩, 已經搵唔到佢去咗邊, 細佬仔就好驚, 要媽媽跟實佢, 連瀡滑梯都要媽媽同佢一齊瀡, 俾人彈到D水上身/面, 又發脾氣。細佬呀! 黎玩水就緊係咁架啦!

 好曬!

就係呢個兒童池喇!

由於細佬唔like, 媽媽提議拎埋個水泡過隔離游水 (其實只係浸係水入面), 細佬不停嚷著要去玩沙, 點知赤腳踩落D沙度, 嘩! 好熱! 真係超級熱! 唔得! 一定要著返對鞋, 唔著鞋, 隻腳會起水泡架! 由於天氣實在太熱, 係沙灘上面乾煎係會中暑der... 媽媽勸佢地都係落返水玩, 係水入面好舒服。落咗水冇幾耐, 工作人員廣播, 唔知講乜, 但見到所有人都係水入面走返上岸邊, 有D人走咗, 有D人就坐係岸邊, 唔知咩事, 我同老公以為發現池水有便便, 要緊急疏散, 等咗10分鐘左右, 工作人員吹哨子, D人又慢慢行返落泳池, 繼續游水。

由於浸係水入面實在太悶, 媽媽想去睇吓隔離個泳池有冇唔同, 爸爸就繼續陪孖寶玩水。原來隔離個泳池有人造浪, 好似幾好玩, 不過, 同老公講, 佢肯定又話危險, 又乜又物, 唔啱孖寶玩。即管同老公講吓, 佢話可以試吓去玩, 但細佬仔唔想去, 佢話好驚, 至於哥哥, 佢有得玩就得, "衝浪"聽落好好玩, 哥哥話去!

解釋咗好耐, 半推半就, 細佬同我地一齊行過隔離個泳池, 去到冇幾耐, 又係一輪廣播, D人全部上晒岸, 又等咗10分鐘, 終於可以落水喇! 池邊寫住D浪高40cm, 我同老公都唔敢行咁出, 始終帶住孖寶, 佢兩個又唔識游水, 萬一跌咗落水要救兩個, 都唔知救邊個先好! 慢慢感覺到有D浪黎緊喇! 孖寶覺得好好玩, D浪越黎越高, 佢兩個笑到kaka聲, 好開心! 大約玩咗7-8分鐘, 冇晒浪lu... 回復平靜, 我地去返岸邊, 俾孖寶係淺水地方玩水, 佢兩個又玩到唔捨得走!

 衝浪完畢, 係池邊玩

早知好似日本D靚媽咁, 著埋legging, 

搽咗防曬都冇用, 我兩條腿曬到黑晒!

雖然浸係水度唔覺得好熱, 但真係好曬! 搽咗防曬都冇用, 一樣係曬到黑晒! 算喇! 下午1點, 都係走人喇!

媽媽帶孖寶去更衣室沖身, 換衫, 老公同一時間都去沖身換衫, 然後媽媽帶孖寶出黎, 由爸爸睇住, 媽媽再入去自己沖身換衫。小插曲, 媽媽帶住孖寶衝入去更衣室換衫, 入到更衣室, 媽媽先至發現唔見咗細佬, 嚇死媽媽呀! 即刻帶埋哥哥衝出去搵細佬, 原來細佬坐咗係男更衣室門口張長凳度(好在細佬唔見咗媽媽都冇亂走啫, 識得坐返係度等, 醒目! 再次帶孖寶入更衣室, 細佬唔記得係門口除鞋, 哥哥幫細佬拎對拖鞋出去, 好有大佬風範呀!)

細佬頭先走失咗, 就係坐係呢張長凳度等

下午2點揸車去附近AEON MALL食午餐, 10分鐘左右, 泊咗車, 落G/F, 原來食街係室外, 由街頭行去街尾, 最後決定食咖喱烏冬, 另外叫咗兩個兒童餐(冷烏冬)俾孖寶, 每個兒童餐附送玩具一份, 餐廳個姨姨拎咗成籃玩具俾孖寶揀, 佢兩個好開心, 哥哥好想揀架藍色車, 但冇紅色車(for細佬), 最後, 爸爸推介"懷舊玩具"。

 選擇困難症

終於揀咗呢個"懷舊玩具"

孖寶兄弟好好胃口, 各自食晒成個兒童餐, 勁! 個咖喱烏冬都幾好味! 不過, 一定要用口水肩食, 因為D汁好易彈咗落件衫度。

 孖寶一人食晒一個餐, 勁!

食咖喱烏冬一定要用"口水肩"

哥哥食得津津有味

食完飯已經係下午3點幾, 下一個行程係去大高綠地揸車, 由於飯氣攻心, 媽媽同孖寶上車冇幾耐, 就瞓著咗! 可憐的爸爸, 仍然要揸車, 冇得瞓!

4點左右去到目的地, 泊低架車, 媽媽去買飛, 雞同鴨講咗一大輪, 終於買咗兩張飛, 由於孖寶得4歲, 一定係要大人揸車, 孖寶只係坐隔離。爸爸嘗試叫醒孖寶, 兩個都爆喊, 好眼瞓呀! 爸爸嘈醒我! 爸爸好衰! 不斷同佢兩個講, 有得揸車喎! 佢兩個都係嬲爆! 行到去見到D車, 佢兩個就收聲喇!

媽媽同哥哥玩, 爸爸同細佬玩, 雖然媽媽唔Like揸車, 但都覺得幾好玩! 不過, 玩一個圈又點會夠呢?! 媽媽又行出去入口買飛, 玩多一次! 今次輪到媽媽同細佬玩, 爸爸同哥哥玩, 爸爸揸得好瘋狂, 哥哥好開心!

玩完揸車, 我地要去下一個景點 -- 恐龍滑梯! 原來恐龍滑梯唔係滾軸滑梯黎, 同埋, 俾想像中細&殘, anyway, 一場黎到, 都要玩一陣, 公園入面仲有一個三層高的旋轉滑梯, 孖寶好鍾意玩。離開的時候, 哥哥突然話要poo poo! 吓? 又係你? 雖然日本D廁所出名乾淨, 但呢個公園D廁所係exceptional case... 完全係一個大劣公廁, 又暗又臭, 仲要只有踎廁, 哥哥唔係好識踎, 媽媽都要踎係度扶住佢, 好攰, 好在最後都成功, 兩母子平安行返出黎!

 傳說中的恐龍滑梯

孖寶反而更like呢個三層高的旋轉滑梯

5:20開車, 繼續尋找傳說中的滾軸滑梯, 終於都搵到喇! um........... 咁短既?! 同上網睇相差咁遠既? 不過, 孖寶兄弟仍然好興奮, 拎住塊瀡滑板, 同爸爸一齊行上山坡。雖然已經收咗太陽, 但冇風, 好熱。孖寶玩咗一陣已經出晒汗, 兩塊面朱登紅晒! 玩完滾軸滑梯, 孖寶見到有個城堡, 又玩咗一輪!

孖寶嚷著要玩"打仗"

6點, 要走喇! 我地仲有個好重要的節目 -- 玩花火。媽媽編行程時已經google過, 酒店附近有條河邊, 可以玩花火。揸車返酒店, 又要1粒鐘(已經係行IC)。

接近晚上7點, 終於都去到目的地喇! 同埋, 已經天黑喇! GOOD! 泊低架車係空地, 開著車頭燈照明, 老公玩先, 俾孖寶睇吓花火究竟係咩黎!(孖寶之前未見過) 哥哥見到咁得意, 好想玩, 細佬就好驚, 縮埋一邊! 老公教佢地點玩, 老公點著咗支花火先, 然後遞俾哥哥, 媽媽話, 如果太驚/就黎燒到手指(通常唔會), 就掉落地下(地下係沙地, 唔會燒著雜草, 玩花火一流!) 玩咗一陣, 細佬都開始唔驚喇! 佢兩個都覺得好好玩。原來包花火有好多支, 玩咗好耐都仲有, 老公最後要幾支一齊點著黎玩。

 細佬第一次玩, 超級驚!

 細佬開始唔驚, 可以同哥哥一齊玩

細佬開始覺得好好玩, 笑哈哈!

玩咗30分鐘, 玩完喇! 係時候要走喇! 去搵野食! 諗住大路兩邊有餐廳, 搵野食好易, 點知搵咗好耐都唔啱食, 居酒屋一陣煙味, 西餐唔鍾意食, 迴轉壽司孖寶唔食得, AEON STYLE未開張, 去Apita, 點知只有超市(買咗個桃, 另外媽媽買咗3盒粟米湯粉, 爸爸買咗2個豆沙包), 冇餐廳, 最後, 死死地氣去酒店隔離的松屋食晚飯, 已經係夜晚9點。

泊低架車, 入去, 成間餐廳都係麻甩佬, 得我一個女人, 老公叫咗3個餐, 豬, 牛, 雞, 樣樣都有。孖寶好鍾意食(緊係啦! D汁好好味, 應該落咗味精, 因為細佬仔食咗少少, 兩邊咀角已經紅晒, 好痕, 敏感!) 媽媽拿拿林返車, 拎支潤唇膏俾佢, 搽吓個咀周圍先。

晚上9點先至有飯食, 辛苦孖寶了!

食完飯, 揸車過返隔離酒店, 返上房, 仍然係爸爸幫孖寶沖涼, 媽媽今晚冇得去大浴場浸熱水, 因為有兩個大媽浸緊。惟有返房係個超細浴缸沖涼, 由於聽日要返香港, 所以要執行李, 將D著過的污糟衫分開深淺色, 放係唔同的膠袋入面, 因為唔分開的話, 老公返到香港就會唔理三七廿一, 全部掉晒入洗衣機一齊洗, 另外仲要將D著過趕唔切洗、洗乾淨同洗乾淨但未乾的底褲分開袋, 仲有, 最好執晒個大喼先, 因為大喼開閂會麻煩D, 所以盡量執晒D野入大喼, 閂咗就盡量唔好開喇! 但仍然仲有身上著緊的睡衣、拖鞋、孖寶的枕頭、梳洗用品, 因為聽朝仲要用, 所以要係細喼預留位置擺放, 聽日冇咩野都唔好開黎開去個大喼喇!

孖寶又係搞到11點先至瞓, 媽媽執野執到差不多12點, 頂唔順, 我都要瞓先喇!

Day 6 完