名古屋親子之旅2017 - Day 1

2017.08.24 (星期四)

等咗差不多成個暑假, 終於都等到喇!

去旅行前一日(星期三)打十號風球, 全日都唔駛返工, 不過, 媽媽我一D都冇開心的感覺 (第一次打風唔駛返工但唔開心), 因為聽日就要飛, 好驚因為要疏導航班, 搞到連班機都delay埋, 屋企工人姐姐原定星期三晚10點機返鄉下探親, 都要改為星期四朝早11點, 所以真係好擔心我地班機都受影響, 加上剛打完風, 又係平日返工時間, 一定會塞車!

星期四朝早6點起身, 望出窗外, 冇風冇雨, Good! 老公6:30去叫醒孖寶, 佢兩個竟然冇發癲, 奇蹟呀! 由於趕住7點出門口, 所以孖寶只係飲咗杯奶, 我同老公就食咗個包, 拿拿林影咗張相, 出發喇!

早上7:10出門口, 難得孖寶都精神奕奕

可能時間尚早, 將軍澳隧道竟然冇塞車! 一路上的交通都好順通, 大約7:45就到咗青衣機鐵站, 泊低咗架車(日泊$70), 孖寶幫手推行李, 搭lift落去大堂搭機場快線去機場(兒童免費), 孖寶第一次搭機鐵, 好興奮!

8:30到達機場, 去CX Counter辦理行李寄倉, 冇乜人, 唔駛排隊, 出埋登機証, 飛機準時10:10起飛, 9:30開始登機, 仲有一個鐘時間, GOOD!

Counter冇人, GOOD!

第一次唔係裙拉褲甩咁跑去閘口登機! 我同老公都決定早D入閘, 橫掂禁區入面都仲有好多舖頭可以行, 打發時間!

入咗禁區, 行去閘口附近水機斟水, 孖寶今早只係飲咗杯奶, 未食早餐, 所以要食D野, 兩個都唔想食包, 要食Energy Bar, 食完仲有好多時間, 可以去個埋個指定打咭牌下面影相, 順便排埋隊, 等咗都唔算好耐, 可以上機喇!

仲有時間玩自拍

今次架機係3-4-3座位, 爸爸話佢同孖寶坐, 等媽媽可以抖吓, 辛苦晒爸爸喇! 爸爸真係好錫媽媽! 由於今日多咗航班升降, 所以架機排咗好耐好耐, 等咗1個鐘(11點)先至起飛! 不過, 由於有自選電影睇, 唔覺得好耐!

爸爸今次好醒, 早一個月打去CX, mark咗位(係今次去名古屋同下年去東京的座位都mark埋), 又mark咗兒童餐, 所以起飛冇幾耐, 孖寶就有野食喇! 爸爸一個人照顧孖寶, 好似都OK喎, 媽媽可以安心咁繼續睇戲! hoho...

 難得哥哥肯食野

今日兒童餐係肉醬長通粉

其間, 哥哥話要去poo poo, 吓? 又黎? 上次去沖繩, 好似又係你話要係2萬呎高空做呢個高難度動作喎! 由於媽媽坐走廊, 所以都係媽媽帶佢去廁所, 入到廁所, 扎實個馬(媽媽), 舖墊, 幫佢除褲, 抱佢上去個廁所, 扶實佢, 自己又要企穏, 仲要make sure自己同佢唔到high到廁所入面D污糟野, 好在佢都好快搞掂, 母子平安咁行返出黎!

由於老公全程照顧孖寶, 我可以好輕鬆咁食飛機餐, 睇戲, 時間過得好快, 本來想瞓一陣, 點知已經差不多降落喇! 我同老公講: 多謝晒你呀! 照顧孖寶, 我好似自己一個人搭飛機咁, 爽呀! 老公回敬我一句: 一個人搭飛機咁慘呀! 辛苦你喎!

3:30落機, 排隊過關, 拎行李(等咗都幾耐吓), 然後落G/F去Nissan租車, 租車的地方好熱好熱, 孖寶爭梳化坐鬧交, 加上真係好熱, 我就黎發癲, 老公見到咁既情況, 叫我去辦租車手續, 佢睇住兩個孖寶, 又要填資料, 又要搵返酒店個名同地址電話, 又要拎個國際牌俾職員睇, 仲要揸車果個其實唔係我, 又要雞同鴨講一輪, 好很煩! 仲要發現原來老公book車時冇request car seat, 要補錢, 每個小朋友1,800円 (網上book只需1,000円), 算啦! 就算10,000円都要俾架啦! 安全最緊要! 我之後仲要跟埋個職員出去check車, 突然覺得自己好似照顧緊3個仔咁!

 職員教用GPS

 好鍾意哥哥呢個笑容

租車的地方真係好熱, 細佬仔流晒汗

4:50終於搞掂晒, 可以開車, GPS話行IC大約1小時, 普通道路就1.5小時, 我同老公都覺得唔趕時間, OK, 普通囉! 過咗橋就知道出事喇! 超多燈位(大約100米有一個), 同埋D車行得好慢(時速30公里), 越行越唔對路, 好似入咗市中心咁, 由天光行到天黑, GPS顯示到達目的地的時間越整越遲, 最後, 夜晚7點先至到小牧AEON MALL, 早知行IC, 多1個鐘頭行街仲好過!

一路上的交通情況, 好想喊!

去AEON MALL搵野食, 食日本定食, 叫咗2個定食同1個兒童餐(烏冬), 食飽飽後去睇玩具(原來呢間AEON冇反斗城), 老公話D玩具賣得貴, 但又應承咗送旅行玩具俾孖寶(次次旅行都會送一份旅行玩具俾孖寶, 等佢地可以夜晚返酒店係房度玩吓, 冇咁悶!), 佢兩個見到有Mario賽車, 兩個都話好想玩, 媽媽索性提意唔買玩具, 玩一舖Mario賽車啦! Deal! (不過玩一舖係唔夠喉der...最後玩咗兩舖, 哥哥&細佬每人贏一舖!

每舖只係100円, 抵玩過香港

釣魚GAME, 孖寶扮玩

晚上9:30, 太夜喇! 要返酒店喇! 由AEON MALL揸車去酒店, GPS話要30分鐘, 結果又係超塞車, 最後差不多10:30先至到酒店!

拿拿林幫孖寶沖涼, 強迫佢地calm down同瞓覺, 搞到差不多11:30先至瞓著, 然後就係我執野, 老公叉電+煲水, etc.

零晨1點, 我同老公終於可以瞓喇!

不過, 同細佬瞓真係好痛苦, 因為佢瞓覺好似打仗咁, 360度旋轉, 轉身時順便車巴媽媽塊面, 半夜突然坐起身, 然後成個人撻咗係床尾, 無啦啦成個人瞓係媽媽個肚腩上面, etc.

Day 1 完