帶住孖寶去旅行@2017(下) (感想篇)

今次已經係我同老公第四次帶孖寶去旅行 (2016年6月去沖繩、2016年10月去大阪、今年4月去九州), 滿以為已經好有經驗, 加上4月去九州係好OK, 今次孖寶又大個咗D, 理論上應該會更加OK, 但我同老公都覺得今次比上次辛苦, 原因有以下幾點:

(1)  夏天去旅行真係好熱, 加上好多景點係室外, 好曬好熱(雖然已經帶咗手提電風扇, 但幫助不大), 莫講話細佬仔發脾氣, 大人都心情唔多好。老公話唔應該暑假去旅行, 咁我想問吓, 小朋友要返學, 一般都係暑假、聖誕、新年先至有長假期, 聖誕&新年你又話天氣太凍, 唔適合帶孖寶去旅行, 你而家又話暑假太熱唔去得, 請問你想幾時去呢? 我話如果唔想咁熱, 咁暑假去南半球的地方囉, 包保你唔熱喇!

(2)  去錯咗大城市, 原來名古屋都算係大城市 (仲以為唔去東京、大阪就得), 而且名古屋呢個城市都幾大, 就算揸咗1個鐘頭車(已經係行IC), 都仍然仲係城市的塞車區入面, 今次呢個旅程用(唔係, 簡直係嘥!)咗好多時間&金錢係車程上面。上個月仲買咗下年3月尾去東京的機票, 下次大鑊了!

(3)  太多晚間節目, 今次安排咗Day 2晚上去睇星星, Day 3晚上去花火大會, 同埋Day 6 晚上去河邊玩火花, 加上每晚都行AEON MALL行到9點先至返酒店(返酒店車程又要1個鐘), 簡直就係上年去大阪的翻版, 重蹈覆轍, 注定死硬! 下次要去返D鄉郊地方, 要連AEON MALL都冇得行, 夜晚只能呢係酒店hea, 咁就very good喇!

(4)  今次旅程只安排一晚入住溫泉旅館, 而且當晚要出去睇星星, 跟本就冇時間享受旅館的溫泉設施, 感覺成個行程都好委屈, 每晚一家四口都要屈埋係間唔夠150呎的酒店房入面, 孖寶連走動的空間都冇, 我同老公執野轉身都有D困難。下次如果真係要連續住幾晚同一間酒店, 真係唔好慳, 情願俾多少少錢, 住間好D, 舒服D。

不過, 人就係如此善忘...... 同埋...... 犯賤! 過咗幾日, 我同老公睇返今次旅行D相, 又覺得好開心! (都話咗相片係最唔真實的記錄!) 諗返起同佢地去瞓草地睇星星、係海邊睇現場放煙花、去Legoland玩咗成日、去衝浪笑到卡卡聲、係河邊第一次玩花火、孖寶收到旅行禮物時的雀躍表情、一家四口古靈精怪的自拍照, 每一張相片, 每一個片段, 都滿載著我地一家四口的幸福回憶! (自欺欺人!)

明明係旅行的時候, 我同老公都話, 記住記住今次有幾咁辛苦, 等自己唔好成日嚷著要去旅行喇! 死咗條心罷啦!

點知返咗黎香港, 過咗幾日, 睇返D目, 就已經唔記得晒自己講過乜野! 竟然覺得要等到下年3月尾先至有得去旅行, 好耐呀! 我唔想咁耐都冇得去呀! 我要每個月都去! (Source: 細佬仔的金句)

名古屋親子之旅2017 - Day 7

2017.08.30 (星期三)

旅程的最後一日, 今日天氣仍然係好好, 全個旅程都好好天, 除咗Day 2去睇星星果日, 偏偏就多雲有雨。

今日下午4:10機返香港, 下午2點左右要出到機場, 所以今日的行程其實只有早上, 媽媽上網發現原來我地所住的豐田市, 真係有豐田車廠, 車廠逢星期一至五都有參觀團, 預先上網報名就可以, 而且係免費, GOOD! 難得可以入去工廠入面睇汽車的製造過程, 爸媽都係第一次(係電視睇唔算), 對孖寶黎講, 更加係一個難得的經歷 (佢兩個超級鍾意車)。參觀團早上11點開始, 下午1點完, 我地最遲要2:30去到機場, 之前仲要入油, 還車, 其實都有D趕!

食完早餐, 返上房, 執埋行李, 落地下大堂Check out, 搬行李上車, 出發喇!

 四日都係食相同的早餐, 有D悶,
但是免費的, 都冇要求喇!

 Check out, 其實check in時已經俾晒錢, 

走的時候只係擺低張key card

由酒店去豐田車廠, 只係20分鐘, 未夠10:30已經去到, 泊咗車, 行過對面的Reception。Reception D女仔英文好好, 雖然有口音, 但係對答如流, 參觀活動11點先至開始, 我地可以係展覽館睇吓車先, 11點會有人叫名, 報到之後, 搭旅遊巴去車廠, 但相機同電話(因有攝錄功能), 要留係旅遊巴上, 或者放入Reception對面的保險箱。另外, 工廠好熱, 叫我地帶定D水。

孖寶見到好多車, 好興奮, 佢地次次去睇車展, 都要續架車上去坐, 撳撳撳晒control panel上面D制, 佢兩個玩咗好耐。

 細佬最愛紅色跑車

 哥哥你撳咗好耐, 幾時輪到細佬玩呀?

 乜又係你呀哥哥, 快D讓返出黎, 俾細佬撳吓啦!

等到11:05, 終於叫我地喇! 我報咗英文團, 所以同團都係外國人, 另外有一家三口的台灣人。上咗旅遊巴, 領隊話去車廠要20分鐘車程, 嘩! 咁遠! 其實, 我一早已經同咗孖寶講, 今次參觀車廠係好耐架, 好似去戲院睇戲咁耐, 唔可以話咁耐架? 走得未呀? etc. 領隊係旅遊巴上講解汽車的製造過程, 佢話我地今日會去兩個廠房 -- 零件裝嵌&燒焊。先去零件裝嵌的廠房, 原來廠房二樓有行人天橋, 我地沿住天橋行, 望落去就睇到D工人好努力咁裝嵌緊D汽車零件, 一架架車係輸送帶上面慢慢前進, 工人就要爭分奪秒, 裝嵌完一架又一架, 唔可以停手, 其實都幾辛苦, 相比之下, 我同老公份工真係好嘆! 由於孖寶太細粒, 睇唔到, 好多時都要我同老公抱起佢地睇, 孖寶唔算好雀躍, 但總算冇扭計 (哥哥通常扭計要走, 細佬就扭計話好熱)。

離開零件裝嵌的廠房, 去完手洗間, 上返旅遊巴, 去燒焊廠房, 呢個廠房堅熱, 因為大部份工序都由機械臂負責(機械臂唔駛涼冷氣), 加上燒焊產生的熱力, 好熱! (好在細佬冇扭計)。其實黎到呢度, 孖寶已經冇乜興趣睇, 老公仲話, 其實上網有好多呢類(汽車製造過程)video睇, 咁其實上網都好多日本旅遊節目睇啦! 咁你又黎日本? (我忍住冇講出口, 但我真係好想寸返佢囉! 同埋我報名前問過你, 你都話好, 我先至安排呢個行程)。

參觀完, 下午1點坐返旅遊巴離開, 去返豐田辦公大樓, 落車後, 每人都有一份紀念品, 大人係一支原子筆, 小朋友係一架模型車(要自己砌的)。之後, 我地上咗展館的二樓, 行紀念品商店, 老公買咗件T裇、一盒機械臂模型、佢架七人車的模型、兩盒糖, 我就買咗2對襪俾孖寶。已經係下午1:40, 要走喇! 去機場要成1個鐘, 加上名古屋真係好塞車, 就算行IC, 時速140km, 都係要成個鐘先至去到機場。

下午2:30去到機場, 還車, 仲未食午餐, 去CX Counter Check-in, 行李寄倉。

 冇乜人排隊, 我地早咗?

未夠3點已經拿拿林入閘, 因為媽媽仲未買到野俾自己(冇錯, 黎咗7日都冇買過一件物品俾自己, 衫褲鞋襪, 化妝/護膚品, 首飾, 豬耳繩, 擺設, 乜都冇, 係連一粒糖都冇!) 好在老公都識做, 過咗Immigration之後, 老公主動叫我去行街啦! 由佢睇住兩個仔, 由於未食飯, 老公話會帶孖寶去食D野, OK!

我第一時間衝入去Duty Free Shop, 搵我的Shiseido, 原來今年4月係福岡買的Dramatic Film Liquid粉底已經唔出喇! Dramatic Film變咗cream狀粉底, 是但啦! 再唔買, 我真係兩手空空返香港, 好對唔住自己囉! 叫Sales幫我拎OC20色, 兩支 (每支3200円 = HK$224, 好平呀! 香港賣緊$320一支)。本來想買埋SKII神仙水230ml孖裝, 但個價錢......33,600円 (=HK$2352, 香港賣緊$1280一支, 即係每支平香港100蚊左右, 但上次SOGO感謝祭買, 送咗超過100蚊的贈品, 日本買唔係平好多咋喎! 唔買!)

買完自己野, 仲要去買Royce朱古力薯片(上次係福岡機場買咗1盒, 孖寶超級Like, 爸爸應承佢地下次去日本再買), 手信俾老豆, 幫我地湊nick nick的朋友, 同埋公司同事。 行過去手信舖, 門口附近位置已經係Royce櫃, 一手"立"起4盒Royce, 另外專攻1000円一盒的手信, 本來想搵吓有冇日式擺設俾阿媽, 冇!再睇吓有冇野買俾自己, 有塊隨身鏡, 都幾靚, 是但啦! 買埋佢! 極速買完, 用whatsapp聯絡老公, 同佢會合 (明明係Gate18, 但就話係Gate19, 兩個Gate隔咗九條街, 搞到我一來一回行餐死先至搵到佢地三父子 (其實佢地就係手信舖對面食緊熱狗, 我心入面已經XYZ緊!)

佢地三父子食飽飽, 準備離開 (咁我呢? 冇買我果份? 即係你覺得女人有得shopping就飽? )老公話見到隔離有飛驒桃, 好似幾靚, 不如買返一箱俾自己食, 我話好呀! 試吓囉! 希望甜啦!

 3000円一箱6個飛驒桃, 希望好食啦!

 睇落好靚

下午4點, 夠鐘上機, 行到去閘口, 見到有Starbucks, 我即刻衝去買個朱古力包俾自己, 帶上飛機食。

 Bye Bye 名古屋

回程機的座位係2-4-2, 老公之前打去CX mark咗前後兩排窗口兩座位, 我同細佬坐, 老公同哥哥坐。我食完個朱古力包冇幾耐就起飛, 之後好快就有兒童餐食, 由於孖寶3點先至食咗熱狗, 所以唔太肚餓, 完全冇動力食野, 加上係炸魚+薯蓉, 佢兩個唔多Like, 我叫咗個日式牛肉飯, 俾咗D飯細佬食, 我食佢D薯蓉。佢兩個係飛機上面都瞓唔著, 掛住睇戲, 我都睇埋下半段Beauty & The Beast (7日前飛名古屋時睇咗一半)。

 好難得哥哥笑得咁正經影相

 細佬對個兒童飛機餐完全冇興趣

 我揀的日式牛肉飯, 

老公揀咗另一個餐, 中伏了!

晚上7點到達香港, 落機後行去過關, 都遠遠地。出去等行李, 今次都唔算好耐, 加上食咗飛機餐, 又時間尚早, 心情OK! (不過, 諗起聽朝早一早就要返工, 就唔係咁OK囉! 今次去旅行都要請5日假, 但只係放得7日, 非常唔扺請, 下次要安排星期六/日去, 星期五/六返, 頭尾都有星期六日, 合共9日, 咁就抵D, 同埋唔駛一落機就要返工咁辛苦!)

到咗香港喇!

拎咗行李, 出去搭機場快線, 去青衣攞車, 再揸車返屋企 (老公話其實泊青衣仲好過泊機場, 唔駛行咁遠去T2攞車)。

 出咗黎, 行去搭機場快線, 超方便!

9點返到屋企, 由於工人姐姐返咗鄉下(下星期三晚返), 我地返到屋企, 仲要幫孖寶沖涼, 刷牙, 換衫, 暗瞓覺。老公就拿拿林執返D衫出黎, 準備聽日開洗衣機洗。由於我聽日要返工, 所以唔好意思, 我要早D瞓!

旅程完結

名古屋親子之旅2017 - Day 6

2017.08.29 (星期二)

雖然一早起身好似天陰陰咁, 但出到去好好天, 好熱! 去游水啱晒!

今日去日光川公園游水, 網頁介紹有人工沙灘, 超長滑梯(孖寶冇得玩, 我同老公要照顧孖寶, 都唔會有得玩), 最重要佢有一個兒童池, 有架海盜船造型的滑梯+繩網。

係酒店食完早餐, 返上房執埋D泳衣、水泡、毛巾、沖身用品, 出發!

落去食早餐

日光川公園係Legoland 附近, 所以今日又係要揸1個鐘頭車。

早上11點, 終於去到日光川公園, 入場費成人每位1500円 (盛惠3000円), 小童免費, 老公話早知咁貴, 唔黎喇! (但我編行程時, 已經寫咗入場費, 佢肯定冇睇過行程! 所以佢呢幾日成日問我: 阿媽, 我地今日/聽日去邊? 下個景點係咩?)

入咗場, 我帶孖寶去更衣室換泳衣, 仲以為只有我一個著長袖泳衣(我上次去沖繩, 海灘上所有日本妹, 都係著bikini), 原來好多日本靚媽都著, 佢地唔單止著長袖泳衣, 仲要著條legging係沙灘褲入面, 戴埋帽, 全副武裝。

換好泳衣, 準備去游水

行樓梯上二樓, 行出去就見到有兩個好大的"泳池", 整到好似沙灘咁, 最盡頭就見到個兒童池, 好大, 但架船唔大, 第一時間帶孖寶去玩, 好多小朋友同家長, 哥哥自己走咗去玩, 已經搵唔到佢去咗邊, 細佬仔就好驚, 要媽媽跟實佢, 連瀡滑梯都要媽媽同佢一齊瀡, 俾人彈到D水上身/面, 又發脾氣。細佬呀! 黎玩水就緊係咁架啦!

 好曬!

就係呢個兒童池喇!

由於細佬唔like, 媽媽提議拎埋個水泡過隔離游水 (其實只係浸係水入面), 細佬不停嚷著要去玩沙, 點知赤腳踩落D沙度, 嘩! 好熱! 真係超級熱! 唔得! 一定要著返對鞋, 唔著鞋, 隻腳會起水泡架! 由於天氣實在太熱, 係沙灘上面乾煎係會中暑der... 媽媽勸佢地都係落返水玩, 係水入面好舒服。落咗水冇幾耐, 工作人員廣播, 唔知講乜, 但見到所有人都係水入面走返上岸邊, 有D人走咗, 有D人就坐係岸邊, 唔知咩事, 我同老公以為發現池水有便便, 要緊急疏散, 等咗10分鐘左右, 工作人員吹哨子, D人又慢慢行返落泳池, 繼續游水。

由於浸係水入面實在太悶, 媽媽想去睇吓隔離個泳池有冇唔同, 爸爸就繼續陪孖寶玩水。原來隔離個泳池有人造浪, 好似幾好玩, 不過, 同老公講, 佢肯定又話危險, 又乜又物, 唔啱孖寶玩。即管同老公講吓, 佢話可以試吓去玩, 但細佬仔唔想去, 佢話好驚, 至於哥哥, 佢有得玩就得, "衝浪"聽落好好玩, 哥哥話去!

解釋咗好耐, 半推半就, 細佬同我地一齊行過隔離個泳池, 去到冇幾耐, 又係一輪廣播, D人全部上晒岸, 又等咗10分鐘, 終於可以落水喇! 池邊寫住D浪高40cm, 我同老公都唔敢行咁出, 始終帶住孖寶, 佢兩個又唔識游水, 萬一跌咗落水要救兩個, 都唔知救邊個先好! 慢慢感覺到有D浪黎緊喇! 孖寶覺得好好玩, D浪越黎越高, 佢兩個笑到kaka聲, 好開心! 大約玩咗7-8分鐘, 冇晒浪lu... 回復平靜, 我地去返岸邊, 俾孖寶係淺水地方玩水, 佢兩個又玩到唔捨得走!

 衝浪完畢, 係池邊玩

早知好似日本D靚媽咁, 著埋legging, 

搽咗防曬都冇用, 我兩條腿曬到黑晒!

雖然浸係水度唔覺得好熱, 但真係好曬! 搽咗防曬都冇用, 一樣係曬到黑晒! 算喇! 下午1點, 都係走人喇!

媽媽帶孖寶去更衣室沖身, 換衫, 老公同一時間都去沖身換衫, 然後媽媽帶孖寶出黎, 由爸爸睇住, 媽媽再入去自己沖身換衫。小插曲, 媽媽帶住孖寶衝入去更衣室換衫, 入到更衣室, 媽媽先至發現唔見咗細佬, 嚇死媽媽呀! 即刻帶埋哥哥衝出去搵細佬, 原來細佬坐咗係男更衣室門口張長凳度(好在細佬唔見咗媽媽都冇亂走啫, 識得坐返係度等, 醒目! 再次帶孖寶入更衣室, 細佬唔記得係門口除鞋, 哥哥幫細佬拎對拖鞋出去, 好有大佬風範呀!)

細佬頭先走失咗, 就係坐係呢張長凳度等

下午2點揸車去附近AEON MALL食午餐, 10分鐘左右, 泊咗車, 落G/F, 原來食街係室外, 由街頭行去街尾, 最後決定食咖喱烏冬, 另外叫咗兩個兒童餐(冷烏冬)俾孖寶, 每個兒童餐附送玩具一份, 餐廳個姨姨拎咗成籃玩具俾孖寶揀, 佢兩個好開心, 哥哥好想揀架藍色車, 但冇紅色車(for細佬), 最後, 爸爸推介"懷舊玩具"。

 選擇困難症

終於揀咗呢個"懷舊玩具"

孖寶兄弟好好胃口, 各自食晒成個兒童餐, 勁! 個咖喱烏冬都幾好味! 不過, 一定要用口水肩食, 因為D汁好易彈咗落件衫度。

 孖寶一人食晒一個餐, 勁!

食咖喱烏冬一定要用"口水肩"

哥哥食得津津有味

食完飯已經係下午3點幾, 下一個行程係去大高綠地揸車, 由於飯氣攻心, 媽媽同孖寶上車冇幾耐, 就瞓著咗! 可憐的爸爸, 仍然要揸車, 冇得瞓!

4點左右去到目的地, 泊低架車, 媽媽去買飛, 雞同鴨講咗一大輪, 終於買咗兩張飛, 由於孖寶得4歲, 一定係要大人揸車, 孖寶只係坐隔離。爸爸嘗試叫醒孖寶, 兩個都爆喊, 好眼瞓呀! 爸爸嘈醒我! 爸爸好衰! 不斷同佢兩個講, 有得揸車喎! 佢兩個都係嬲爆! 行到去見到D車, 佢兩個就收聲喇!

媽媽同哥哥玩, 爸爸同細佬玩, 雖然媽媽唔Like揸車, 但都覺得幾好玩! 不過, 玩一個圈又點會夠呢?! 媽媽又行出去入口買飛, 玩多一次! 今次輪到媽媽同細佬玩, 爸爸同哥哥玩, 爸爸揸得好瘋狂, 哥哥好開心!

玩完揸車, 我地要去下一個景點 -- 恐龍滑梯! 原來恐龍滑梯唔係滾軸滑梯黎, 同埋, 俾想像中細&殘, anyway, 一場黎到, 都要玩一陣, 公園入面仲有一個三層高的旋轉滑梯, 孖寶好鍾意玩。離開的時候, 哥哥突然話要poo poo! 吓? 又係你? 雖然日本D廁所出名乾淨, 但呢個公園D廁所係exceptional case... 完全係一個大劣公廁, 又暗又臭, 仲要只有踎廁, 哥哥唔係好識踎, 媽媽都要踎係度扶住佢, 好攰, 好在最後都成功, 兩母子平安行返出黎!

 傳說中的恐龍滑梯

孖寶反而更like呢個三層高的旋轉滑梯

5:20開車, 繼續尋找傳說中的滾軸滑梯, 終於都搵到喇! um........... 咁短既?! 同上網睇相差咁遠既? 不過, 孖寶兄弟仍然好興奮, 拎住塊瀡滑板, 同爸爸一齊行上山坡。雖然已經收咗太陽, 但冇風, 好熱。孖寶玩咗一陣已經出晒汗, 兩塊面朱登紅晒! 玩完滾軸滑梯, 孖寶見到有個城堡, 又玩咗一輪!

孖寶嚷著要玩"打仗"

6點, 要走喇! 我地仲有個好重要的節目 -- 玩花火。媽媽編行程時已經google過, 酒店附近有條河邊, 可以玩花火。揸車返酒店, 又要1粒鐘(已經係行IC)。

接近晚上7點, 終於都去到目的地喇! 同埋, 已經天黑喇! GOOD! 泊低架車係空地, 開著車頭燈照明, 老公玩先, 俾孖寶睇吓花火究竟係咩黎!(孖寶之前未見過) 哥哥見到咁得意, 好想玩, 細佬就好驚, 縮埋一邊! 老公教佢地點玩, 老公點著咗支花火先, 然後遞俾哥哥, 媽媽話, 如果太驚/就黎燒到手指(通常唔會), 就掉落地下(地下係沙地, 唔會燒著雜草, 玩花火一流!) 玩咗一陣, 細佬都開始唔驚喇! 佢兩個都覺得好好玩。原來包花火有好多支, 玩咗好耐都仲有, 老公最後要幾支一齊點著黎玩。

 細佬第一次玩, 超級驚!

 細佬開始唔驚, 可以同哥哥一齊玩

細佬開始覺得好好玩, 笑哈哈!

玩咗30分鐘, 玩完喇! 係時候要走喇! 去搵野食! 諗住大路兩邊有餐廳, 搵野食好易, 點知搵咗好耐都唔啱食, 居酒屋一陣煙味, 西餐唔鍾意食, 迴轉壽司孖寶唔食得, AEON STYLE未開張, 去Apita, 點知只有超市(買咗個桃, 另外媽媽買咗3盒粟米湯粉, 爸爸買咗2個豆沙包), 冇餐廳, 最後, 死死地氣去酒店隔離的松屋食晚飯, 已經係夜晚9點。

泊低架車, 入去, 成間餐廳都係麻甩佬, 得我一個女人, 老公叫咗3個餐, 豬, 牛, 雞, 樣樣都有。孖寶好鍾意食(緊係啦! D汁好好味, 應該落咗味精, 因為細佬仔食咗少少, 兩邊咀角已經紅晒, 好痕, 敏感!) 媽媽拿拿林返車, 拎支潤唇膏俾佢, 搽吓個咀周圍先。

晚上9點先至有飯食, 辛苦孖寶了!

食完飯, 揸車過返隔離酒店, 返上房, 仍然係爸爸幫孖寶沖涼, 媽媽今晚冇得去大浴場浸熱水, 因為有兩個大媽浸緊。惟有返房係個超細浴缸沖涼, 由於聽日要返香港, 所以要執行李, 將D著過的污糟衫分開深淺色, 放係唔同的膠袋入面, 因為唔分開的話, 老公返到香港就會唔理三七廿一, 全部掉晒入洗衣機一齊洗, 另外仲要將D著過趕唔切洗、洗乾淨同洗乾淨但未乾的底褲分開袋, 仲有, 最好執晒個大喼先, 因為大喼開閂會麻煩D, 所以盡量執晒D野入大喼, 閂咗就盡量唔好開喇! 但仍然仲有身上著緊的睡衣、拖鞋、孖寶的枕頭、梳洗用品, 因為聽朝仲要用, 所以要係細喼預留位置擺放, 聽日冇咩野都唔好開黎開去個大喼喇!

孖寶又係搞到11點先至瞓, 媽媽執野執到差不多12點, 頂唔順, 我都要瞓先喇!

Day 6 完

名古屋親子之旅2017 - Day 5

2017.08.28 (星期一)

今日仍然係陽光普照, 天氣炎熱!

媽媽仍然係7:30起身, 先搞掂自己, 然後差不多8點叫醒孖寶, 換衫, 刷牙, 落去地下大堂食早餐。食完早餐返上房, 舒暢完, 就出發, 今日去Legoland, 係今次旅程的重點節目!

孖寶急不及待要著閃燈鞋

由酒店揸車去Legoland, 要1小時, 媽媽同孖寶係不知不覺間就瞓著咗, 爸爸要揸車, 冇得瞓, 辛苦晒!

揸咗好耐, 瞓咗幾個回合, 終於都見到遠處有碌好高好高、五顏六色、好似用Lego砌成的柱, 爸爸話: 前面就係Legoland喇! 離開高速公路, 轉個彎就係Legoland... 隔離個停車場, 我話我google過, 係呢個多層停車場喇! Legoland本身冇停車場, 要泊呢個! 老公唔信我, 佢想直接揸去Legoland入口, 點知越揸越唔對路, 算啦! 都話係泊呢個多層停車場囉!

泊咗架車係四樓, 行樓梯落返二樓, 再跟住D人潮行天橋過馬路對面, 落返地面, 經過一條充滿歐陸氣息的商舖街, 如果唔係要去Legoland, 真係好想行吓! 行行吓, 見到D人開始排晒隊, 仲有Legoland工作人員係條龍尾舉牌, 唔係呀化? 要排隊入場? 我拎張1-Day Pass出黎問工作人員, 原來唔駛排隊, 嚇得我丫!

轉咗個彎, 見到Legoland的正門, 同想像中一樣 -- 好細! 仲要前面有個地盤 (好似話起緊酒店), 行到去入口, 見到D人排晒長龍原來係買入場券, 好在我地早幾日去7-Eleven買咗啫, 咁排法, 排完隊買飛入場都收檔喇!

老公不停讚我: 媽媽今次好醒呀! 好在預早買咗飛, 唔駛排餐死!

入到場, 孖寶已經俾周圍D Lego人公仔吸引咗去, 完全前進唔到, 喂! 我地要去排隊玩遊戲呀! 快D行啦! 本來想去排隊玩 Lego Factory (其實唔知係咩黎), 但排咗15分鐘仲係門口, 算喇! 去咗佢地最鍾意的 Driving School先啦!

 玩咗好耐, 無法前進

行去Driving School途中經過好多遊戲, 揸船仔好似都幾好玩喎, 仲有潛艇, 去到Driving School, 原來分開6歲以下同6歲以上, 6歲以下只可以玩小型車, 老公話: 媽媽, 你去排住隊先! 老公同孖寶係附近同D Lego車影相, 排咗好耐, 終於到孖寶, 佢兩個好興奮, 一開閘就衝出去, 哥哥揀警車, 細佬揀消防車。老公又話: 媽媽, 你去幫孖寶再排多次隊! (媽媽變咗排隊機器!) 好似揸咗兩分鐘就玩完, 玩完每人派一張咭仔(好似係駕駛執照, 自己填上姓名)。好在媽媽幫佢地排隊, 等咗一round, 又輪到孖寶玩喇! 玩咗兩次, 要走喇! 我地去玩第二樣野! 由於天氣實在太熱, 所以一家四口走咗入去隔離個Lego舖頭涼冷氣, 孖寶兄弟冇嚷著要買Lego, 好乖, 抵讚!

玩第二次, 媽媽鼓勵佢兩個調轉車揸

Driving School隔離就係消防局, 細佬係"消防員", 點可以唔入去玩呀? 入去排隊, 條龍都唔算長, 同埋去得幾快, 原來出到室外仲要排, 出咗去先至係戲肉, 無論前面走咗幾多人, 條龍係冇郁過der...! 排咗30-45分鐘, 終於輪到我地! 要一家四口合作, 整郁架消防車, 然後向住個窗口射水, 扮救火, 只係玩咗5分鐘, 但就排咗1個鐘。

老公今次帶咗自拍神器, 可以一家四口自拍

排隊中

要上下郁動支貢杆, 架車先至會前進

消防局對面就係Police Station, 其實只係一個有冷氣的休息室, 內有大量Lego俾小朋友砌, 孖寶又玩到唔捨得走, 老公話佢過隔離睇吓咩黎, 我看住孖寶, 原來隔離係睇4D電影, 老公想排住隊先, 工作人員話唔得, 要冚家過晒黎排, 哥哥初頭扭計唔肯走, 喊, 最後都要迫佢走, 佢喊晒咁要爸爸安慰, 入咗室內, 拎咗3D眼鏡, 仲要係D門口前面排隊, 又等咗好耐, 終於開門, 但我地隻門唔開, 其他門就開晒, 眼見其他人衝晒入去坐, 就黎冇晒靚位喇!

門開咗, 我地帶住孖寶都行唔得快, 但都算叫做坐咗個中間偏側邊位, 是但啦! 唔記得哥哥定細佬話隻3D眼鏡爛咗, 爸爸又要走返出去搵人幫佢換過副, 等咗好耐, 全院黑晒, 開場喇! 孖寶兄弟第一次睇4D電影, 媽媽驚佢兩個會好驚, 點知又冇喎! 原來除咗立體之外, 仲會有風吹埋黎, 主角打交時又會有水噴埋黎, 都幾得意! 睇睇吓, 哥哥突然話急vee vee, 吓? 又黎? 黑媽媽, 點行返出去呀? 辛苦爸爸帶哥哥出去, 我留係度繼續同細佬睇! 過咗5分鐘, 睇完lu...

孖寶第一次睇4D電影

出咗戲院, 同細佬去對面廁所, 再call老公, 原來佢話搵唔到廁所, 行咗去正門個廁所... 好遠! um..............

本來想去餐廳買野食, 嘩! 條龍超長, 睇怕排完隊個Legoland都閂門喇! 孖寶見到有個用船做主題的兒童遊樂場, 二話不說衝咗去玩, 媽媽太肚餓, 不行了! 媽媽去熱狗檔買熱狗, 條龍短少少, 但都排咗起碼20分鐘, 買咗4條熱狗, 一杯橙汁, 另外去汽水機買咗支冰凍可樂俾老公。好在買咗4條熱狗咋, 原來每條熱狗只有半個包 (條腸就係完整一條)。

一家四口的午餐

食完野, 媽媽感覺好返D, 老公話佢睇住孖寶, 叫我去舖頭行吓, 我買唔到野俾自己, 只係買咗個Wonder Woman Lego人鎖匙扣俾姑媽。

細佬好記得Legoland入面有Lego形狀薯條食, 佢話點解仲未買黎食? OK! 媽媽去買! (媽媽變咗排隊 + 俾錢機器), 可能已經過咗食飯時間, 少咗D人排隊, 排咗10分鐘就買到。不過, Lego薯條只係外型特別, 食落去冇乜特別, 哥哥食咗兩條就放棄咗。天氣太熱, 我地同孖寶個水樽D水已經飲晒, 媽媽走去買補礦力俾佢地飲, 細佬超級like (但佢之前屙嘔肚痛, 買俾佢飲佢又唔肯飲喎!)。

食咗一半先至記得影相

Lego舖頭入面又有大量Lego免費俾小朋友... 砌, 所以孖寶又玩到唔捨得走。玩咗好耐 (爸媽呆等咗好耐), 走喇! 去第二度行吓, 本來想玩揸船, 但要排一粒鐘, 孖寶話唔想排。媽媽見揸飛機比較少人, 都排得過, 於是去咗排, 排咗20分鐘就有得玩。之後去行吓其他舖頭, 每間都唔同主題, 行行吓去咗海盜主題區, 爸爸同哥哥去咗玩射水, 濕晒, 媽媽同細佬... 緊係呢埋一邊啦!

同Lego人合照

最後去咗DUPLO (BB Lego)主題區, 孖寶細過時玩過 DUPLO, 裏面D Lego人, 屋, 馬仔, etc. 全部都變大晒, 主題區盡頭有小火車, 唔多人排隊, 媽媽同孖寶一齊玩, 爸爸負責影相。玩完小火車原來已經5點喇! 樂園廣播話要閂門喇!

哥哥用嬲嬲豬的表情影相

臨走經過正門的Lego舖頭, 又入去行一圈。媽媽見孖寶咁乖, 冇扭計要買Lego, 所以主動話送兩盒散裝Lego俾孖寶, 細佬開心到跳起, 佢話: 真係好喇! 又多一份旅行禮物! (又係媽媽去排隊俾錢...)

下午5點離開Legoland (之前聽人講話呢個Legoland好細, 玩半日都玩晒, 但我地玩足全日, 只係玩咗四個遊戲, 仲有好多未玩喎! 因為吓吓都要排隊排1粒鐘, 全日大部份時間都係排隊)。

到此一遊相

離開Legoland, 行返去對面個多層停車場, 日泊盛惠1000円, 平過泊香港的廸廸尼。孖寶上車冇幾耐, 已經攰到瞓著咗。

孖生兄弟連瞓覺姿勢都係一樣

老公話去附近睇汽車零件, 名古屋真係好塞車, 雖然叫做附近, 但都要揸30分鐘車先至去到。老公落車睇, 我冇興趣, 加上孖寶瞓咗, 我要留係架車度看住佢地。老公睇咗20分鐘, 佢話入面好大, 好多野睇, 行一日都行唔晒。好在香港冇呢D舖頭, 如果有, 睇怕一到星期六, 日, 我就會冇咗個老公。

老公, 你睇我影得你好似有6呎咁高, 

但你就成日影到我又肥又樣衰囉!

老公話佢仲想去附近的Kids Land買模型, 又揸咗30分鐘車, 老公泊低咗架車係街邊, 自己衝入去買, 呢個時候, 孖寶哥起身, 佢話點解唔泊架車入停車場? 我話爸爸好快出黎! 由於已經係夜晚7點, 加上下晝只係食咗一個熱狗(哥哥只係食咗半個), 佢兩個話肚餓, 好在我地成日都買定袋朱古力包擺係架車入面, 孖寶一人食咗一個朱古力包。10分鐘後, 老公拎住一袋二袋行返出黎, 似乎收鑊豐富喎!

媽媽都好肚餓, 所以要去食飯, 之前上網睇, Parco西館8/F有Minion Cafe, 就係前面, 於是就諗住去試吓。由於係市中心, Parco泊車好貴, 一個鐘800円, 是但啦! 上到8/F, 一出lift已經見到Minion Cafe, 孖寶話: 媽媽, 我見到Minion呀! 前面大概有10個人排緊隊, 呢個時候, 哥哥突然話要屙poo poo! 吓? 又黎? 又係你? 爸爸拿拿林帶哥哥去廁所, 細佬陪媽媽等位。冇野做, 媽媽拎個menu黎睇吓, um...... 冇野啱孖寶食喎, 算喇! 都係去第二度食。媽媽拖住細佬仔去廁所搵爸爸, 我地落樓下果層睇吓有咩食, 兜咗個圈, 食大碗飯啦! 叫咗3個set, 老公話唔好食, 又貴!

媽媽的牛油果三文魚飯, 冇味, 

要問待應俾碟wasabi豉油撈黎食

孖寶是日晚餐

由於今日已經係Day 5, 媽媽仲未買到野, 爸爸叫媽媽自己行過隔離商場睇Jelly Beans, 佢睇住孖寶。夜媽媽, 叫我一個女人仔係條街度行, 仲要我係分唔到東南西北der... (雖然我大學主修地理), 又唔知Jelly Beans係邊層樓, 點搵呀?! 我話我唔行喇! 算吧啦! 返酒店喇!

8點離開, 又要揸1個鐘頭車先至返到酒店, 老公仲話想去酒店對面個Supermarket買D野, 結果8:55去到, 我地一家四口好似刧匪咁, 衝入去舖頭, 只係買咗2杯乳酪同1袋朱古力包, 好在收銀阿姐冇黑面。

返到酒店, 又係老公幫孖寶沖涼, 我又去大浴場沖涼 + 浸熱水, 冇人, 好C服 。孖寶急不及待, 要拆盒Lego出黎玩, 哥哥話佢知道要好小心玩, 因為D Lego咁細粒, 好容易會跌落條床lar入面 (黎到日本第一次聽到哥哥講D咁生性的說話, 爸媽突然有老懷安慰的感覺!)

 好專心砌Lego

跟說明書, 砌咗蟹仔、跑車同風車屋

哥哥好滿意自己的作品

差不多11點, 孖寶終於都肯瞓覺, 11:30媽媽都要瞓覺喇!

Day 5 完