孖寶第一次去戲院

其實, 我同爸爸一直都好想帶孖寶去戲院睇戲, 因為爸爸細個時候, 佢老豆都有帶佢去戲院睇戲的美好童年回憶, 至於我, 就緊係見到人地可以帶小朋友去戲院一齊睇戲咁開心 (其實只係幻覺嚟!), 自己咪又好想帶孖寶去囉!

諗咗一年, 今年暑假, 終於都嘗試帶孖寶去戲院! 吓? 乜帶小朋友去戲院都要諗一年? 唔係呀化? 冇生過孖B(仲要係孖仔)的朋友, 永遠冇可能明白, 兩個大人拖住兩條暴龍出街係咩感覺! 雖然一直都未帶過孖寶去戲院睇戲, 但我同老公已經可以想像到會發生以下的情況 :

(1) 戲院開場時會熄晒燈, 佢兩個會爆喊話好驚!
(2) 戲院D音響太震撼, 佢兩個會爆喊話好驚!
(3) 睇睇吓戲, 失驚無神, 佢兩個會突然間發癲話唔想睇, 一定要出返去!
(4) 明明開場之前已經去咗廁所, 佢兩個會係睇戲期間突然輪流話要去廁所!
(5) 開場5分鐘後, 佢地就會不停問, 咁耐o既? 幾時做完呀? (x N次)

今年暑假有兩套孖寶一定會鍾意的卡通片上畫 -- Minions (壞蛋奬門人3)同埋反斗車王3, 於是爸爸媽媽就冒住嘥晒D錢同俾人白眼的風險, 破天荒帶孖寶去戲院睇戲喇!

7月2日睇早場Minions, 由於係第一次, 所以好早就去到戲院, 係外面同D電影Poster影吓相先, 由於早入場, 入咗場仲係有燈既, 幫孖寶set好個靚位, make sure冇人遮到佢地的視線, 然後媽媽忍唔住問咗佢地N次, 驚唔驚呀? (而家究竟係嚟睇戲, 抑或要推佢地入手術室做手術呀?) 之後熄咗燈, 開場, D音響都幾大聲, 媽媽又忍唔住問多N次, 驚唔驚呀? 佢地都話唔驚! 成套戲90分鐘, 佢兩個都冇發癲叫走, 冇話好驚, 冇爆喊, 只係呆晒, 間中見到Minions出場就笑兩聲, 一家四口順利係個戲院入面睇完套戲出返黎, 踏出戲院門口果一刻, 媽媽簡直覺得好似太空人去完火星探險, 然後成功返落嚟地球, 踏出太空艙門果一刻的感覺一樣!

8月6日睇早場反斗車王, 由於買飛時已經見到幾full, 所以提早30分鐘出門口 (間戲院只係屋企樓下個商場入面), 係戲院外面同反斗車王的Poster影相, 然後入場 (細佬嚷著要買爆谷入去食, 我話我地有百力滋喇!) 好早入咗場, 又係要手快快納咗D坐墊, 幫孖寶set好個靚位, 開場熄燈都冇喊, good! 播咗一大輪廣告同另外一套卡通短片 (我同老公仲以為買錯飛), 終於做反斗車王喇! 不過, 可能係賽車, 加上我地坐最後排都幾近D喇叭, 反斗車王D引擎聲超級大聲, 開咗場一陣, 我已經見到哥哥用雙手掩住耳仔, 爸爸抱佢坐大脾, 早知唔駛買4張飛啦 (我見隔離個小朋友, 高到去我心口都係坐佢老豆大脾, 咁又可能係我心口矮啦)! 我同細佬仔坐, 我問佢驚唔驚, 佢話唔驚, 不過, 見佢不停用手捽眼, 可能D光太刺眼, 流眼水, 似乎帶佢地睇戲, 根本係虐待緊小童! 成套戲100分鐘, 其實幾好睇, 唔係卡通片咁簡單, 係「有D野講」果隻! 不過, 孖寶咁細, 應該唔明! 睇完戲出黎, 孖寶開始發癲! (應該係要懲罰老爸老媽夾硬帶佢地去睇戲!) 真係好對唔住! 應該冇下次架喇!