節目1
夏天咁熱, 最佳的親子節目莫過於一家大細去游水, 不過, 自從6月開始, 屋企附近個沙灘就淪陷咗, 唔好話星期六、日, 就連平日都爆晒, 爸爸最初都係唔死心, 星期六朝早9:30堅持要去沙灘, 結果等咗一個鐘, 都冇位泊車, 最後死死地氣揸返架車返屋企, 去樓下會所個泳池, 自始之後, 每個星期六早上, 只要唔係落雨, 我地都會落會所個泳池游水, 不過, 每次去游水, 其實只係去玩水, 係陪孖寶玩水, 因為佢地而家唔鍾意係BB池玩水, 要穿住個水泡, 係大人池玩, 所以爸爸媽媽要一人mark住一個, 慬防意外發生! 試過有一次, 拎咗隻消防艇落泳池玩, 孖寶一齊坐, 點知大家都側埋一邊, 結果兩個一齊跌落水, 好在拿拿林撈返佢兩個上黎咋, 嚇死媽媽! 不過, 佢地越黎越大個, 越黎越易湊, 有時, 我同老公都會輪流去游一陣水。
不過, 其實孖寶鍾意去沙灘玩多D, 所以廿四孝的爸爸媽媽, 就特登搵咗一日平日請下午假, 帶孖寶去赤柱食好野, 之後去游水, 爸爸話以前都唔敢帶佢地去高級餐廳, 驚佢地大吵大鬧, 而家終於可以帶佢地黎喇! 呢間係爸爸媽媽的指定飯堂之一, 有咩慶祝/特別日子, 都會黎呢度, 不過, 近來D質素下降咗!
節目2
夏天咁熱, 係條街行一陣都會中暑, 所以緊係行商場啦! 每個星期六游完水後, 爸爸媽媽都會帶孖寶去港九各商場行吓, 食Lunch, 嘆吓冷氣!
有時, 商場有冒險樂園, 就會同孖寶去玩吓, 就好似當年老豆帶我地去星光行地庫玩遊戲機一樣, 我D童年回憶, 係生咗孖寶之後返番晒黎!
算目3
去圖書館, 目的同行商場一場, 都係為咗嘆冷氣, 不過, 可能孖寶真係自小就比較少出街, 去圖書館都好興奮, 周圍走, 最鍾意去書架揀書, 然後叫媽媽借晒佢!
節目4
搭公共交通工具, 係! 呢個都係親子節目黎! 因為出街通常都係爸爸揸車, 孖寶由細到大都好少機會搭公共交通工具, 細佬仔第一次搭巴士好似係4歲, 佢地每次搭地鐵都會好興奮, 試過揸車過海, 泊低架車走去搭叮叮, 不過, 夏天搭叮叮真係好熱, 留返秋天去搭好D! 又試過揸車去尖沙咀海運, 泊底架車走去搭小輪, 雖然D泊車費遠超過搭叮叮同小輪的錢, 但見到孖寶咁開心, 一家四口又可以消磨咗一個下午, 呢個節目其實幾抵玩!
節目5
帶孖寶去戲院睇戲, 以前真係諗都唔敢諗, 點帶孖寶去睇戲呀? 佢地會無啦啦發癲, 雖然身邊都有朋友帶2、3歲仔女去戲院, 但我同老公都冇辦法想像, 要帶孖寶去, 跟本就係mission impossible! 今年終於等到佢兩個大咗D, 應該冇咁癲, 加上有佢地最like的卡通人物, 所以即管搏一舖, 結果, 竟然冇事喎! 雖然睇反斗車王3果次, 哥哥俾D引擎聲嚇到要坐爸爸大脾, 但總算可以睇晒成套戲, 順利由個戲院行返出黎, 簡直係今年暑假的壯舉!
節目6
暑假緊係要去旅行啦! 不過, 正當我以為暑假去旅行, 咪就係講緊暑假去果1次旅行囉, 但原來, 暑假期間係可以去唔止一次旅行架(身邊已經唔止一個朋友係咁做!), 真係全完冇諗過, 亦唔敢向老公提出, 公司亦冇咁多annual leave俾我! 所以我同孖寶望穿秋水, 都係望緊暑假尾的名古屋7天之旅! 就快喇! 仲有一星期咋!
節目7
留係屋企! 呢個都算節目? 係! 冇錯! 其實小朋友的世界好簡單, 佢地唔需要呢度去果度去, 咩體驗, 咩經歷, 佢地最需要係父母的陪伴/陪玩, 所以爸爸媽媽會陪佢地玩飛行棋, 煮飯仔, Tomica火車, 砌Lego, 打機 (呢個好緊要, 千期唔好俾佢地知道打機世界入面其實有好多Game, 而係限制佢地只可以玩一兩款Game, 暫時只係玩Mario賽車同釣魚, 仲要爸爸媽媽在場一齊玩, 同埋每次玩一至兩舖! 千期唔好俾佢地自己開機自己玩, 然後走咗去做其他野, 由得佢地打到天昏地暗, 咁樣一定死硬!)
