話說孖寶爸成日都買玩具...... 俾佢自己, 包括:
(1) LEGO, 由舊年開始, 不停咁瘋狂咁買, 每次都至少買2盒, 每盒過$1000, 目測屋企現時的LEGO總值超過$15000
(2) 迷你火車, 唔係孖寶玩果D Tomy 電動火車仔, 係俾麻甩佬玩+收藏+鑑賞, 仿真度極高, 1: 150的模型電動火車, 上個月去青馬大橋觀景台間火車模型舖頭睇完後, 當日下晝就即刻揸車去荃灣買, 然後痴咗條筋, 瘋狂咁係Amazon jp 買咗大量的火車+路軌+場景, 請問屋企那有位俾阿爸爸你搭個場景呢?
(3) 氣槍, 老公聲稱佢未識我時已開始玩, 當年屋企有2枝氣槍, 係咩? 同你拍拖3年+結婚12年=呢15年來, 從未見過你玩氣槍喎?! (我懷疑佢呢5年來照顧孖寶的壓力, 而家要一次過爆發晒出黎, 所以佢狂買玩具俾自己玩, 發洩!)
眼見孖寶爸買玩具已經去到極瘋狂的境界 (佢已經癲咗!)
孖寶媽冇理由咁刻薄自己? 所以點都要搵D野買吓, 仲要唔貴唔買! 不過, 孖寶媽D興趣好狹窄 (係我老豆遺傳同一手造成, 我的前半生好可憐!) 孖寶媽鍾意的, 不外乎係買吓衫, 化妝品, 護膚品, 同護膚有關的儀器, Little Twin Stars, 森林家族, that's all! (但以上種種都只係幾百, 甚少過千, 更加好難超過1萬, 所以, 諗諗吓應該要加入埋首飾(唔係豬耳繩喎!)
最近, 孖寶媽就買咗個玩具俾自己 -- Hitachi Hada CRie Hot & Cool 溫熱冰肌離子清潔及保濕器 (水貨$1400), 本來想買今年9月最新推出的型號 (行貨$2990), 但由於最新型號只係多咗個色斑感應功能(平時每月都去診所打1064, 雖然仍然有斑, 但唔算多/深色), 加上都唔知部機有冇料到, 又唔知自己有冇恆心每日用, 所以都係平平地買上一代個型號玩吓算喇!
個紙盒雞雞地, 上面D字又濛濛地,
有D驚唔係買咗水貨, 係假貨囉~!
買咗即晚試用, 由於係水貨, 說明書係日文, 所以要上網睇返中文說明書, 根據說明書, 整個清潔+保濕導入+加強滲透+冷卻程序只需11分鐘。但實際上, 我搞咗差不多半粒鐘, 我搞咗D乜?
(1) 首先要將化妝棉固定係導頭上, 倒D化妝水落塊棉上面(要塊棉濕透), 我用SKII的Clear Lotion (有AHA酸幫助軟化角質), 然後開始第一個程序 -- Hot Cleansing (需時3分鐘), 我順便清潔埋條頸, 3分鐘後會自動停機。
塊棉圓圈入面的部份又好似真係黃黃地,
似乎真係導出咗D污垢, 感覺良好!
(2) 清潔程序完成, 拆返塊化妝棉出黎, 同埋望住塊棉, 黃黃地, 感覺(只係感覺)塊面乾淨晒。再摸吓塊面, 好乾爽, 唔似平時用塊棉就咁抺上面, 抹完都係痴痴笠笠 (咁又已經過咗2分鐘)。
(3) 抺下個導頭(驚頭先D污垢痴咗係導頭, 咁一陣做導入咪導入埋D污垢?!) 開始第二個程序 -- Hot Moisturize (需時3分鐘), 我用SKII神仙水, 說明書話水狀要用化妝棉, 凝膠狀可以直接搽係導頭上面, 由於用神仙水整濕成塊化妝棉=倒錢落海, 我冇咁做, 我只係用神仙水拍濕全面(用咗1分鐘), 然後做導入, 但不好推, 神仙水係半乾濕狀態下變得痴痴笠笠, 惟有用導頭按壓, 希望效果差不多, 我都有做埋頸, 3分鐘後又係會自動停機。
(4) 摸吓塊面, 仍然係痴痴笠笠, 究竟係導入咗, 塊面"索"飽水? 抑或係D神仙水俾個導頭的熱力蒸乾咗? 猶疑咗一陣, 繼唔繼續下一個程序 -- Hot Mask? 塊面咁痴, 仲要再搽D精華落去? 會唔會更加痴(線)? 但係頭先溫熱保濕, D熱力已經將D毛孔打開咗喎(說明書係咁寫), by common sense, 毛孔打開咗, 應該趁機搽精華, 等佢更加吸收喎! (咁又過咗2分鐘)
(5) 決定做埋加強滲透(需時3分鐘), 我用Shiseido Ultimate Power Infusing Concentrate, 係Shiseido 近年力推的皇牌保濕精華, 說明書話, 可以直接搽上面先, 我用平時的分量, 即搽上面迅速吸收後, 感覺潤滑但唔笠, 不過, 原來咁既份量, 個導頭好難推, 好"啜", 加上導頭的熱力明顯比之前兩個程序高, 塊面開始有少少紅同不適感覺, 於是那那林搽多一倍的精華上面, 推導頭就順滑咗好多, 但鼻位有骨, 根本唔貼面, 又推唔到, 似乎要放棄, 推咗3分鐘自動停機, 但因為未做條頸, 又開多次機, 做埋條頸 (約1分鐘後熄咗部機)。
(6) 由於感覺塊面非常非常的笠, 好唔舒服, 之後的程序係要用背面的金屬頭做冷卻, 咁咪會整"污糟"背面個金屬頭囉?! 又猶疑咗2分鐘, 真係頂唔順, 決定去洗咗塊面先(浪費晒D精華, 好在係之前買化妝品的贈品試用裝黎!) 洗完面, 用紙巾輕輕印乾, 感覺成塊面清爽晒! 正! (咁又過咗2分鐘)。
(7) 終於都黎到最後一個程序 -- Cool (需時2分鐘), 等D毛孔收縮返! 說明書話背面的金屬頭需要10秒先至進入冷卻程序, 我太心急, 即時就擺上塊面, 其實金屬本身都有少少冰涼的感覺, 我個人最鍾意呢個冷卻程序, 個金屬頭比我想像中凍, 好似冰敷咁(成日諗起如果孖寶跌/撞親, 可以借黎凍敷), 2分鐘實在唔夠喉。
(8) 由於冷卻前已經洗咗塊面, 所以冷卻後, 塊面凍凍地, 更加爽! 正! (不過, 水潤保濕的感覺就冇晒! 希望頭先D神仙水同精華已經導入咗啦!) 所有程序完成晒, 仲要用濕紙巾抺乾淨前面的導頭同背面的金屬頭(我唔敢用水沖呀!驚整壞部機), 再抺乾, 最後用跟機的膠蓋蓋住兩個導頭, Finished! (咁又用咗1分鐘)
整個「療程」完成, 我用咗足足22分鐘, 係說明書聲稱11分鐘的一倍時間!
效果:
(1) 用咗3日, 暫時未見到咩效果! 但每次導出完, 睇住塊棉就感覺良好!
(2) 塊面冇紅, 冇起粒粒 (但今朝右邊面起咗一粒紅點, 按落去唔痛, 唔算好凸起, 搽咗暗瘡膏, 希望撳得住, 唔好發出黎!)
(3)都算係冇傷害性! (上網睇D人話有空姐用到爛面!)
檢討:
似乎用神仙水造導入, 然後用精華加強滲透, 太過份 (因為今朝右邊面已經標咗粒瘡仔), 我決定今晚試吓用Clear Lotion清潔 --> Shiseido精華導入 --> Skip咗Step 3 --> 冷卻
後記:
11月28日, 右邊面谷咗一粒瘡, 搽咗5日Zindaclin 1% Gel, 停止咗生長, 但就硬咗, 同埋淤咗色! 大鑊!
12月14日, 3星期之前谷起粒瘡, 已經扁返(但仍然係淤色), 但附近又谷咗另一粒瘡出黎, 咩事呀而家? 唔通真係部導入機搞到爛面?
2018年2月14日, 由於之前每日用, 塊面開始生瘡, 好驚! 由1月起, 已經冇每日用, 只係一個星期用1至2次, 而且只係導出污垢, 或只係敷Mask時用加強滲透, 所以so far, 已經冇再因為用呢部機而生瘡喇!
