孖寶兄弟語錄 (6)

由於佢地儲埋好多垃圾, 最近佢地愛上咗剪紙碎, 仲鍾意儲埋成箱紙碎, 媽媽為咗減輕對屋企儲存空間的壓力, 提議細佬仔不如掉咗個扭蛋殼 (媽媽天真以為咁樣就可以減輕對屋企儲存空間的壓力?!)

媽媽: 不如掉咗呢個啦! 都冇用!
細佬: 唔得架! 有用架!
媽媽: 吓? 有咩用?
細佬: 要黎保護對眼! 同埋要黎睇野既!
媽媽: 唔係掛?! 咁你示範點用喇!

爸爸媽媽即場笑到收唔到聲!!!

唧花曲奇

話說自從7月頭, 媽媽每個星期六下午都會整曲奇, 由於整曲奇已經整到零失敗, 就開始Pat Pat痕了, 要試吓整好Hit的唧花曲奇!

唧花曲奇所需材料同之前整的印模曲奇一樣, 所以唔再詳細介紹, 主要分別係, 整印模曲奇的麵團唔可以太軟, 所以通常舊麵團整好之後要放入雪櫃雪20分鐘左右至硬身, 至於唧花曲奇所需的麵團要軟身, 所以整好咗麵團之後, 就直接放入唧花袋, 咁先至容易唧到靚花, 焗之前要放入雪櫃雪20分鐘至比較硬身, 咁焗出黎先至唔會溶晒, 走晒樣!

不過, 整咗2次唧花曲奇都係唔脆既, 反而似BearBear熊罐果隻曲奇咁, 食到成口粉 (老公唔係好Like), 今日上網爬文, 先至知道唧花曲奇係唔會卜卜脆架, 成功的唧花曲奇口感應該係鬆化, 一入口就化晒, 咁即係我其實成功咗喎! 其實, 我個人都唔係太Like果種口感, 始終覺得曲奇係要脆先至好食, 不過, 我好鐘意唧花的過程, 好好玩, 唧得靚會好有成功感, 唧唔靚我會剷走佢再唧過,加上我的忠實Fans -- 細佬仔仍然好Like媽媽整的曲奇, 佢話, d曲奇好淋呀! 好好味! (笑樣加一滴汗的表情符號)

Anyway, 都分享一吓唧花曲奇的製作方法:

(如要整朱古力味, 可以係打完牛油同糖之後, 加入朱古力粉或美祿粉, 個人覺得朱古力粉冇乜味, 反而用美碌粉就超好味, 記得如果加咗朱古力粉, 咁麵粉就要落返少D, 唔係舊粉團就會變成超硬, 好難唧花)

1. 取一個即棄膠唧花袋 (千期唔好用布質果隻, 我用過一次, 唧到標油, 成手都係, 個袋又難洗, 感覺好唔衞生, 最後成個袋掉咗)

2. 在唧花袋的三角型底部剪一個開孔 (開孔要配合唧咀大小, 唧咀用最普通的花紋圖案就可以)

3. 在焗盤舖上牛油紙備用

4. 搓好麵團, 趁麵團軟淋淋就放入唧花袋, 扭緊唧袋的上端

5. 唧花有好多方法, 我用的是最簡單的打圈唧法, 順時針由外到內唧, 最後稍為按壓一吓中央部份

6. 唧好花後, 擺入雪櫃雪20分鐘至硬身

啱啱唧好的曲奇係最靚架, 條花邊好sharp, 成個曲奇好立體,
但焗完之後就......

6. 焗爐預熱170度, 焗15分鐘左右即成

7. 打開焗爐約10分鐘, 然後取出放涼

孖寶兄弟語錄 (5)

每晚孖寶瞓覺前, 媽媽都會陪孖寶一陣(其實都成30分鐘, 咁叫做一陣?!), 熄晒燈, 媽媽坐係孖寶床邊, 通常孖寶都唔會瞓覺, 而且不停咁同媽媽講野, 要媽媽經常打斷佢地話題, 早幾日......

細佬: 媽媽, 你老咗, 我買部按摩機俾你, 可以碌上, 碌落!
媽媽: 嘩! 細佬你好錫媽媽, 好孝順啊!
細佬: 係呀! 你要擺你隻大腿上去, 好林果度, 按摩, 咁就會好舒服喇!
媽媽: (心諗: 乜我隻大腿好林咩?!)

準備升K.2 (2)

其實就冇咩要準備, 因為原校升讀K2, 同埋都係返幼稚園啫, 所以唔似得返小學/中學咁, 要好多準備。

由於孖寶兄弟生長好緩慢, 所以舊年買果套XS碼校服仍然啱著! 至於返學鞋, 細佬放暑假前話對運動鞋好窄, 爸爸買咗對超大碼俾佢, 9月開學應該仲有鬆, 哥哥就要度吓腳仔, 可能都要買過對鞋。

至於最需要準備的, 都係作息時間, 經過超過一個月的調校, 佢地已經養成早睡早起的習慣喇! 爸爸媽媽真係要開香檳慶祝, 以下係孖寶的作息時間表:

07:45  起床 (佢地最近呢幾日都7:30起身, 然後過黎爸媽間房, 上埋我地張床)
07:45  刷牙
08:00  食早餐
08:20  食完早餐, 去便便
08:30  自由玩樂時間
12:30  食午餐
13:30  午睡
14:30  起床
15:00  下午茶 (鈣思寶/益力多 + 餅乾, 呢排唔鍾意食乳酪)
15:30  可以睇30分鐘Youtube
16:00  自由玩樂時間
18:30  沖涼
19:00  食晚餐
19:45  爸爸媽媽陪孖寶玩遊戲時間
20:45  刷牙
21:00  講故事
21:15  返房準備瞓覺
21:30  媽媽陪孖寶
22:00  瞓著 (之後就係媽媽的自由時間喇! YEAH!)

至於最需要準備的人 -- 應該都係媽媽! 因為媽媽要朝早幫手, 包括幫佢地刷牙, 同佢地一齊食早餐, 換衫, 帶佢地返學 (因為工人姐姐一個人無可能又整早餐, 又照顧到佢地, 一朝早趕時間返學, 媽媽一定要幫手), 所以媽媽由今個星期開始, 提早15分鐘起身, 梳洗, 換衫, 化妝, 如果要同爸爸落樓下食咗早餐先, 仲要再早20分鐘起身。另外, 媽媽要準備心情應該黎緊K2的功課壓力, 吓? 功課壓力? 點解唔係小朋友有壓力, 係個阿媽有? 唉! 話說細佬仔係一個好有責任心的小朋友, 食完飯會主動拎D功課出黎做 (呢幾日媽媽講故事 -- 故事中的主角話: 最開心的事就係畫圖畫喇! 至於細佬, 佢竟然話: 開心的事就係做功課! 好想錄佢音!) 但係哥哥, 每次叫佢拎功課出黎, 佢都十萬個唔願意, 每次問佢想唔想做暑期作業, 佢都話唔想! 所以媽媽的壓力就係咁黎 -- 係叫人做功課的壓力! (真係唔敢想像升咗小學會點......)

Anyway, 早幾日, 媽媽同爸爸傾計, 大家都有同感, 最近湊孖寶輕鬆咗 (哥哥喊少咗, 雖然佢都會因為好少事而爆喊, 但再冇喊到歇斯底里, 都算快咗收聲!) 媽媽同爸爸講, 好似最辛苦的階段已經過咗, 要好好享受黎緊呢2年喇! 因為上咗小學, 就會係另一個戰場, 另一個「更辛苦」階段的開始!

一覺瞓天光!

一覺瞓天光?

做咗人父母的, 應該已經忘記咗呢個詞語, 或者已經唔知係咩黎! 話說自從懷孕中期開始, 媽媽已經唔可以一覺瞓天光, 因為個肚實在太大, 太重, 每晚要轉身一定醒幾次, 到懷孕後期, 更加因為太辛苦, 要坐到天光先至瞓得著!

到咗孖寶出世之後, 我同老公都唔可以一覺瞓天光, 因為要餵夜奶, 無論係一齊起身餵, 抑或輪流起身餵, 都係無覺好瞓, 甚至係無覺可瞓!

到咗孖寶6個月叫做戒到夜奶 (11點餵完, 第二朝6點再餵), 但爸爸媽媽都唔可以一覺瞓天光, 因為孖寶會半夜起身爆喊, 除咗要抱佢地起身, 安撫一輪之外, 哥哥就要不停幫佢執奶咀同塞奶咀, 細佬就要不停幫佢換紗巾, 摺靚條巾(啱啱fit佢個口型), 然後塞紗巾入佢個口, 無論天氣凍, 天氣熱(開冷氣), 都要全晚不停起身檢查有冇FU被, 凍唔凍, 爸爸媽媽想一覺瞓天光? 跟本冇呢個權利/可能, 除非係死咗!

到咗孖寶戒咗奶咀/紗巾, 佢地半夜仍然係會爆喊, 仲會變本加厲 --> 喪喊,老公甚至用「撞邪」黎形容佢地, 因為係合埋雙眼, 精神失常咁雙腳狂踢, 抱住佢地係會傷及你內臟既! 所以惟一方法係放低佢係大人床或梳化由得佢喊 (因為驚嘈醒埋另一個, 所以通常一開始已經急急抱佢離開現場先), 再唔收聲就開晒全屋的燈, 務求令佢, 快D醒呀你! 快D醒呀! 由於佢地係半夜爸爸媽媽EQ最低的時候搞D咁既野, 所以爸爸好多時都忍唔住車巴佢地! 發展到後期, 佢地一邊喪喊, 一邊大叫: 唔鍾意爸爸! 結果, 只有媽媽可以收拾個殘局, 留守到最後一刻, 即make sure佢瞓咗先, 試過頂唔順, 以為佢差不多瞓著, 可以走得, 結果媽媽返房一瞓上床, 又聽到爆喊聲, 媽媽又重覆做返同一連串動作 (哥哥有時仲大叫鼻塞, 抖唔到氣, 媽媽要幫佢洗鼻, 吸鼻, 噴鼻, 仲要捱鬧!)

備註: 最艱苦時期係每隔兩個鍾, 由唔同的人爆喊! 要安撫, 抱抱, 等佢收聲, 陪瞓, 直到佢瞓著, 最快要30-40分鐘, 輪到媽媽返房, 聽住爸爸的坦克車聲, 要典床典足一個鐘先至瞓得返, 但係30分鐘後, 喊聲又響起)

呢個情況持續咗3年...... 只有3個字可以形容 -- 「人都癲」!

最近, 好似開始漸見曙光喇! 話說最近2星期, 孖寶再冇半夜起身爆喊喇 (行雷閃電除外, 哥哥好驚, 話要同我地瞓, 至於細佬, 第二朝問返佢, 佢竟然話聽唔到行雷聲同哥哥的爆喊聲, 勁!)

我同爸爸終於再嚐一覺瞓天光的滋味 -- 爽!

孖寶兄弟語錄(4)

話說呢幾日爸爸個pat pat好痕, 佢好想買架電動車俾孖寶, 但只能買一架, 兩個人, 得一架車, 點玩?

爸爸: 如果我買一架電動車返黎, 好唔好?
細佬: 好呀!
爸爸: 但我買一架咋喎, 你地會唔會打交, 爭住玩?
細佬: 唔會架, 我會讓哥哥玩先, 我排隊!
爸爸: (雙眼亮晶晶) 吓? 真係架? 細佬你好乖! 咁你俾哥哥玩先, 玩幾耐呀?
細佬: 玩一陣, 只可以玩一陣架咋!
爸爸: 但係如果真係兩個都爭住要玩, 打交, 搞到喊晒, 咁點呀?
細佬: 咁就兩個都唔俾玩, 爸爸掉咗架車佢, 連乖果個都冇得玩架喇!
(正當爸爸媽媽想講野既時候......)
細佬: 我好明白事理架! (配合埋佢個沾沾自喜樣)
(爸爸媽媽即時笑到出唔到聲)
細佬: 你地兩個做咩笑到咁?! 吓?! 笑咩? (佢自己都忍唔住咀角微微向上)
爸爸: 因為細佬你真係好明白事理! 爸爸都想講!
媽媽: 因為細佬你好可愛!!!


孖寶兄弟每晚瞓覺前都要爸爸、媽媽陪佢地, 通常係爸爸陪先, 同佢地傾吓計, 今日做咗D咩, etc. 然後就熄燈, 輪到媽媽陪...

哥哥: 媽媽, 我想你幫我R背脊!
媽媽: 我R一陣架咋!
哥哥: 唔得, 要R到我瞓著 (已經急不及待扯起件衫俾我R)
(15分鐘後......媽媽手軟...... 停咗)
哥哥: 媽媽你要幫我R背脊!
媽媽: 吓? 仲R?
哥哥: 我想你R到我瞓著!
媽媽: 咁我老咗, 你會唔會同我R背脊架?
哥哥: 會架! (媽媽心諗: 信你至奇! 我老咗, 你就嫌我一陣老人味, 唔想R)

細佬: 媽媽, 我想你坐係度陪我!
媽媽: 陪緊囉! 我陪一陣架咋! 你要自己瞓!
細佬: 唔得! 我想你陪好耐!
媽媽: 吓? 要陪到你瞓著?
細佬: 唔係! 我要你陪到聽朝!
媽媽: 吓? 聽朝? 咁我要瞓埋係你隔離喎!
細佬: 唔得! 你要坐係度!
媽媽: 坐到聽朝??? 咁我咪冇得瞓覺???
細佬: 你聽朝瞓返!
媽媽: 吓? 但係我聽朝要返工喎!
細佬: 媽媽, 我想你陪我呀! 陪好耐呀!
媽媽: 得啦! 你瞓咗先講啦!
細佬: 瞓咗講唔到架!
媽媽: (笑到出唔到聲)
細佬: 你做乜笑我?

孖寶兄弟語錄(3)

細佬: 媽媽, 我唔想你返工呀!
媽媽: 咁不如等你大個, 輪到你返工, 媽媽咪唔駛返工囉!
細佬: 咁你要幫我湊BB喎!
媽媽: 吓? 幫你湊BB?
細佬: 係呀! 我老婆幫我生咗D BB出黎, 你幫我湊!
媽媽: 吓? 仲要係D BB, 唔係一個?
細佬: 係呀! 好多BB!
哥哥: 媽媽, 你都要幫我湊BB!
媽媽: 吓? 仲要湊埋你D BB? 咁媽媽咪要湊好多個BB囉? 屋企變咗托身兒所!


哥哥: 媽媽, 我第二時大個返工, 你係屋企等我! 我會係個camera睇住你, 你記得揮手喎!
媽媽: 啊! (心諗: 到你大個, 都唔駛要個cam啦!)


細佬: 媽媽, 我第二時大個返工, 我放工就會即刻返黎
媽媽: 我驚你第二時會話, 媽媽, 我放工要同朋友出街食飯, 唔返黎食飯喇!
細佬: 唔會架! 我會返黎架! 我放工之後, 會去買餸, 然後煮飯俾你食!
媽媽: 咁又唔駛, 到時我唔駛返工, 等我去買餸啦, 我煮飯俾你食!
細佬: 咁食完飯, 我帶你落去玩"奸爸爹" (要入錢的機動遊戲)


哥哥: 媽媽, 第二時你老咗, 我食完飯, 然之後再餵你食飯!
媽媽: 好啊! 然然好孝順媽媽! 咁如果我好肚餓, 你可唔可以餵咗我食飯先, 然之後你先至食呀?
哥哥: 得架! 我餵咗你食先!
媽媽: (心諗: 希望我老咗都唔駛你餵啦!)

孖寶兄弟放暑假 (下)

由於暑假機票太貴, 加上爸爸媽媽早於4月已經買定10月去大阪的機票, 跟本冇諗過暑假要同孖寶去旅行, 不過, 孖寶兄弟放咗3個星期多暑假, 只係每星期返2個鐘興趣班, 其餘時間都係hea -- 食, 玩, 瞓, 好似好悶 (只係媽媽單方面的感覺), 為咗幫孖寶兄弟爭取一點福利, 媽媽提意不如去兩日澳門, 其實之前復活節都有諗過, 但計計吓條數, 去2日連酒店, 食, 玩, 交通費, 都要4000蚊, 不如用4000蚊買機票, 平平地去台灣都得喇!

今次媽媽下定決心, 希望孖寶兄弟暑假都叫咗去過旅行, 離開過香港, 加上上網睇人地一家大細去澳門玩, 好似都OK喎, D小朋友都玩得幾開心 (千期唔好再相信上網人地post出黎的開心相, 係假像黎!) 於是就係上星期四去買咗今個星期一,二去澳門的酒店+船飛package!

Day 1

孖寶兄弟未夠8點就起咗身, 一家人落街食個豐富早餐 (因為中午搭船冇野食架!), 9:50正式出發, 今次搭地鐵, 好在過咗返工時間, 唔算太多人, 都有位座, 去到上環港澳碼頭, 一個字: 亂! 兩個字: 好亂! 好多人, 又唔知換飛間舖頭係邊, 好在最後有人帶路, 換咗飛, 過關, 等上船, 11:30開船, 孖寶兄弟好快就瞓著咗!

12:40去到澳門, 過關, 出去搵接駁車, 冇指示, 初頭排錯隊, 後尾先至搭到酒店車, 去到酒店已經2:00 (唔知點解咁耐), 然後用咗超過1個鐘check in (睇到條人龍, 我以為自己排緊隊玩廸士尼機動遊戲, 我排果條隊最慢, 睇住兩邊D人都快過我搞掂, 我簡直火都黎埋!)

3:30上房擺低行李, 即刻搭的士去燒灰爐公園玩揸電動車(今次去澳門的重點節目), 5蚊可以玩15分鐘, 好抵玩! 孖寶兄弟加時咗2次, 合共玩咗45分鐘, 晒到塊面仔紅卜卜, 流晒大汗, 好開心! 由於媽媽實在太肚餓 (開始想發顛), 行去巴士站見到有間茶餐廳, 媽媽提議入去食D野, 飲吓野先 (爸爸認為唔駛帶水, 又唔俾媽媽行去買水, 媽媽就黎脫水喇!), 食完野已經4:40, 搭巴士去大賽車博物館, 可能D車唔郁, 個環境又暗, 冇咩野睇, 好悶, 孖寶兄弟冇乜興趣, 哥哥去咗個poo poo就走喇!  爸爸媽媽以前去澳門一定要去議事亭前地行吓, 食返個雙皮奶, 所以今次都去行吓, 原來雙皮奶搬咗去橫街, 正街全部都係自由行商舖, 冇野睇, 我地食咗一碗凍雙皮奶, 一碗凍冰花燉蛋(細佬好like, 但哥哥就乜都唔鍾意食), 走人! 爸爸話搭巴士返酒店, 行咗好耐先至去到巴士站, 加上等咗好耐都冇車, 媽媽已經捱唔住, 忍無可忍向爸爸要求搭的士, 但就係呢個時候, 有巴士, 結果就搭巴士返酒店!

7:30返到酒店, 好似去返人間咁 (冇錯! 頭先簡直係煉獄, 成街都係強國人, 周圍都係煙味, 沙塵滾滾), 帶佢地去商場3樓的Kids Cavern, 媽媽諗住一人送一份玩具俾佢地做旅行禮物 (爸爸覺得旅行本身已經係一份禮物, 唔明點解仲要送玩具, 但媽媽就覺得係旅行中買玩具, 夜晚返酒店房玩, 係一件好開心的事), 結果買咗兩盒Lego, 有8折 (應該平過香港反斗城買掛!) 之後去Food Court食野, 又係超級多大劣人, 仲要D位明明冇人坐, 同你講好多人, 想霸位, 黎到呢度, 媽媽已經想爆發 -- 永遠唔好再黎澳門! 呢度痴線架!

食完飯, 想買D野飲, 零食返酒店房做消夜, 結果係冇野食賣既, 好辛苦搵到間馬莎, 買咗支濃縮橙汁, 另外去手信舖買咗包豬肉乾同花生糖, 總算叫做有野食! 9:30返到酒店房, 爸爸用最快的速度幫佢地兩個沖涼, 媽媽執野, 10:00食少少手信加飲橙汁 (孖寶兄弟冇食, 只係顧住玩Lego), 10:30孖寶兄弟終於瞓咗喇 (以前去旅行冇11:30都唔瞓, 呢排因為Train咗佢地早瞓 (10點前瞓著), 所以去旅行都可以10:30瞓得著, 真係very good!

Day 2

校咗鬧鐘8點起身, 媽媽自己知自己搞得耐, 所以早10分鐘起身梳洗, 孖寶兄弟被人叫醒都冇喊, 刷牙, 換衫, 8:30落去食早餐, 爸爸首先去拎D野俾孖寶食先, 細佬仔好食得, 但哥哥就話唔想食 (媽媽已經興興地), 哥哥無啦啦話要去poo poo, 惟有叫爸爸帶佢去, 返到黎, 爸爸話佢冇得poo (媽媽又再興D), 爸爸去咗拎野食, 冇幾耐, 輪到細佬話要poo poo, 爸爸惟有再帶細佬去廁所, 哥哥又話要vee vee, OK, 一齊去! 返到黎, 爸爸繼續出去拎野食, 哥哥無啦啦又話要poo poo, 仲二話不說衝咗出去搵爸爸, 爸爸跟本係另一個方向 (媽媽已經忍無可忍, 要爆喇!), 哥哥大喊大叫, 好驚你呀! 搞到媽媽好似拐子婆咁, 餐廳所有人都望住我 (自從有咗孖寶, 媽媽的淑女形像完全被催毀!) 媽媽一手抱起哥哥, 狂打佢屁股洩憤! 爸爸見到咁既場面, 都話唔食喇! 返上房喇!

返到房, 搞掂佢兩個poo poo, 細佬又曳, 結果爸爸都忍唔住爆發喇! 鬧完一輪, 等一切resume normal, 已經係10:30, 仲諗住10點前可以加插去搭松山纜車, 唉! 拿拿林搭的士去返燒灰爐公園, 點知遇著個賤格的士司機, 兜路 (又嘥咗我D時間, 你想賺多D錢都唔好嘥我時間丫!) 去到呢度, 對澳門的印象已經跌到零分, 落車後, 老公一粒聲都冇出, 俾咗70蚊個司機算數 (尋日搭都係70蚊)

孖寶兄弟又揸車揸到唔捨得走, 又加咗2次時, 11:40老公聽到幾吓行雷聲, 話不如走人喇! 仲估孖寶兄弟會賴死唔肯走, 佢地竟然好順攤喎, 未夠鐘已經落車話唔玩喇! 於是行去對面搭巴士, 哥哥又話急, 頭先係公園有廁所又唔講喎! 離遠見到有架巴士黎緊, 仲要去vee vee?! 好在巴士黎到, 都上到車, 就係上車後2秒, 突然間傾盤大雨, 好感恩! 遲一秒都唔知點算!

搭巴士去觀光塔, 又係好多大劣人, 上到58/F, 好高呀! 孖寶兄弟唔驚高喎! 細佬話想買野飲, 一支橙汁要25蚊, 買支雪條20蚊, 媽媽買咗雪條, 2個都食得好滋味, 細佬見到有入錢的機動遊戲, 又想玩, 結果... 又同哥哥爭一餐, 哥哥仲咬細佬隻手添, 兩個俾爸爸訓示完一輪, 眼紅紅咁玩, 乜真係開心咩?!  再搭lift上去戶外觀光層, 行雷行到爆炸咁, 哥哥嚇到呆晒, 走人! 等lift等咗好耐, 強國人又打尖! 12:45返到落地面, 仍然好大雨, 邊度都去唔到, 加上孖寶突然眼瞓, 扭抱, 抱咗一陣真係瞓著咗, 惟有搵張sofa坐吓, 等一陣再算!  1:30雨細咗D, 爸媽決定照原定計劃, 去小腳板親子餐廳食Lunch, 等的士又等咗半個鐘, 又有強國人想打尖! 條! 媽媽對澳門已經跌到去負分, 呢刻, 只係好想搭船返香港!

去到餐廳, 哥哥見到有野玩, 即刻除鞋走入去玩, 細佬初頭唔想玩, 但媽媽鼓勵佢, 佢就走去玩, 兩個都玩得好開心, 連飯都唔想食, 爸爸發惡, 媽媽惟有先游說細佬食飯, 細佬易話為D, 跟住哥哥被爸爸迫食飯, 未見過佢地食飯食得咁快, 食完又玩過, 全完唔捨得走! 結果3:30先至走到!

By default爸爸諗住搭巴士返酒店, 但唔見有車, 而且仲要搭好多個站, 似乎要搭一個鐘喎! 爸爸終於屈服, 肯搭的士, 4pm返到酒店, 又去返Kids Cavern行吓, 到細佬扭計, 因為佢一定要搵架紅色的手推車, 好在最後都搵到, 4:40走喇! 要返酒店拎行李同埋等酒店車出碼頭。

5:15去到碼頭, 孖寶兄弟張船飛係23:00, 所以要排後補, 但安排好混亂, 跟本唔知有冇後補位, 最後5:45入閘, 話可以搭5:45去尖沙咀碼頭的船, 正當開心緊之際, 去劃位先至知道冇晒位 (得返幾個單丁位), 結果, 都係要搭6點班船去返上環, 是但啦!

幾經辛苦, 終於7:10返到香港喇! 哥哥扭計話要搭的士, 吓? 上環返將軍澳喎! 我知爸爸個心諗緊呢個符號「$」, 但由於大家都好攰, 個腦已經shut down咗, 算啦! 走去搭的士, 又要搵一大輪先至搵到個的士站, 仲差D排錯隊, 因為我地要搭過海的士, 的士去到中環已經塞車, 賴野! 7:30放工時間, 塞硬! 好在的士司機都醒目, cut黎cut去, 都唔算塞咗好耐, 8點返到屋企, 盛惠153蚊, 可以買到張船飛喇!

經過今次, 爸媽決定以後都唔會再去日本以外的地方旅行!  媽媽發誓: 下年暑假一定要去日本!!!

孖寶兄弟3歲8個月!

今日係孖寶兄弟3歲8個月喇!

兩兄弟仲係好細粒, 體重同身高都好似冇乜改變! 佢地的生長好似好緩慢, 係唔係要去睇醫生? 佢地表哥 (大佢地只係半年), 2歲半前同佢地身型差不多, 但冇見幾個月, 突然間由大熊變成忌安咁, 大咗兩個碼, 何解我兩個仔仲係停留係2歲半的身型?!

哥哥

體格發展
哥哥只有92cm高, 體重27lbs, 係超級瘦, 除咗衫只係見到一副排骨, 面朱登續漸消失, 變咗V刹面! 體能都唔見得好好, 落街玩一陣又話好攰, 要抱, 但係尋日爸爸同佢去睇耳鼻喉 (冇揸車), 爸爸又話佢好行得喎!

大腦發展
社交發展唔錯, 好易容識到朋友, 同表哥(唔係成日見)玩一陣就熟, 仲同表哥坐埋同一張凳食魚仔餅。說話都比以前有條理, 顯示大腦發展日漸成熟, 雖然有時都會九唔搭八, 但大部份時間講野都有紋有路。原來哥哥的記憶力都好強, 尤其認地方, 2歲前返過香港教會, 佢都認得, 爸爸揸車去探公公, 兜路經過, 佢都認得, 唔係喎, 唔係去緊公公果度, 呢度係"廚房教會"。次次經過嘉盈姨姨樓下, 就會話九龍灣, 經過牛頭角地鐵站, 又識得指住爸爸公司係上面。

情緒智商
哥哥的情緒管理仍然有待改善, 但呢幾日算係喊少咗, 有幾次爸爸媽媽以為佢會爆喊的位, 佢都冇喊到 (但眼有淚光), 希望佢可以繼續努力, 唔好再因為D好小的事就發脾氣, 爆喊, 喊到歇斯底里。

細佬

體格發展
細佬仍然好鍾意食野, 尤其媽媽整的曲奇餅、藍莓撻、蛋撻, 飯後有時仲想食個蛋糕仔 (但因為試過飽到嘔, 所以會俾爸媽阻止), 所以細佬雖然細粒, 得93.5cm高, 30lbs, 但都有D肉地, 唔係排骨仔黎架!

大腦發展
細佬講野好有邏輯, 係思考型! 有次爸爸問佢, 你錫媽媽多D, 抑或錫老婆多D (媽媽即時叫爸爸唔好問, 知道答案盞媽媽傷心), 細佬諗咗一陣就答: 老婆! (爸爸即場噴飯!) 爸爸問點解呀? 細佬話因為我老婆幫我生BB, 所以我要錫佢! (爸爸話冇教過佢咁講)。媽媽無言...... 細佬的想像力都幾好, 話說媽媽之前借咗幾本繪本故事書, 其中一本係要小朋友幻想自己坐住個熱氣球, 去世界各地, 由高空望返落去地面, 細佬好投入 (但哥哥就成日問個氣球係邊? 個氣球係邊呀?）

情緒智商
細佬呢排多咗喊, 郁少少就扁咀, 然後含住兩泡眼淚, 繼而爆喊, 但佢情緒管理算係唔錯, 通常好快收聲, 同埋會聽爸爸媽媽講野, 會喊住咁講出自己喊的原因 (但哥哥通常喊到乜都聽唔入耳, 只係大叫抱我, 我要你抱我! 最後喊到連自己為乜喊都唔記得), 由於細佬可以講得出為乜喊, 所以爸爸媽媽都可以盡快幫佢諗辦法解決, 佢就好快收聲唔喊喇!

妮妲的額外半日假期

話說科技越黎越進步, 上星期四已經知道今個星期二、三會打風, 所以大家都懷著忐忑不安的心情, 對能否有一日半日的額外假期, 持悲觀的觀望態度, 因為根據天文台的過往記錄 (佢記錄已經花晒, 冇人再信佢), 天文台考慮會否掛八號風球, 並唔係根據實際風速同雨量, 係純屬經濟同政治的考慮!

不過, 由於天文台有提供風暴路線圖, 睇吓條線, 都估到聽朝駛唔駛返工架喇! 尋日下晝就話晚上6點至10點會考慮改掛八號, 仲幻想, 佢會4點宣佈6點掛八號, 咁就可以4點走 (住新界偏遠地區的同事係掛八號前2個鐘可以走人), 誰不知到5:45放工仲未有動靜, 算吧! 我夠鐘都係走人!

回家路上都好平靜, 冇乜風, 又冇雨, 仲幾熱, 似乎個風都冇乜料到, 疊埋心水聽朝起身準時返工啦! 點知到咗夜晚9點, 個風好似真係打到黎咁, 突然好大風呀! 9:40天文台掛八號喇! 咁早掛? 點捱到聽朝呀? 我個心好忐忑, 聽朝好唔想返工, 更加唔想佢聽朝8點就變返三號, 要同全世界人一齊迫地鐵趕返工!

Anyway, 覺仍然係要瞓既, 最近孖寶9:15就會入房, 通常10點前都會瞓著, 所以媽媽最近都可以10:30左右瞓。瞓瞓吓突然聽到狂風暴雨, 媽媽瞓係窗邊, 好驚D風吹爆玻璃, 爸爸都起埋身, 睇吓兩隻豬仔係唔係安然睡覺, 係! 打風打到澎澎聲都嘈唔醒, Good! 爸爸發現窗台滲水, 好在不致於好似以前間屋咁一地都係水! 媽媽望吓個鐘, 原來只係清晨5:30, 喂! 大佬呀! 咁嘈點瞓呀? (我講打風聲), 又唔係可以俾我放一日假, 一陣仲要返工架!

用咗爸爸淘返黎的耳塞 (接近100蚊人仔架, 堅野黎!), 成個世界都好似靜止咗咁, 媽媽好快瞓返喇! 不過, 冇幾耐, 爸爸就聽到有人拍門, 原來又係細佬仔 (佢呢排朝朝早7點幾就起身, 佢返上晝班fit晒!), 媽媽睇睇個鐘, 7:50, 算啦! 起身吧! 一起身, 最重要係即刻拎個手機黎睇, 仲係八號, 個心都定D, 加上仲係橫風橫雨, Good!

同孖寶一齊食早餐, 細佬仔食咗好多野, 媽媽見佢食咁多野, 就好開心! 但哥哥就... 飲咗半杯奶, 好飽! 我食唔落! 我想落去! 我唔食喇! (媽媽聽到已經無名火起, 但都沉得住氣), 反而爸爸父性大發, 抱然然坐係大脾, 又氹, 又錫, 結果叫做食咗一塊蛋同飲埋果半杯奶囉!

叫佢食早餐好似迫佢服毒咁

難得有半日假期, 媽媽唔想嘥咗, 好想落街行吓, 或者做自己喜歡的事, 不過, 孖寶見到媽媽難得唔駛返工, 係屋企, 就同媽媽講: 媽媽, 我想你陪我玩車呀! 不過媽媽真係冇興趣玩車, 於是反提議: 不如我地玩媽媽間屋 (森林家族), 兩個都YEAH! 哥哥仲超級興奮第一個跑入媽媽間房, 話幫媽媽拎間屋出去, 於是, 媽媽就陪佢地玩咗好耐好耐, 時間一分一秒過去喇! 就黎改掛三號風球, 媽媽要返工喇! 唔好嘥時間, 媽媽提意不如落去商場行吓!

問咗起碼3次, 先至有人有反應 (終於明白點解阿嫲冇動力帶佢地落街), 11:15落去商場行街, 原來只有食肆開門, 其他都冇, 所以係冇街可行既, 媽媽同爸爸透露唔開心, 因為知道下晝要返工 (今朝已經唔駛返工喇喎, 真係唔知足呀!) 爸爸話咁不如我地一家四口係度搵野食, 出街食飯然後先至返工, 咁你會唔會開心返D呀?! (爸爸真係好錫媽媽, hoho!)

於是11:40一家四口走去食"板長", 媽媽好耐冇食佢地個櫻花丼喇 (美其名的魚生雜碎飯), 爸爸叫咗兩個櫻花丼, 另外叫咗一碗番茄豚肉烏冬俾孖寶, 個魚生飯好多好多雜碎呀! 佢地個烏冬都唔錯, 媽媽開心返好多喇! 哥哥好鍾意飲麵豉湯(佢話好正!), 同埋食烏冬, 佢應該食咗超過一半, 細佬就唔多like, 反而鍾意食甜蛋, 於是爸爸就叫咗一件甜蛋壽司俾細佬食, 佢好鍾意食, 仲話: 媽媽, 我請你食丫! 媽媽話: 唔好喇! 你咁鍾意, 你食啦! 我有飯食!

能夠返工前同兩隻豬仔食餐飯, 媽媽開心返好多喇

食完飯, 舖頭個姨姨仲每人送咗一粒糖俾佢地食, 細佬仔好開心, 珍而重之, 去廁所都要媽媽幫佢拎住, 驚唔見!

雖然12:45改掛三號, 媽媽終於要返工喇! 但能夠同孖寶出街食餐飯, 享受美好的親子時光, 就成為媽媽返工的動力!

爸爸今日下午請咗假, 因為又要帶然然去睇醫生, 今日係去睇耳鼻喉, 爸爸帶然然搭地鐵, 仲路經公公的士多舖, 公公初頭話: 乜呢個小朋友咁熟口面, 後尾先至認得出係然然, 仲送維他奶同威化餅俾佢! 回程搭巴士, 辛苦晒爸爸喇! 你今晚返黎, 我幫你按摩吓!

然然牙科覆診(4)

繼今年2月然然第3次牙科覆診, 今年8月1號, 然然第4次去見牙醫。

自從舊年11月然然生牙瘡, 到而家都未再翻發, 感恩! 醫生當時話粒牙瘡生咗出黎就係度架喇, 唔會消失, 亦唔會好返, 食抗生素同消炎藥只係控制住粒牙瘡發炎的情況, 當身體抵抗力弱時, 粒牙瘡又會再發炎, 惟有徹底解決的方法就只有 -- 剝咗隻牙佢! 媽媽當然係最唔想啦!

然然今次覆診, 媽媽都係冇陪佢去, 因為媽媽冇乜假, 爸爸好多, 所以由爸爸請假, 揸車帶然然去, 細佬仔知道哥哥要去睇牙醫 (佢未睇過), 又話想去, 仲要扁晒咀, 雙眼含住兩泡淚水望住爸爸, 我又想去啊! 結果, 爸爸一個人帶住兩隻豬仔由將軍澳去灣仔睇牙, 真係要向爸爸致敬! 爸爸, 辛苦晒你喇!

聽爸爸講, 睇牙醫的情況係咁既, 然然自己瞓上張治療床, 當張床降低時, 然然好驚, 雙手捉實張床, 大叫: 跌喇! (其實只係向後挨, 唔會跌架!) 然後檢查牙齒, 牙醫姐姐話然然D牙都算唔錯 (因為暫時冇蛀牙, 可能有D小朋友好似佢咁既年紀已經有蛀牙), 不過, D牙就比較黃, 有牙蹟, 牙醫姐姐想幫然然洗吓D牙, 佢好有耐性咁同然然玩咗好多round個吸咀, 但然然都係唔受騙, 最後勉強洗咗爛咗果隻上排右邊門牙, 又真係洗走咗D蹟, 本來隻牙灰灰地 (因為死咗), 都好似洗返白喎!

牙醫姐姐教爸爸要用含氟化物的牙膏幫佢地刷牙, 亦可以考慮用電動牙刷 (不過, 哥哥超級驚!)

至於一直嚷著要跟埋哥哥去睇牙醫的細佬, 根據爸爸的描述係 -- 全程呆晒! 可能佢睇到咁恐佈的畫面, 嚇呆咗!

醫生知道東區醫院幫我地約咗下年8月全身麻醉剝牙, 佢話其實如果冇野, 都可以唔駛剝既 (媽媽最想聽到呢句), 佢話可以之前(大概下年5月)幫然然照多一次X-Ray, 睇吓咩情況先, 太好喇! 所以今年唔駛再去覆診, 要下年5月先至再見牙醫姐姐喇!