Playgroup Game Over!

話說爸爸一直都唔認為小朋友要返Playgroup! 不過, 係媽媽的壓力下, 爸爸惟有就範, 不過, 由於孖寶兄弟返的所謂Playgroup, 並唔係坊間果D $300一個鐘由鬼婆(or扮鬼婆)教果D, 而只係社區中心搞的流流地$90一堂, 所以爸爸都冇乜反對聲音!

孖寶兄弟自從去年4月(即16個月大)開始返Playgroup, 到今年3月差不多一年喇! 經歷咗一年, 見到佢地有進步, 由初時唔敢行入去課室, 好驚老師, 唔敢參與遊戲, 喊足成堂, 到而家可以自己行入去課室, 同老師打招呼, 幫手收拾玩具, 跟老師做動作, 參與遊戲, 肯講自己個名, 舉手要餅餅, 當然, 有一樣冇變的, 就係兩個都坐唔定, 鍾意係課室入面走黎走去!

上星期六係Playgroup最後一堂, 由於搬咗屋, 返Playgroup真係山長水遠, 次次都遲到, 所以媽媽都唔想再報, 但係屋企附近的Playgroup真係貴到嚇死人, 200幾300蚊一個鐘, 我兩個咪要成600蚊, 加上我兩個B冇時停, 唔會坐定定跟老師學野, 同倒錢落咸水海冇分別, 至於屋企附近的社區中心, 最平都要大概$150一堂, X2=$300, 但都好快就額滿! 似乎都冇乜可能報到, 加上爸爸經常大潑冷水:

1.  咁細個返Playgroup其實冇乜用,
2.  跟本冇需要, 落公園玩仲好
3.  返咗Playgroup唔見得佢地第二時返幼稚園會唔喊同識得遵守課堂秩序
4.  Playgroup係無良商人製造出黎掠水的
5.  .... 還有其他N個理由...

值得一提, 哥哥最後一次返Playgroup, 老師切蛋糕時, 拎咗把刀問小朋友係咩黎? 哥哥即時搶答: 刀刀! 老師再問刀刀要黎做乜架? 都係哥哥搶答: 切開! 我諗老師都嚇一跳, 因為佢地平時連自己個名都唔肯講! hoho...

睡了的小孖寶最可愛!

媽媽好鍾意睇住小孖寶瞓覺個樣, 因為佢地瞓著的時候係最純真, 最可愛的! 所以每朝媽媽返工前, 一定會入房睇吓佢地瞓成點, 有冇'負'被, 暖唔暖, 凍唔凍, 最重要係"欣賞一吓"佢地瞓著覺個天真無邪樣, 然後偷吻一吓佢地個頭仔, 面朱仔, 手仔, 腳板底... hoho

睡了的小孖寶是小天使, 但醒咗的小孖寶就變成惡魔! 曾幾何時, 媽媽真係好驚小孖寶瞓醒, 因為佢地一瞓醒就爆喊, 扭抱, 要你抱住行呢邊, 行果邊, 一放低佢又爆喊, 仲要兩個同一時間爆喊, 同一時間要你抱, 好似你欠咗佢咁, 你只有兩個選擇, 一係由得佢地喊, 搞到家嘈屋閉, 一係抱起是但一個, 但抱起咗唔代表佢會收聲, 因為另一個會喊得更加犀利, 扯住你要你抱佢, 被抱起果個, 由於驚你會放低佢, 所以會再喊得大聲D, 結果只會搞到兩個B越喊越犀利, 媽媽精神上真係受不了, 甚至經常問自己: 係唔係前世殺咗佢地全家, 今世返黎報仇?

又黎update一吓孖寶的近況:

語言及理解能力
哥哥語言能力都係一般, 冇乜進展, 爸爸而家成日教佢地唔可以大吵大鬧, 要用說話講出自己的需要: 「爸爸/媽媽, 我想...... /可唔可以... 俾我?」細佬語言發展繼續進步, 除咗識諗詩, 更加識得自組句子, e.g. 逸逸自己拎箱箱, 唔駛媽媽拎... 媽媽聽到佢咁講, 簡直O晒咀... 笑住答: 好呀! 逸逸自己拎箱箱咁叻! 兩兄弟都有D口頭襌:
1. 媽媽陪你哥哥 / 媽媽陪你細佬
2. 咁得意
3. 好搞笑
4. 俾哥哥得唔得 / 俾細佬得唔得
5. 點解
至於佢地的理解能力, 我相信已經去到99%, 基本上唔會唔明爸爸媽媽講野, 只係聽唔聽你講野, 同肯唔肯跟你做! 兩個對英文的理解亦冇難度, 有日媽媽同爸爸講...

媽: 佢地好似識聽英文喎!
爸: 冇可能, 點會識聽呀?
媽: 唔係喎, 上次阿嫲話工人同細佬講咗一段好長的英文, 意思大概係姐姐要返菲律賓, 細佬即刻話唔准姐姐返屋企! 其實識英文都唔出奇呀, 姐姐係用英文同佢地講野架喎! 你不如試吓用英文同佢地講野!
爸: 逸逸, where is your Thomas?
逸 (即刻指住佢自己架Thomas豬仔車)
爸: 然然, take me your Thomas!
然 (即刻捧起成架Thomas豬仔車拎去俾爸爸)
爸: hoho...得喇! 得喇!

體能與體格發展
哥哥的體能發展比細佬快, 可能因為哥哥比較大膽, 肯嘗試, 又唔怕跌, 星期日去公園, 爸爸仲教哥哥爬繩網! 細佬見到哥哥玩, 佢先至敢試吓玩咋! 兩個仍然都係25磅左右(同3個月前磅一樣), 但抱起上黎好似重咗! 高度就好似冇乜增長, 都係細粒過人!

飲食
哥哥仍然係厭食症患者! 早午晚三餐可食可唔食, 但飲奶, 食Nuts, 食朱古力等零食就OK (媽媽一直都堅守唔俾佢地食朱古力/糖果呢類"兒童毒品", 但就係新年的時候失守了, 去到長輩屋企拜年, 俾人狂餵朱古力... 唉!) 哥哥去酒樓飲茶一定要食米線, 仲要唔食其他野, 只食米線 (養佢真係慳好多米飯!) 細佬就比較肯食野, 晚飯通常都肯自己食, 仲要'畢'晒D飯黎食, 剩低D餸!

作息
9:00 - 10:00 起身
10:00 飲奶 + 食cereal
11:30 - 12:00 午餐
13:00 - 14:00 落街玩
14:00 - 16:00 午睡
16:30 -17:00 飲湯 + 食生果
17:30 - 18:30 睇電視
19:15 - 19:45 晚餐
20:00 - 20:30 沖涼
21:30 飲奶 + 食餅餅
11:15 - 11:30 上床瞓覺

平淡就是幸福!

我和老公都確信平淡就是幸福!

大家交往時很平淡, 雖然老公(當時還是男朋友)偶爾會製造一些驚喜, 但就是這份平淡, 和對方在一起時, 感覺很舒服...

婚後也是很平淡, 每天上班下班, 星期六日大多留在家中看影碟, 或是外出吃個下午茶, 每年去兩次旅行已經是平淡生活中最大的驚喜! 我倆都很享受這份平淡, 因為能夠平平安安的過日子, 不愁工作, 不愁生活, 是上天最大的祝福! 還記得倆口子的生活是這樣的: 夏天時放工後到會所泳池游水, 然後往茶餐廳點兩個小炒; 冬天的時候晚上去運動場跑步暖暖身, 或是飯後帶小狗外出散步, 倆口子的生活雖然平淡, 卻很幸福!  當年甚至有未婚的朋友問我, 這樣子的生活不覺得悶蛋嗎?!

兩年前, 兩個小孩子的出現, 成為了我們平淡生活的衝擊, 對於這份衝擊, 我和老公先是沮喪多於興奮, 然後是憤怒多於快樂, 別人家孩子出生, 一家歡喜若狂迎接小生命的畫面, 並沒有在我們家出現, 因為生活已變成生存, 活著不再有生活, 只是為了生存!

艱苦的兩年過去了, 兩個小孩子漸漸長大, 我們重拾平淡的生活, 飯後帶著孩子們到樓下商場逛逛, 食糖水, 買街頭小食, 星期六日帶孩子到公園玩耍, 一家四口往茶樓飲茶, 或是去看馬騮, 或是乘渡海小輪, 或是參觀火車博物館, 伵口子的生活雖然平淡, 卻很幸福!

朱古力香蕉鬆餅 Chocolate Banana Muffins

材料 (約4個7cm蛋糕杯的份量):

1. 牛油40g
2. 糖30g
3. 蛋1隻
4. 牛奶60ml
5. 熟透香蕉1隻
6. 低筋麵粉120g
7. 泡打粉(baking powder) 5g
8. 朱古力碎(chocolate chips) 20g

做法:
1. 所有材料室温
2. 牛油打至cream狀加入糖打至奶白色
3. 分3次加入蛋繼續打勻
4. 加入牛奶打勻 (可能會出現油水分離狀態, 唔緊要, 加咗麵粉後會好D)
5. 低筋麵粉同泡打粉混合, 分幾次篩入, 搞勻
6. 加入壓爛咗的香蕉搞勻
7. 加入朱古力碎 (可留低少少入爐前舖面作裝飾用)
8. 將麵糊倒入蛋糕杯(約7成滿)
9. 預熱焗爐180度, 焗25分鐘至表面啡色即可 (可用牙簽刺入鬆餅, 如牙簽沾有粉漿, 即未熟, 可把焗爐調至下面發熱, 再焗5分鐘)

孖寶兄弟27個月喇!

孖寶兄弟2歲3個月, 身心發展的情況如下:

哥哥:

1.  都係經常扭計 (唔知扭乜, 有時就知佢係扭眼瞓)

2.  迷戀Thomas (一定要睇Thomas, 唔睇其他卡通片), 喊緊一開機睇Thomas即刻笑返 (雙面人呀!)

3.  又迷戀返爸爸 (早排可能爸爸鬧爆佢, 佢痴多咗媽媽, 近排爸爸冇乜點鬧佢, 佢又迷戀返爸爸, 唔要媽媽lu...) (備註: 咁啱爸爸個名又係叫Thomas)

4.  體感發展比細佬好, 上playgroup肯跳彈床, 又會跟住音樂跳舞, 平衡力時好時差, 去室內遊樂場玩越過障礙時, 平衡力又好好喎, 但係屋企, 無啦啦企係度都會跌低

5.  語言發展同理解能力都係冇細佬咁好, 但相比以前有進步, 同佢講故事, 以為佢無心裝載, 但原來佢一直都聽緊, 仲好記得故事情節, 媽媽話唔瞓覺會點架? 佢識得講: 小雁(故事個主角)......喊喊!

細佬:

1.  多咗扭計, 通常見到哥哥扭計, 佢又扭埋一份, 睇吓媽媽會抱邊個, 成日話人地曳曳, 邊個唔順佢意, 就話人地曳曳

2.  爭玩具同爭寵, 最鍾意搶哥哥玩緊的玩具, 哥哥睇緊Thomas, 佢就話要睇豬豬, 睇吓媽媽就佢定係就哥哥 (聽講話係人的天性黎, 係人類係大自然入面的求生本能, 為自己爭取最多的資源, 增加生存機會......喂! 而家又唔係石器時代!)

3.  體感發展冇哥哥咁好, 上playgroup唔敢嘗試跳彈床, 唔會跟老師做動作一齊跳舞, 驚跌, 好多爬高爬低的體感遊戲都唔敢玩, 或者要媽媽捉實佢隻手手

4.  語言發已經超過同年紀的小朋友(可能媽媽未見過資優兒童啦!) 當同年紀或大過佢的小朋友(我細佬個仔), 仲係講緊外星話, 或者跟本未識講野時, 細佬2歲3個月就可以自己唸一首四句的詩:「煮豆燃豆萁，豆在釜中泣，本是同根生，相煎何太急」, 一氣呵成, 冇調亂句子次序, 唔駛人提水喎, 一個字"勁"!

5.  記性非常好, 同埋可以將書本入面的畫面聯繫到日常生活的物品, 能夠背到一首詩, 當然要記性好好啦! 平日媽媽講故事, 細佬都好用心聽, 故事入面有D佢未見過的物件, 媽媽教1-2次, 佢都已經記得個名, 上次上playgroup, 佢突然指住課室角落頭有個呼啦圈, 原來佢記得媽媽講故事時講過, 不過, 故事書入面係個小女孩玩緊呼啦圈, 但上次課室入面個呼啦圈擺埋咗係角落頭, 仲要俾其他雜物遮住咗大半個圈, 細佬的認知能力真係好強!