2014年過去了... 想通了!

2014年過去了, 老實講, 2014年實在過得唔係太開心, 應該係話, 唔開心多過開心, 怨氣太深(對老公), 連佢都feel到, 一切都源於我覺得佢冇陪我一齊湊對仔, 同埋冇好似其他人老公咁樣, 欣賞老婆為自己生仔!

但係呢幾日, 我好似諗通咗少少, 因為我諗返起其實我老公一直都唔鍾意細路(其實我自己都係), 要求/期望一個唔鍾意細路的人, 陪我一齊湊仔(仲要係打孖黎), 同埋好似其他人老公咁樣, 欣賞老婆為自己生仔, 我呢個要求/期望似乎真係好唔現實, 好唔合邏輯!

諗通咗我對老公的要求/期望原來係完全唔跟劇情的時候, 我對佢的怨氣好似突然消失咗, 尋晚佢主動幫個仔沖涼(其實佢以前都成日幫晒2個仔沖涼, 因為我對手痛, 筋膜炎), 同埋佢半夜三更聽到細佬仔喊, 走去隔離房抱住個仔, 暗返佢瞓, 我見到佢咁做, 反而覺得好唔好意思, 麻煩到佢! (係真呀! 以前只有心裏暗地怨佢唔幫手, 我三更半夜走去氹個仔, 佢就倒頭大睡!)

諗通咗我對老公的要求/期望原來就等同我唔鍾意食梳槤, 佢辛辛苦苦托個梳槤返黎同我分享, 仲期望我好欣賞佢做既野一樣! 我開始諗吓我老公其實都有好多野值得我去欣賞:

1)  唔煙、唔酒、唔玩女人 (佢最憎人食煙噴到佢, 飲少少酒都面紅, 同埋以佢的身高好難有女人埋到佢身, hoho...)

2)  顧家 - 佢放工一定係返屋企, 有時仲要佢去買餸 (佢知我唔鍾意行街市又濕又迫, 怕我辛苦, 所以佢去)

3)  肯做家務 - 未生仔前屋企冇工人, 全部家務都係佢做 (因為佢話我做家務的方法唔啱佢心意)

4)  成份糧俾晒我 - 聯名戶口出糧 (所以我都係成份糧俾晒佢), 屋企的水電煤供樓管理上網雜費, 全部都係佢搞掂, 連我D信用咭數, 交稅, 電話join咩plan, 都係佢幫我搞埋, 基本上我咩都唔駛煩

5)  我鍾意的野佢通常都會買俾我 - 講真, 我鍾意的野唔多, 亦好少"扭"佢買野, 但當佢知道我鍾意某樣野, 尤其係貴野, 連我自己都唔捨得買時, 佢通常都買俾我/鼓勵我買 (e.g. agnes b返工袋, mysty woman 大褸, panasonic麵包機, totoro龍貓記事簿, yamaha數碼鋼琴, ikea梳妝枱, rasonic電焗爐)

6)  錫老婆 - 都算就我, 通常小事都就我, 我承認自己有時都小姐脾氣(但唔算勁, 我覺得!), 佢唔鍾意細路都就我生仔; 成日都唔想我辛苦(寧願佢自己辛苦埋佢) e.g. 去街市買餸、煮飯、去快餐店食飯, 佢一定幫我買埋拎埋俾我、如果男人可以陀仔, 佢應該都會幫我陀對仔, 唔駛我咁辛苦; 佢仲成日敎2個仔對住我講: 媽媽, 我愛你!

7)  肯幫手湊仔 - 大前提係佢唔鍾意細路都幫我湊, 我放產假時, 佢斷斷續續請咗一個月假陪我, 又煲住劇捱到12點幾1點餵夜奶, 冇叫醒我幫手, 曾經試過有段時間冇工人, 佢都同我並肩作戰咗2個月

8)  好錫2個仔 - 雖然佢唔鍾意細路, 但佢好錫2個仔, 肯陪佢地玩, 做埋D白痴表情; 哥哥有2次要入急症室, 佢都好緊張; BBS要去健康院, 佢次次都陪我地去; 我冇時間幫2個仔搵幼稚園, 佢就填晒D表格, 仲請假親身去交埋表

9)  一手包辦屋企所有hardware的維修 - 大至搬新屋要裝修, 小至BB玩具要換電蕊, 當然包括埋佢自己架車, 唔係壞咗都要得閒落去整下先至安樂

10)  都唔算大駛 - 佢平時都好少買衫褲鞋襪手錶之類, 好少用錢, 對食方面更加係慳到冇朋友 (但佢知我對食都有少少要求, 有時都會陪我去食吓貴野, 氹吓我開心), 佢只係每年換一次手提電話 (我怕執輸, 通常都一齊換埋, 其實跟本冇需要換), 換車(生咗BBS後換咗架七人車, 補咗10萬蚊, 一年後嫌架七人車唔夠馬力, 換咗另一架, 補多1萬), 買相機同鏡頭 (生咗BBS後話要每個月影BB相, 結果影咗初頭幾個月, 之後就封塵)

諗到呢度, 我開始明白, 老公唔係唔幫手湊仔, 只係我地分咗工, 佢係會計部+採購部+機電工程部, 我就係湊仔事務部, 負責照顧2個仔的起居飲食同情緒 (計落我仲少野做D喎!)。

2015年第一篇blog, 提醒我要感恩, 欣賞我老公, 記住以後唔開心, 同老公鬧交之後就開黎睇吓喇!!!